Read MUKANDA WANZAMBI Jeremia 27 Bible Online

Jeremia 27 - MUKANDA WANZAMBI bible

Jeremia 27

¹Hatachikili wanta waYehoyakimi mwana kaYosiya, mwanta wawaYuda, kudi Yeremiya kwenjili izu

²dakudi Yehova dakwila nindi, Yehova naŋili nindi, Ilaku nyonji yeyi nimpanda jeyi, wakajishi munshiŋu yeyi;

³wakajitemeshi kudi mwanta wakuEdomi, nikudi mwanta wakuMowabi, nikudi mwanta wawanyana kaAmoni, nikudi mwanta wakuTira, nikudi mwanta wakuZidoni, nawatmjanda akwinza kuYerusalema kudi mwanta wawaYuda Zedekiya;

⁴wakayileji akahampumwini ankaka jawu, nawu, Yehova wamazaza, Nzambi yaIsarela, nahoshi nindi, Tiyenu chimwakaleja ankaka jenu,

⁵nenu, Yami neli iseki, niantu, nianyama ekala hewuludeseki, naŋovu jami jasweja, nachikasa chami chakwolola; iseki nadihani kudi antu anawahili kumuchima wami.

⁶Ichi dinu nenki dehi matuŋawa ejima kudi kambuŋami mwanta wakuBabiloni Nebukaneza, nianyama amumpata namwinki akamukalakeli.

⁷Nyuza yejima yakamukalakela yena, yakakalakela nimwanindi, nimwana kamwanindi, niehakashika mpinji yetuŋa dindi yomweni; henohu nyuza yayivulu nianyanta amaneni akamubalumuna kwikala nduŋu yawu.

⁸Yehova nindi, Chakela, muza hela wanta wakabula kukalakela yena mwanta wakuBabiloni Nebukaneza owu, wakabula kusha nshiŋu yindi mumpanda yamwanta wakuBabiloni, muzowu nakawubabesha nampoku yakabali, nanzala, nachipupu nichinakayinogesha kuchikasa chindi to-o.

⁹Enu bayi mutiyililaŋa kudi atuprofwetu twenu, hela kudi akwakuyi hoŋela, nikuyilota yenu, hela kudi akwakuyi fuchikila, hela kudi akwakuyipandila ahoshaŋa nenu nawu, Bayi mwaka mukalakela mwanta wakuBabilonuku.

¹⁰Muloŋa wena adi nakuyiprofwetela chuma chakutwamba, kulonda ayitwali kwakulehi netuŋa denu; kulonda ami niyitemunumu, mwakanoŋi.

¹¹Yehova nindi, Ilaŋa muza wakeŋija nshiŋu jawu mumpanda yamwanta wakuBabiloni, wukamukalakela, muzowu nakawuleka wakashali mwituŋa dawu, akadimaŋamu, akashakamumu.

¹²Hinukuhosha namwanta wawaYuda Zedekiya mwaya mazu awa ejima, nami, Iŋŋenu nshiŋu jenu mumpanda yamwanta wakuBabiloni, mwakamukalakelaŋa yena niantu indi, mwakahandi.

¹³Mukufwiladi nineyi niantu eyi, nampoku yakabali, nanzala, nichipupu, neyi chanahoshiyi Yehova chakutena muza wukubula kukalakela mwanta wakuBabiloni?

¹⁴Bayi mutiyililaŋa mazu awatuprofwetu adi nakuhoshawu nanenu, nawu, Bayi mwakamukalakela mwanta wakuBabilonuku. Muloŋa wena adi nakuyiprofwetela chuma chakutwamba.

¹⁵Yehova nindi, Muloŋa ami hinayitemeshuku, adi nakuprofweta mwakutwamba mwijina dami, kulonda nakayitemunumu, mwakanoŋi ninenu niatuprofwetu ayiprofwetelaŋa.

¹⁶Hinukuhosha nawa nawatupristu nawantu awa ejima, nami, Yehova nahoshi nindi, Bayi mutiyililaŋa mazu awatuprofwetu twenu ayiprofwetelaŋa nawu, Tiyenu yuma yamwitala daYehova keŋa ayifuntishi cheŋi kuBabiloni yifumi kuyayiluku. Muloŋa wena adi nakuyiprofwetela chuma chakutwamba.

¹⁷Bayi mutiyilila kudi wenaku. Mukalakelenu mwanta wakuBabiloni, muhandi. Indi mukaliwu wakabalumukiladi chihembi?

¹⁸Neyi hiyatuprofwetu, hela neyi izu daYehova didi nawena, alembeleli dinu Yehova wamazaza, kulonda yuma yinashali mwitala daYehova, nimwitala damwanta wawaYuda, nikuYerusalema, yibuli kuya kuBabiloni.

¹⁹Muloŋa Yehova wamazaza nateni yishimi, niŋiya, nimatentaminu, niyuma yinashali yasheli mumukala wunu,

²⁰yabulili kutwalayi mwanta wakuBabiloni Nebukaneza, hafumishiliyi mwanta wawaYuda Yekoniya mwana kaYehoyakimi kuYerusalema, hakumutwala kuBabiloni hamu nawayilolu ejima amuYuda namuYerusalema;

²¹eŋa, Yehova wamazaza, Nzambi yaIsarela, nateni yuma yasheli mwitala daYehova, nimwitala damwanta wawaYuda, nikuYerusalema,

²²nindi, Akayitwala kuBabiloni, diku kuyakekala kushika nikwifuku dinakayihempula. Dimu mwanahoshiyi Yehova. Nindi, Dihu hinakayileta cheŋi, nakayifuntisha cheŋi kwenakunu.