Read MUKANDA WANZAMBI Jeremia 28 Bible Online

Jeremia 28 - MUKANDA WANZAMBI bible

Jeremia 28

¹Chelili mwaka wowenowu, hatachikili wanta wamwanta wawaYuda Zedekiya, mumwaka wamuchiwana, mukakweji kamuchitanu, kaprofwetu mwana kaAzuri Hananiya, wakuGibeyoni, hakuhosha nanami mwitala daYehova iku atupristu nawantu ejima anemani,

²nindi, Yehova wamazaza, Nzambi yaIsarela, nahoshi nindi, Nakotoli dehi mpanda yamwanta wakuBabiloni.

³Mukachi kanyaka yiyedi chikupu nakaleta cheŋi kwenakunu yuma yejima yamwitala daYehova, yafumishiliyi mwanta wakuBabiloni Nebukaneza kunu, yatweliyi kuBabiloni.

⁴Nakaleta cheŋi kwenakunu mwanta wawaYuda Yekoniya mwana kaYehoyakimi hamu nawankoli awaYuda ejima ayili kuBabiloni. Dimu mwanahoshiyi Yehova. Nindi, Muloŋa ami nakakotola mpanda yamwanta wakuBabiloni.

⁵Kaprofwetu Yeremiya hakumwila kaprofwetu Hananiya iku atupristu anemani, niantu ejima anemanimwitala daYehova,

⁶kutiya yemweni kaprofwetu Yeremiya nindi, Amena, Yehova eli mwomwenomu. Yehova akoŋi mazu eyi wunaprofweti, kulonda aleti cheŋi yuma yamwitala daYehova, niantu ejima ayili muwukoli, afumi kuBabiloni enzi kwenakunu.

⁷Hela chochu, tiya izu idi dinukuhosha kumatu eyi, nikumatu awantu ejima,

⁸nami, Atuprofwetu ásambilili, ami naneyi tuchidi kanda, aprofweteli chakuzuwila matuŋa amavulu, nimawanta amaneni, aprofweteli janjita, nŋakutama, nŋachipupu.

⁹Kaprofwetu waprofwetaŋa jakumwena, neyi izu dakaprofwetu owu dinamwekani, dihu hakelukilawu owu kaprofwetu, nawu anamutemeshi kudi Yehova.

¹⁰Kaprofwetu Hananiya hakufumisha mpanda yadiŋi munshiŋu yakaprofwetu Yeremiya, hakuyikotola.

¹¹Hananiya hakuhosha, iku antu ejima anemani, nindi, Yehova nahoshi nindi, Dichenichi chinakakotola mpanda yamwanta wakuBabiloni Nebukaneza mukachi kanyaka yiyedi chikupu, yakafumi munshiŋu janyuza yejima. Kaprofwetu Yeremiya hakudiyila kwindi.

¹²Heliliyi kaprofwetu Hananiya nakotoli dehi mpanda yadiŋi munshiŋu yakaprofwetu Yeremiya, izu dakufuma kudi Yehova hidikwinza kudi Yeremiya,

¹³nindi, Yaku wakaleji Hananiya neyi, Yehova nahoshi nindi, Eyi wunakotoli mpanda jamutondu; ilaŋa eyi wakahiŋaishamu mpanda jachikuŋu.

¹⁴Muloŋa Yehova wamazaza, Nzambi yaIsarela, nahoshi nindi, Ami nashi dehi mpanda jachikuŋu munshiŋu janyuziyi yejima kulonda yakakalakeli mwanta wakuBabiloni Nebukaneza; ninodu yakamukalakela. Namwinkinawani anyama amumpata.

¹⁵Kaprofwetu Yeremiya hakumwila kaprofwetu Hananiya, nindi, Eyi Hananiya, tiyaku dinu. Hiyanakutemeshi kudi Yehovaku. Eyi kweyi wudi nakuyila antu awa akuhweleli chuma chakutwamba.

¹⁶Dichi Yehova nahoshi nindi, Tiya, hinukukunata wufumi hanu hewulu deseki. Makonu wukufwa, muloŋa wunahoshi jakudikaŋa naYehova.

¹⁷Kaprofwetu Hananiya afwa nikufwa mwaka wowenowu, mukakweji kamuchitanu nakayedi.