Read MUKANDA WANZAMBI Jeremia 29 Bible Online

Jeremia 29 - MUKANDA WANZAMBI bible

Jeremia 29

¹Tiyenu mazu amukanda watemesheliyi kaprofwetu Yeremiya, wafumini kuYerusalema, hakuwutemesha kudi awakulumpi adiŋi muwukoli, nikudi atupristu, nikudi atuprofwetu, nikudi antu ejima atweliyi Nebukaneza muwukoli, afumishiliyi kuYerusalema hakuyitwala kuBabiloni;

²henohu mwanta Yekoniya, nimama yamwanta, niatulala, niatulamba twamuYuda namuYerusalema, niakwawukalawenu, niachi afuma dehi kuYerusalema;

³hakuwutemesha namwana kaShafwani Elasa, nimwana kaHiIikiya Gemariya atemesheliyi mwanta wawaYuda Zedekiya kuBabiloni kudi mwanta wakuBabiloni Nebukaneza,

⁴nindi, Yehova wamazaza, Nzambi yaIsarela, nahoshi nawantu ejima amuwukoli anakwatishiyi kulonda ayifumishi kuYerusalema ayitwali kuBabiloni muwukoli,

⁵nindi, Tugenu matala, mushakamumu; dimenumatempa, mudiilumuyakudya;

⁶sumbulenu aŋodi jenu muvwali anyana amayala nawambanda; sumbwilenu anyanenu aŋodi jawu, sumbwishenu anyanenu kudi anfumu jawu, kulonda niwena akavwali anyana amayala nawambanda, mwakasemunwini kwenoku mwakabuli kukeha.

⁷Mukala wunayitwalishi dehi muwukoli wukegelenu jakumwena, wulombelenu kudi Yehova, muloŋa kukumwena kwamukalowu diku kumwakamwena kumwena.

⁸Muloŋa Yehova wamazaza, Nzambi yaIsarela, nahoshi nindi, Bayi ayidimba kudi atuprofwetu twenu mwekala nawu, hela kudi akwakuyi hogelaku, bayi mutiyililaŋa yilota yenu yimwalotaŋaku.

⁹Muloŋa wena adi nakuyiprofwetela mwakutwamba mwijina dami. Ami kwami hinayitemeshuku. Dimu mwanahoshiyi Yehova.

¹⁰Muloŋa Yehova nahoshi nindi, Neyi nyaka yaBabiloni makumi atanu nayedi yinawani dehi, nakayihempula, nakakoŋa izu dami dadiwahi dinahosheli nenu dakuyifuntisha kwenakunu.

¹¹Muloŋa ami neluki yitogojoka yinayitogojokaŋa, hiyitogojoka yakumwena, hiyitogojoka yakutamaku, kulonda hanyaka yenu yakukuminina nakayinki yakukuhwelela.

¹²Henohu dihu mwamba kantambika, mwamba kaya nakulomba kudami, ninami namba kayitiyilila.

¹³Mwamba kankeŋakeŋa, mwamba kanwana neyi Mwakankeŋa keŋa nanyichima yenu yejima.

¹⁴Yehova nindi, Ninami akanwanaŋa kudenu, namba kabalumuna cheŋi wukoli wenu, namba kayikuŋula munyuza yejima nikumatuŋa ejima kuna yite mwinini. Dimu mwanahoshiyi Yehova. Namba kayifumisha cheŋi oku kunayitwalishili muwukoli.

¹⁵Muloŋa munahoshi dehi nenu, Yehova natumwekesheli atuprofwetu muBabiloni.

¹⁶Muloŋa Yehova nateni dehi mwanta wudi nakushakama hetanda daDavidi dawanta, niantu ejima ashakama mumukala wunu, niana kwenumuna buli kuya nawu muwukoli;

¹⁷Yehova wamazaza nindi, Tiyenu, nakayitemeshela mpoku yakabali, ninzala, nichipupu, nakayibalumuna kwikala neyi yikuyu yatama, yaka ŋanya ŋawu kudya nanochu chiyasweja kutama.

¹⁸Nakayihaŋa nampoku yakabali, nanzala, nichipupu, nakayihana kulonda akayizukumoni mwahita mawanta aheseki dejima, kulonda akayishiŋi, akayihayami, akayiyiŋili, akayisawuli mukachi kanyuza yejima munayitemwini;

¹⁹nanochu chanabuli kutiyililawu mazu ami, dimu mwanahoshiyi Yehova, chanabuli kutiyililawu mazu ami nayitemesheleli nawambuŋami atuprofwetu, chakumenekaŋa budidi nakuyitemesha. Ilaŋa enu kwenu kwonti kwenu kutiya. Dimu mwanahoshiyi Yehova.

²⁰Dichi enu ejima mwekala muwukoli nafumishili muYerusalema natweli muBabiloni, tiyenu izu daYehova.

²¹Yehova wamazaza, Nzambi yaIsarela, nateni mwana kaKolaya Ahabi nimwana kaMayaseya Zedekiya, adi nakuyiprofwetela chuma chakutwamba mwijina dami, nindi, Tiyenu nukuyihana kudi mwanta wakuBabiloni Nebukaneza. Wukuyŋahila kumesu eyi.

²²Ankoli ejima awaYuda adi muBabiloni akakwatila ishiŋu hadi wena, akela nawu, Yehova akubalumuni neyi Zedekiya, neyi Ahabi nawa, ocheliyi mwanta wakuBabiloni mukesi,

²³nanochu chanakoŋuwu jawusupi muIsarela, chanakoŋuwu wuvumbi nawaŋodi jawakwawu, chanahoshuwu mwijina dami mazu akutwamba inabulili kuyilejami. Ami yami neluka, yami chinsahu. Dimu mwanahoshiyi Yehova.

²⁴Kateni Shemaya wakuNehelami,

²⁵neyi, Yehova wamazaza, Nzambi yaIsarela, nahoshi nindi, Ochu chiwunatemeshi nyikanda mwijina deyeyi aweni kudi antu ejima adi kuYerusalema, nikudi Zefwaniya mwana kakapristu Mayaseya, nikudi atupristu ejima,

²⁶nakwila neyi, Yehova nakwinki dehi wupristu, nakuhiŋishi dehi mudi kapristu Yehoyada, kulonda mwakekalaŋa atulala amwitala daYehova, twansaŋu jawantu ejima azaluka, niakudinka wuprofwetu kulonda wakayishi mumpompa nimunyonji.

²⁷Dichi yidinu wunalekelidi kumuhoshola Yeremiya wakuAnatoti, welaŋa nindi nikaprofwetu kenu?

²⁸Muloŋa yena natemeshi dehi mazu kudetu tudi muBabiloni nindi, Wukoli hiwakamana swayuku. Tuŋenu matala, mwakashakamumu. Dimenu matempa, mwakadyi yikusoŋamu.

²⁹Kapristu Zefwaniya hakutaŋa mukandiwu kumatu akaprofwetu Yeremiya.

³⁰Izu daYehova hidikwinza kudi Yeremiya,

³¹nindi, Temeshaku mazu kudi antu ejima adi muwukoli, neyi, Yehova nateni Shemaya wakuNehelami nindi, Ochu chanaprofwetiyi Shemaya kudenu chakadi kumutemesha kudami, chanayidimbiyi dehi mukuhweleli chuma chakutwamba;

³²dichi Yehova nahoshi nindi, Tiyenu, nakamubabesha Shemaya wakuNehelami, nianyanindi. Hakamona muntu wakushakama nawantu awaku, nikuwaha kunakakoŋa antu ami hakakumonaku. Dimu mwanahoshiyi Yehova. Muloŋa yena nahoshi jakudi kaŋa naYehova.