Read MUKANDA WANZAMBI Jeremia 30 Bible Online

Jeremia 30 - MUKANDA WANZAMBI bible

Jeremia 30

¹Izu dakufuma kudi Yehova denjili kudi Yeremiya,

²nindi, Yehova Nzambi yaIsarela nahoshi nindi, Sonekaku mumukanda mazu ejima inahoshi naneyi.

³Muloŋa Yehova nahoshi nindi, Tiyaku, kwamba kenza mafuku inakabalumuna wukoli wawantu ami aIsarela nawaYuda. Dimu mwanahoshiyi Yehova. Nakayi funtisha cheŋi kwituŋa dinenkeli ankakulula jawu, kulonda akadiheti.

⁴Tiyenu mazu ahosheliyi Yehova akutcna aIsarela nawaYuda.

⁵Muloŋa Yehova nahoshi nindi, Tunatiyi izu dakuzaala, dawoma, hidakumwenaku.

⁶Ihujolenu dinu mutali neyi iyala wafunyishaŋa nyisoŋu yakuvwala. Indi ami namoni ŋahi amayala ejima anakwati makasawu hankuma, neyi mumbandawudinakufunyisha, nimesu awu ejima anatookoloki dehito-o?

⁷Yayo! Ifuku odu deneni, hikudi dakweseka naduku. Diyi mpinji yayihuŋu yaYakoba. Hela chochu, akamwamwinamu.

⁸Yehova wamazaza nindi, Ifuku odu nakakotola mpanda yindi yidi munshiŋu yeyi, nakaketola nyonji yeyi. Antu akwacheŋi hiya kamu balumuna nawa cheŋi kwikala nduŋu yawuku.

⁹Akakalakela Nzambi yawu Yehova, nimwanta wawu Davidi inakayinyamwina.

¹⁰Yehova nindi, Dichi eyi kambuŋami Yakoba bayi wutiya womaku; eyi Isarela, bayi wakamaku. Muloŋa tiya, namba kakwamwina chakukufumisha kwakulehi, namba kaamwina nianyaneyi chakuyifumisha mwituŋa danamwenuwu wukoli. Yakoba wamba kafunta, wamba kashakama chakumwena zo-o, mumesu mwawunda be-te-te, niwakumutiyisha woma nehi.

¹¹Yehova nindi, Muloŋa ami nidi neyi kulonda kukwamwinaŋa. Muloŋa ami namba kakumisha chikupu nyuza yejima kunakupalaŋesheleli, hakwila eyi hinamba kakukumisha chikupuku. Ilaŋa nakakubabeshaŋa mwawuŋaji, hinakakuleka nihanti chakadi kukubabeshaku.

¹²Muloŋa Yehova nahoshi nindi, Yikatu yeyi yabulaŋa kuukewa, chitu cheyi chakala.

¹³Hikudi wakukuhakwila muloŋa weyi kulonda wumoni kukukasa hachilondaku. Hiwukweti yitumbu yakukuukaku.

¹⁴Akwenu ejima akukeŋa anakuvulameni dehi; hiya kukeŋakeŋaŋaku; muloŋa nakutapi dehi chitu chidi neyi chakukutapa kudi chilumbu, nakubabeshi neyi chakukubabesha kudi nkatu; nakuluwa kweyi kwasweja, nanshidi jeyi javula dehi.

¹⁵Wukudililadi yikatu yeyi? Yikatu yeyi yabulaŋa kuukewa; muloŋa wakuluwa kweyi kwasweja, nanshidi jeyi jinavuli, dichi nakwilili yumiyi.

¹⁶Dichi antu ejima akakudyeyi niwena akayidya. Akwankunyi neyi ejima akaya muwukoli niwumu wakashalahu. Akakubuwaŋa eyi niwena akayibuwa. Akakupupaŋa eyi niwena akayipupa.

¹⁷Yehova nindi, Nakakukolesha cheŋi, nakakukuswisha yitu yeyi. Muloŋa anakuteni dehi nawu wakinjikewa, nawu, Diyi Ziyona abula kushawu antu kumuchima.

¹⁸Yehova nahoshi nindi, Tiyenu, nakabalumuna cheŋi wukoli wamatenti aYakoba, kwindi kwashakama shakamayi nakatiyilaku wushona. Nimukala nakawutuŋa cheŋi hamulumba wawu waweni, mwitala damwanta mwakashakama antu, neyi chashakaminaŋawu.

¹⁹Mudi wena mwakatiyakana kusakilila, nimazu awantu akuzaŋajala. Nakayivulisha, himwakakehaku. Nakayilemesha, himwakekala akadi kulemaku.

²⁰Anyanawu akekala neyi chadiŋuwu hakusambila, chipompelu chawu chakashimata kumesu ami, nakababesha antu ejima ayikabishaŋa.

²¹Mulopu wawu wakekala wahadi awenawu, nyuli yawu wakafuma mudi wena. Nakamukundamisha kwakwihi, niyena wakakundama kudami. Ochu wadiŋi nawulobu wakwinza kudami hinyi? Dimu mwanahoshiyi Yehova.

²²Enu mwakekala antu ami, ninami nakekala Nzambi yenu.

²³Tiyenu, mpepela yaYehova yeneni, kwokulendumuka kwindi, yinediki, himpepela yakombaŋa chakukomba. Yakabalukila hanamutu wamukwakwila chatama.

²⁴Kuzuwa kwaYehova kwasweja hikwakafunta mwokuku, chiŋa neli dehi, chiŋa nakoŋi dehi yafuukulayi mumuchima windi. Chamba kayilumbulukila chikupu hamafuku akukuminina.