Read MUKANDA WANZAMBI Jeremia 32 Bible Online

Jeremia 32 - MUKANDA WANZAMBI bible

Jeremia 32

¹Izu dakufuma kudi Yehova denjili kudi Yeremiya mumwaka wekumi wamwanta wawaYuda Zedekiya, wowu mwaka waNebu-kaneza wekumi nakatanu nakasatu.

²Henohu njita yamwanta wakuBabiloni yinakuchiki Yerusalema. NiYeremiya anamwenzeleli dehi muchipaŋu chaawatulama chekala kwitala damwanta wawaYuda.

³Muloŋa amwenzela dehi kudi mwanta wawaYuda Zedekiya, nindi, Wukuprofweteladi neyi, Yehova nahoshi nindi, Tiyenu, mukaliwu nukuwuhana kudi mwanta wakuBabiloni, wakawutambula?

⁴Neyi, Zedekiya mwanta wawaYuda hakapuluka kudi aKaladeyaku, chalala akamuhana kudi mwanta wakuBabiloni, wakahosha nindi kanwa nakanwa, akamonaŋana mesu namesu.

⁵Neyi, Wakatwala Zedekiya kuBabiloni, akekali kwokwenoku nichinakamuhempula; dimu mwanahoshiyi Yehova; neyi, Hela mwakalwa nawaKaladeva himwakamona kuwahaku.

⁶Yeremiya nindi, Izu daYehova denjili kudami,

⁷nindi, Tiya, Hanameli mwana kamandumi yeyi Shalumi wukwinza kudeyi, wukukwila nindi, Landaku iha dami didi kuAnatoti, muloŋa eyi yeyi wuteji kudikúula kulonda wudilandi kweyi.

⁸Dichi mwana kamandumi Hanameli wenjili kudami muchipaŋu chaawatulama mwomwizu daYehova, hakuŋila nindi, Landaku mwani, iha dami dekala kuAnatoti, dekala mwituŋa daBenjamini; muloŋa yeyi wuteji kudiswana, muloŋa yeyi mwenikudikúula; kadilandi diikali deyi. Niiluka nikwiluka nami, Hiizu daYehova.

⁹Iha dakuAnatoti hinukudilanda kudi mwana kamandumi Hanameli, hinukumupezeleshela mali jishekeli jasiliva ikumi najitanu najiyedi.

¹⁰Nisoneka ninsaŋoyu, hinukulamikahu chilamiki, hinukutambika ayinsahu, hinukumupezeleshela mali hapezu.

¹¹Hinukunona mukandowu wansaŋu yakulanda, ninowu wakulamika mwaya lushimbi natushidikilu, ninowu wakadi kulamika,

¹²hinukumwinka Baruki mwana kaNeriya, mwana kaMahaseya mukanda wansaŋu yakulanda, iku mwana kamandumi Hanameli wudi nakutala, niayinsahu asonekeli majinawu kumukanda wansaŋu yakulanda adi nakutala, aYudeya ejima anashakami muchipaŋu chaawatulama.

¹³Hinukumuhampumwina Baruki kumesu awu,

¹⁴nami, Yehova wamazaza, Nzambi yaIsarela, nahoshi nindi, Nonaku iyi nyikanda yansaŋu yakulanda, niwakulamika chilamiki nimukandiwu wansaŋu yakulanda wakadi kulamika, wuyishi munsaba yewumba, kulonda yakashakami mafuku amavulu.

¹⁵Muloŋa Yehova wamazaza, Nzambi yaIsarela, nahoshi nindi, Nimatala, nimaha, nimatempa anyivinyu amba kayilanda cheŋi mwituŋidi.

¹⁶Chinelili namwinki dehi mwana kaNeriya Baruki mukanda wansaŋu yakulanda, hinukulomba kudi Nzambi,

¹⁷nami, Ala, Mwanta Yehova! Tiya, yeyi welili mawulu niiseki naŋovu jeyi jeneni, nichikasa cheyi chakwolola; hikwekala chuma chakukaŋanyeyuku.

¹⁸Yeyi wamwekeshelaŋa makombakaji awantu luwi, yeyi nawa wafweteshaŋa kuluwa kwawankakulula muntulu jawanyanawu akalondelamu. Nzambi wela nikutoha niŋovu, ijina dindi diyi Yehova wamazaza.

¹⁹Wasweja hampùŋa, wasweja ŋovu kunyidimu, wukweti mesu atonena njila jawanyana kawantu jejima, kulonda kuyinka antu ejima yamwaya njila jawu, niyamwaya nyikabu yayuma yelaŋawu.

²⁰Yeyi washili yinjikijilu nayuma yakuhayamisha mwituŋa daEjipitu, kushika nikulelu, nimuIsarela, nimukachi kawantu acheŋi; hiwukutiyakesha ijina deyi neyi chiwuneli ifuku dalelu;

²¹hiwukufumisha antu eyi aIsarela mwituŋa daEjipitu nayinjikijilu, nayuma yakuhayamisha, nachikasa chaŋovu, nachikasa chakwolola, namutentu waweni;

²²hiwukuyinka ituŋidi diwasanyikilili ankakulula jawu neyi nakayinka; ituŋa datuloŋa twamayeli nawuchi,

²³hiyakwijila mu, hiyakudiheta. Ilaŋa wena kwawu hiyovwahilili izu deyi hela kwenda munshimbi jeyuku. Yuma yejima yiwa yilejeli kwila hiyaneluhu nichimuku. Dichi chiwunayileteli kutama kwejimiku.

²⁴Tala nyikandu, eŋila dehi kwawu mumukala nawu awutambuli. Nimukala awuhana dehi kudi aKaladeya adi nakulwa nawu, nansaŋu yampoku yakabali, nanzala, nachipupu. Nichuma chiwunahoshi chinamwekani dehi. Tala, eyi aweni wunachimoni.

²⁵Eyi Mwanta Yehova, wuŋili neyi, Landaku iha namali, wutambiki ayinsahu; kutala mukala awuhana dehi kudi aKaladeya.

²⁶Izu daYehova hidikwinza kudi Yeremiya,

²⁷nindi, Tiya, yami Yehova Nzambi yawantu ejima. Kwekala chuma chakukaŋanyami?

²⁸Dichi Yehova nahoshi nindi, Tiya, mukaliwu nakawuhana kudi aKaladeya, nikudi mwanta wakuBabiloni Nebukaneza, wakawutambula kwindi.

²⁹AKaladeya adi nakulwa namukaliwu akenza nakubutula kesi kakwocha mukaliwu hamu namatala akweti tupala twanalambwiluwu Bayali insensi, twanahuŋunwinuwu akishi nyilambu yakuhuŋununa, kulonda anvuloki nizuwi.

³⁰Muloŋa anyana kaIsarela nianyana kaYuda mudimu wawu wakukoŋa yatama hohu kumesu ami kufumisha kuwansi wawu. Muloŋa anyana kaIsarela mudimu wawu wakunvulokaŋa hohu, nizuwi nanyidimu yakumakasawu. Dimu mwanahoshiyi Yehova.

³¹Muloŋa mukaliwu ami nawumoni wakusaŋumuna kuzuwa kwami nikulendumuka kwami, kufumisha kwifuku dawutuŋiluwu kushika nikwifuku dalelu; kulonda nakawufumishi kumesu ami,

³²nakutama kwawanyana kaIsarela nawanyana kaYuda kwejima kwanakoŋuwu niwena, nianyanta jawu, nitulamba twawu, nitupristu twawu, nituprofwetu twawu, niaYuda, niakwakushakama muYerusalema kulonda kunvuloka nizuwi.

³³Ananfutaleli nyima, hiyanantalishi mesuku. Kutoŋa ami nayilejelaŋa chakumenekaŋa budidi nakuyileja, hela chochu, hiyanantiyili kulonda ayileji maanaku.

³⁴Ilaŋa wena anashi yishimashima yawu mwitala natumbili ijina dami, kulonda aditamishi kwawu.

³⁵Anatuŋi yinaŋanaŋa yaBayali yidi muchine-kineki chamwana kaHinomi, kulonda kuhanwishaŋa nyanawu amayala nawambanda mukesi ayi kudi Moleki; chuma chakukoŋa chishimashima ichi, chakuvulumwisha aYuda, hiyami nayilejeluku, hichenjili nikumuchima wamuku.

³⁶Ichi dinu Yehova Nzambi yaIsarela nateni dehi mukaliwu wumudi nakwila nenu, Anawuhani kudi mwanta wakuBabiloni nampoku yakabali, nanzala, nachipupu,

³⁷nindi, Tiyenu, nakayipompesha mumatuŋa ejima kunayitemuni chinazuwili, chinalendumukili, chinaswejeli ndombu. Nakayifuntisha cheŋi kwenakunu, nakayishakamisha chakadi kwakama.

³⁸Akekala antu ami, ninami nakekala Nzambi yawu.

³⁹Nakayinka muchimawumu ninjila yimu, kulonda akantiyaloŋa woma mafuku ejima, kulonda akamonaŋa kuwaha niwena nianyanawu amba kayilondelaŋa.

⁴⁰Namba katiyaloŋana nawu chitiyaŋenu chahaya nyaka, nami, Hinakafuma kudi wenamwaka nileki kuyiwahishaku. Nakasha munyichima yawu jakuntiya woma, kulonda akabulaŋa kufuma kudami.

⁴¹Nakayizaŋalela kulonda kuyila mwamuwahi, nakayitumba mwituŋidi chalala chamuchima wami wejima, chawumi wami wejima.

⁴²Muloŋa Yehova nahoshi nindi, Imu munaleteli antu awa kutama kweneni kwejimiku, dimu nawa nakayiletela kuwaha kwejima kunayikani.

⁴³Maha akayilandaŋa mwituŋidi dimudi nakwila nenu, Hichihembi chakadi antu hela anyama. Nenu, Adihana dehi kudi aKaladeya.

⁴⁴Antu akalandaŋa maha namali, akasonekaŋa nsaŋu oju, akayilamikaŋa yilamiki, akatambikaŋa ayinsahu, nimwituŋa daBenjamini, ninamutunyikala tudi kwakwihi naYerusalema, nimunyikala yamuYuda, nimunyikala yakwituŋa damapidi, nimunyikala yakunkulu, nimunyikala yakukabeta kakuchidiilu; muloŋa nakafuntisha antu awu ayili muwukoli. Dimu mwanahoshiyi Yehova.