Read MUKANDA WANZAMBI Jeremia 33 Bible Online

Jeremia 33 - MUKANDA WANZAMBI bible

Jeremia 33

¹Helili Yeremiya wuchidi saŋa amwenzelelawu muchipaŋu chaawatulama, izu daYehova hidikwinza kudi yena kamu chiyedi,

²nindi, Yehova mukwakuchikoŋa, Yehova mukwakuchituŋa kulonda kuchishimatisha, wukweti ijina daYehova,

³nahoshi nindi, Ntambiki, nakakwitiya, nakakuleja yuma yamaneni yakala, yakadi kwilukeyi.

⁴Muloŋa Yehova, Nzambi yaIsarela, nateni matala amumukala wunu, nimatala awanyanta jawaYuda anahumunuwu nansaŋu janyikandu, ninansaŋu jampoku jatubali,

⁵nindi, Anenzi nakulwa nawaKaladeya, kulonda akayinzeshi nayibimbi yawantu najahili hakuzuwa kwami, nihakulendumuka kwami, nansaŋu jawantu ejima akweti kutama kunaleteshi kubuta kumesu ami, nibuli kutala mukaliwu.

⁶Tiyenu, nakawuletela kukola, nikuditiyaku, nakayuka kwami. Nakayimwekeshela kuwunda kwakuvulu ninsaŋu yalala.

⁷Nakafuntisha aYuda nawaIsarela ayili muwukoli, nakayituŋa neyi hakusambila.

⁸Nakayitookesha kuluwa kwawu kwejima kwananvulumunuwu. Nakayanakena kuluwaluwa kwawu kwejima kwakunvulumuna nikwakunmotoka.

⁹Mukaliwu kudami wakekala wejina dakuluŋa, wakushimeka, wampuhu, kumesu anyuza yahanu hamaseki yejima yakatiya kuwaha kwejima kunakayila, yakatiya woma nakuzaala, nakuwaha kwejima, nakumwena kwejima kunakayiletela.

¹⁰Yehova nahoshi nindi, Munu mwelaŋawu nawu, Muchihembi chakadi antu hela anyama, munyikala yamuYuda nimunyikwakwa yamuYerusalema muneli yihembi yakadi antu, yakadi ashakamamu, yakadi hela anyama,

¹¹mwakatiyakana cheŋi izu dakuluŋa, niizu dakutiya kuwaha, niizu dansunambuli, niizu dansumbuki, nimazu awantu akwila nawu, Musakililenu Yehova wamazaza, muloŋa Yehova himuwahi, luwi lwindi lwahaya nyaka; nimazu awantu akuleta yimuna yakusakilila mwitala daYehova. Muloŋa ami nakafuntisha antu amwituŋayili muwukoli, akekali neyi chadiŋuwu hakusambila. Dimu mwanahoshiyi Yehova.

¹²Yehova wamazaza nahoshi nindi, Mwenamunu mwela dehi kwachihembi chakadi antu hela anyama, nimunyikala yawu yejima, mwakekala muwushakaminu wawatubiŋa akakamikaŋa nyikanka yawu yanyikoku.

¹³Nimunyikala yakwituŋa damapidi, nimunyikala yakunkulu, nimunyikala yakukabeta kakuchidiilu, nimwituŋa daBenjamini, ninamutunyikala tudi kwakwihi naYerusalema, nimunyikala yamuYuda, mwishina damakasa amukwakuchinda mwakahita cheŋi nyikanka yanyikoku. Dimu mwanahoshiyi Yehova.

¹⁴Yehova nindi, Tiyenu, kwamba kenza mafuku inamba kakoŋa izu dadiwahidi nateneneni mutaŋa waIsarela namutaŋa waYuda.

¹⁵Mumafuku owu, kumpinji oyu namba kamumeneshela Davidi Mutayi wakuloŋa. Wakela niyawuŋaji niyakuloŋa mwituŋa.

¹⁶Mumafuku owu aYuda amba kayamwina, niYerusalema wamba kashakama chachiwahi chakadi kwakama. Amba kanamutumbawu, nawu, Yehova hikuloŋa kwetu.

¹⁷Muloŋa Yehova nahoshi nindi, Davidi hamba kabula muntu wakushakama hetanda dawanta damutaŋa waIsarelaku.

¹⁸Niatupristu aLevi hiyamba kabula muntu kumesu ami wakulambulaŋa nyilambu yakushita, hela wakwochaŋa nyilambu yawuŋa, hela wakuketulaŋa yimuna hefuku hefukuku.

¹⁹Izu daYehova denjili kudi Yeremiya,

²⁰nindi, Yehova nahoshi nindi, Neyi mwakatwesha kujaha chitiyaŋenu chami chamwaana, nichitiyaŋenu chami chawufuku, mwaka mwakabuli kwikala mwaana nawufuku hawu hekalilaŋawu,

²¹komana nichitiyaŋenu chami chinatiyaŋeni nakambuŋami Davidi akatwesha kuchŋaha, mwaka yena akabuli muntu wakuyula hetanda dindi dawanta, nichitiyaŋenu chami chinatiyaŋeni nawankoŋi jami atupristu aLevi, akatwesha kuchŋaha nawa.

²²Chakaŋanyaŋa wu kuchinda yileŋaleŋa yamwiwulu, nichakaŋanyaloŋawu kweseka wusekulula wakukaluŋalwiji, dichi namba kavulisha anyana kakambuŋami Davidi, niaLevi ankalakelaŋa.

²³Izu daYehova denjili kudi Yeremiya,

²⁴nindi, Ochu chanahoshuwu antu awa, nawu, Yisaka yiyedi yatondeliyi Yehova nayinati dehi, hiwunatoŋojoki mwokuku? Dimu mwadi nakudiwilawu antu ami, mwaka abulaŋa kuyimona cheŋi nawu muza.

²⁵Yehova nahoshi nindi, Neyi chitiyanenu chami chamwaana nawufuku hichakolaku, neyi yami nabuli kutoŋola mwelaŋa mawulu neseki,

²⁶komana ninami nawa nakanata anyana kaYakoba, nikakambuŋami Davidi, kulonda nakabuli kutambula kudi anyanindi akwakuyula anyana kaAbarahama naIsaka naYakoba. Muloŋa ami nakafuntisha antu awu ayili muwukoli, nakayitiyila wushona.