Read MUKANDA WANZAMBI Jeremia 34 Bible Online

Jeremia 34 - MUKANDA WANZAMBI bible

Jeremia 34

¹Izu dakudi Yehova denjili kudi Yeremiya, helili mwanta waku Babiloni Nebukaneza, ninjita yindi yejima, nimawanta ahanu heseki ejima amwovwahililaŋa, ninyuza yejima hiyakulwa naYerusalema, ninanyikala yawu yejima,

²nindi, Yehova Nzambi yaIsarela nahoshi nindi, Yaku wakahoshi namwanta wawaYuda Zedekiya, wakamuleji neyi, Yehova nahoshi nindi, Tiya, mukaliwu nakawuhana kudi mwanta wakuBabiloni, niyena wakawocha nakesi,

³nineyi hiwakapuluka kudi yenaku, akakukwata chalala, akakuhana kudi yena. Mesu eyi akamona mesu amwanta wakuBabiloni, niyena wakahosha naneyi kanwa nakanwa, nineyi wakaya kuBabiloni.

⁴Hela chochu, tiya izu daYehova, eyi mwanta wawaYuda Zedekiya. Yehova nakuteni dehi nindi, Hiwakafwa nampoku yakabaluku;

⁵wakafwa chawunda, chochelelaŋawu ankakulula jeyi anyanta ásambilili, eyi wuchidi kanda, dichi nawa chakakwochelawu eyi. Akakudila nawu, Lelu nkako! Muloŋa ami nahoshi dehi izu idi. Dimu mwanahoshiyi Yehova.

⁶Kaprofwetu Yeremiya hakuhosha mazu ejimawa namwanta wawaYuda Zedekiya muYerusalema,

⁷iku njita yamwanta wakuBabiloni yidi nakulwa naYerusalema ninanyikala yawaYuda yinashaluku yejima, yoyaLakishi naAzeka, muloŋa nyikala yayipaka yasheluku yoyeniyi.

⁸Tiyenu izu daYehova denjili kudi Yeremiya, helili mwanta Zedekiya natiyaloŋani dehi chitiyaŋenu nawantu ejima adiŋi kuYerusalema, chakuyibidika jakulekesha wuduŋu;

⁹izu dakwila nawu antu ejima akayumbuku anduŋu jawu aHeberu amayala, nianduŋu jawu aHeberu awambanda, bayi muntu wakaheta mana kwindi kaYudeya muwuduŋuku.

¹⁰Atulamba ejima niantu ejima atiyaŋeni chitiyaŋenu chakwila nawu akayumbuku anduŋu jawu amayala, nanduŋu jawu awambanda, akabuli kuyiheta cheŋi muwuduŋu, ovwahililumu ayumbiluku.

¹¹Kutwalamu abalumukili cheŋi, hiyakufuntisha cheŋi, anduŋu jawu amayala nawambanda ombiluwu, hiyakuyiŋŋa cheŋi muwuduŋu, ekali cheŋi anduŋu jawu amayala nawambanda.

¹²Dichi izu daYehova hidikufuma kudi Yehova, hidikwinza kudi Yeremiya,

¹³nindi, Yehova Nzambi yaIsarela nahoshi nindi, Ami natiyaŋeni chitiyaŋenu nawankakulula jenu, ifuku dinayifumishili mwituŋa daEjipitu mwitala dawuduŋu,

¹⁴nami, Hakukumishaŋa nyaka yitanu nayiyedi, wejima wenu mwakayumbaŋaku ana kwenu aHeberu anayilandishuwu, anayikalakeli dehi nyaka yitanu nawumu, mwakayumbaŋaku, akafumi kudenu chakubula wuduŋu. Ilaŋa nkakulula jenu hiyatiyililili kudamuku, hela kuteŋelekaku matu awu nehi.

¹⁵Lelu munabalumuki dehi, muneli dehi chaloŋa kumesu ami, chimuneli dehi wejima wenu himukubidika akwenu jakulekesha wuduŋu. Munatiyaloŋani dehi chitiyaŋenu kumesu ami, mwitala datenenawu ijina dami.

¹⁶Enu himukubalumuka nawa cheni, himukutamisha ijina dami, wejima wenu himukufuntisha anduŋu jenu amayala nawambanda imwombili, kulonda eli mwaya nyichima yawu; himukufunta nakuyiŋŋa cheŋi muwuduŋu, kulonda ekali cheŋi anduŋu jenu amayala nawambanda.

¹⁷Dichi Yehova nahoshi nindi, Himunatiyilili kudami mwakubidika, iwu abidiki mana kwindi, iwu abidiki mukwawu jakulekesha wuduŋuku. Yehova nindi, Tiyenu, nukuyibidikenu jakubula kulekesha wuduŋu, wakumona mpoku yakabali, nichipupu, ninzala. Ninami nakayizukumwisha mwahita mawanta aheseki ejima.

¹⁸Antu awa anamotoki chitiyaŋenu chami, anabuli kukoŋa mazu achitiyaŋenu chatiyaŋenuwu kumesu ami, habalwiluwu mwana kaŋombi hakachi, hiyakuhita mukachi, muneli iku mutamba iku mutamba,

¹⁹wowu atulamba twawaYuda, nawatulamba amuYerusalema, niatulala, niatupristu, niantu ejima amwituŋahitili mukachi, muneli mutamba wamwana kaŋombi iku, mutamba wamwana kaŋombi iku,

²⁰nakayihana kudi ayilumbu jawu, nikudi antu akukeŋa kuyijaha. Yibimbi yawu yakekala mbiji yakudya atujila ahaluzwizu nawanyama aheseki.

²¹Mwanta wawaYuda Zedekiya nawatulamba twindi nakayihana kudi ayilumbu jawu, nikudi antu akukeŋa kuyijaha, nikunjita yamwanta wakuBabiloni, anafumi dehi kudenu.

²²Yehova nindi, Tiyenu, nakayileja akafunti cheŋi kumukala wunu. Akalwa nawu, akawutambula, akawocha nakesi. Nyikala yawaYuda nakayibalumuna kwikala yihembi yakadi antu.