Read MUKANDA WANZAMBI Jeremia 35 Bible Online

Jeremia 35 - MUKANDA WANZAMBI bible

Jeremia 35

¹Izu dakudi Yehova denjilikudi Yeremiya mumafuku aYehovakimi mwana kaYosiya, mwanta wawaYuda,

²nindi, Yaku kumutaŋa wawakwaRekabi, wakahoshi nawu, wakayitwali mwitala daYehova, wakayiŋŋi mukapeka kamu, wakayinki vinyu anwi.

³Hinukwila Yazaniya mwana kaYeremiya, Yeremiya mwana kaHabaziniya, niana kwindi, nianyanindi amayala ejima, nimutaŋa wawakwaRekabi wejima,

⁴hinukuyitwala mwitala daYehova, mukapeka kawanyana kamwana kaIŋidaliya Hanani, muntu waNzambi, kapeka kadikuma nakapeka kawatulamba, kadiŋi hewulu dakapeka kamwana kaShalumi Maseya, mukwakuhemba kuchisu.

⁵Hinukutulila anyana akumutaŋa wawakwaRekabi yeŋa yakunama yenzala vinyu, nimpasa, hinukuyila nami, Nwenu vinyu.

⁶Nawu, Hitwanwaŋa vinyuku. Muloŋa nkakulula yetu Yonadabi mwana kaRekabi watulejeli nindi, Bayi munwaŋa vinyuku, hela enu, hela anyanenu, chahaya nyaka.

⁷Hela kutuŋa itala, hela kutumba mbutu, hela kudima itempa danyivinyu, hela kudiheta, chinjila. Mafuku enu ejima mwakashakamaŋa kwamumatenti hohu, kulonda mwakashakami mafuku amavulu mwituŋa dimunazonkami.

⁸Tunovwahili mwizu dankakulula yetu Yonadabi mwana kaRekabi muyuma yejima yatu hampumwininiyi, yatulekesheli kunwa vinyu mafuku etu ejima, ninetu niaŋodi jetu, nianyanetu amayala, nawambanda;

⁹watulekesheli nikutuŋa matala akushakama. Hitwaheta kwetu hela itempa danyivinyu, hela iha, hela mbutuku.

¹⁰Tunashakami kwetu kwamumatenti, tunovwahili, tuneli mwejima mwatulejeleli nkakulula yetu Yonadabi.

¹¹Ilaŋa chenjiliyi mwanta wakuBabiloni Nebukaneza mwituŋa, hitukwila netu, Twatuyenu kuYerusalema kuchina njita yawaKaladeya nanjita yawaSiriya. Dichi twashakamina kuYerusalema.

¹²Izu daYehova hidikwinza kudi Yeremiya,

¹³nindi, Yehova wamazaza, Nzambi yaIsarela, nahoshi nindi, Yaku, wakayili aYuda niakwakushakama muYerusalema, neyi, Yehova nindi, Kwonti kwenu kuyileja kulonda mutiyilili mazu ami, tahindi?

¹⁴Mazu amwana kaRekabi Yonadabi alejeliyi anyanindi akuyilekesha kunwa vinyu saŋa ayikogelawu, nilelu hiyanwaŋaku, ovwahilaŋa mwayilejeluwu kudi nkakulula yawu; hakwila ami nahoshi nenu chakumenekaŋa budidi nakuhosha, enu kwenu kuntiyililaŋa nehi.

¹⁵Ami nayitemeshelelaŋa ambuŋami atuprofwetu ejima, chakumenekaŋa budidi nakuyitemeshela, nakwila nami, Funtenu munjila jenu jatama wejima wenu, i wahishenu mumwelaŋa, bayi mulondelaŋa akishi nakuyipeshaku, kulonda mwakashakami mwituŋa dinayinki ninenu niankakulula jenu. Ilaŋa enu kutegelekaku itu, hela kuntiyilila nehi.

¹⁶Ichi chaneluwu anyana kamwana kaRekabi Yonadabi, anakoŋi mwaya kuleja kwayilejeluwu kudi nkakulula yawu, hakwila antu awa kuntiyililami nehi,

¹⁷dichi Yehova Nzambi wamazaza, Nzambi yaIsarela, nahoshi nindi, Tiyenu, ami nakayiletela aYuda niakwakushakama muYerusalema kutama kwejima kunayiteneni. Muloŋa ami nahoshi nawu, wena kutiyilila nehi. Nayitambiki, wena kwitiya nehi.

¹⁸Yeremiya hakwila akwamutaŋa waRekabi nindi, Yehova wamazaza, Nzambi yaIsarela, nahoshi nindi, Chimunovwahili mwayilejeliyi nkakulula yenu Yonadabi, himukuhemba nikuleja kwindi kwejima, himukwila mwejima mwayilejeliyi,

¹⁹dichi Yehova wamazaza, Nzambi yaIsarela, nahoshi nindi, Mwana kaRekabi Yonadabi hamba kabula muntu wakwimana kumesu amuku haya nyaka.