Read MUKANDA WANZAMBI Jeremia 36 Bible Online

Jeremia 36 - MUKANDA WANZAMBI bible

Jeremia 36

¹Tiyenu izu dakudi Yehova denjili kudi Yeremiya, mumwaka wamuchiwana waYehoyakimi mwana kaYosiya, mwanta wawaYuda,

²nindi, Nonaku mukanda wakuvuŋa, wusonekumu mazu ejima inahoshi neyi akuzuwila Isarela naYuda ninyuza yejima, kufumisha kwifuku dinatachikili kuhosha neyi, kwokumafuku aYosiya, ndo nikwifuku dalelu.

³Wamba kela mutaŋa waYuda wakatiya kutama kwejima kunidi nakuyifuukwila kuyikoŋa, kulonda wejima wawu akafunti munjila jawu jatama, kulonda nakayanakeni nikuluwa kwawu ninshidi yawu.

⁴Yeremiya hakutambika mwana kaNeriya Baruki, Baruki hakusoneka mumukanda wakuvuŋa mazu aYehova ejima ahosheliyi naYeremiya, chakufuma mukanwa kaYeremiya.

⁵Yeremiya hakumuleja Baruki, nindi, Ami anaŋenzeleli mwitala. Hinatweshi kuya mwitala daYehovaku.

⁶Dichi yaku eyi, wutaŋi mazu aYehova kumatu awantu, mwitala daYehova hefuku dakujiŋa nanzala, mumukanda wakuvuŋa iwunasoneki chakufuma mukanwa kami. Wakayitaŋi nawa kumatu awaYuda ejima akufumafuma munyikala yawu.

⁷Wamba kela akadumba kumesu aYehova nakulembelela, akafunti munjila jawu jatama wejima wawu; muloŋa nikuzuwa, nikulendumuka kwanateneniyi Yehova antu awa kunatohi.

⁸Mwana kaNeriya Baruki welili mwamulejeli kaprofwetu Yeremiya mwejima, wataŋili mazu aYehova mumukanda mwitala daYehova.

⁹Mumwaka wamuchitanu waYehoyakimi mwana kaYosiya, mwanta wawaYuda, mukakweji kamuchitanu, antu amuYerusalema ejima, niantu ejima afumini munyikala yawaYuda enjili kuYerusalema, hiyakubidika jakujiŋa nanzala kumesu aYehova.

¹⁰Baruki hakutaŋa mumukanda mazu aYeremiya mwitala daYehova, mukapeka kaGemariya mwana kansoneki Shafwani, muchipaŋu chakundundamu, kuwiŋililu wakuchisu chakwitala daYehova chachiha, antu ejima atiyaloŋa.

¹¹Mikaya mwana kaGemariya, Gemariya mwana kaShafwani, chanatiyiyi mumukanda mazu aYehova ejima,

¹²hakukunkumukila mwitala damwanta, hakwijila mukapeka kansoneki; kutala atulamba ejima anashakami mwenomu, iwu nsoneki Elishama, iwu mwana kaShemaya Delaya, iwu mwana kaAkibori Elinatani, iwu mwana kaShafwani Gemariya, iwu mwana kaHananiya Zedekiya, niatulamba amakwawu ejima.

¹³Mikaya hakuyishimwina mazu ejima anatiyiyi, anataŋiyi Baruki kumatu awantu.

¹⁴Atulamba ejima hiyakutemesha Yehudi mwana kaNetaniya, Netaniya mwana kaShelemiya, Shelemiya mwana kaKushi, kudi Baruki, nawu, Owu mukanda wakuvuŋa iwunataŋi kumatu awantu wushi kuchikasa cheyi, winzi kunu. Dichi mwana kaNeriya Baruki washili mukanda wakuvuŋa kuchikasa chindi hakuya kudi wena.

¹⁵Hiyakumwila nawu, Shakamaku mwani, wututaŋiluwu. Baruki hakuyitaŋilawu.

¹⁶Cheliluwu anatiyi dehi mazu ejima, hiyakuditalatala chawoma hohu, hiyakumwila Baruki nawu, Chalala tukumuleja mwanta mazu awa ejima.

¹⁷Hiyakumwihula Baruki nawu, Atuleji mwani, awa mazu akukanwa kindi ejimawa wayisonekeli ŋahi?

¹⁸Baruki hakuyakula nindi, Wanteneneni mazu awa ejima nakanwa kindi, ami hinukusoneka nawulombu mumukandowu.

¹⁹Dichi atulamba hiyakumwila Baruki, nawu, Yenu mwakabatami nineyi niYeremiya, bayi muntu eluka kumukwikalaku.

²⁰Hiyakwijila muchipaŋu mwadiŋiyi mwanta, ilaŋa mukanda awutentekeli mukapeka kansoneki Elishama. Hiyakumushimwina mwanta mazu ejimawa.

²¹Dichi mwanta hakutemesha Yehudi akaleti owu mukanda. Hakuwunona mukapeka kansoneki Elishama. Yehudi hakumutaŋila mwanta, niatulamba ejima emeni kudi mwanta.

²²Mwanta wadiŋi washakama mwitala damwaka wachishika, mukakweji kamuchitanu nachiwana, kumesu indi kwadiŋi mbwambula yidi nakesi.

²³Cheliliyi Yehudi nataŋi dehi yipapilu kwiji yisatu indi kwiji yiwana, mwanta hakuwuketola nampoku, hakuwunatila mukesi kadiŋi mumbwambula, nichiwanoŋeli mukanda wejima to-o nakesi kadiŋi mumbwambula.

²⁴Hela mwanta hela ambuŋindi atiyili mazu ejimawa hosi niwumu watiyili woma, hela kutabula mahininduku.

²⁵Ilaŋa Elinatani naDelaya naGemariya amulembeleleli mwanta nawu, Bayi wocha mukandowuku. Yena kwonti kwindi kutiya mwahosheluwu.

²⁶Mwanta hakuleja Yerameyeli mwana kayena mwanta, nimwana kaAziriyeli Seraya, nimwana kaAbideyeli Shelamiya, nindi, Kakwatenu nsoneki Baruki nakaprofwetu Yeremiya. Ilaŋa Yehova wayiswekeli.

²⁷Heliliyi mwanta nochi dehi mukanda nimazu akukanwa kaYeremiya asonekeliyi Baruki, izu daYehova hidikwinza kudi Yeremiya,

²⁸nindi, Nonaku mukanda wakuvuŋa wukwawu, wusonekumu mazu akusambila ejima adiŋi mumukanda wakusambila, wanochiyi mwanta wawaYuda Yehoyakimi.

²⁹Wakamwila mwanta wawaYuda Yehoyakimi, neyi, Yehova nahoshi nindi, Eyi wunochi dehi mukandiwu, hiwukwila neyi, Indi iwu mukanda wakwila neyi, Chalala mwanta wakuBabiloni wakenza nakukisaŋana ituŋidi, wakanoŋeshamu niantu nianyama wunawusonekelidi?

³⁰Dichi Yehova nateni dehi mwanta wawaYuda Yehoyakimi nindi, Hamba kekala namuntu wakushakama hetanda daDavidi dawantaku. Nichibimbi chindi akachinatila hanzi, namwaana chakatiyi nkanza, nawufuku chakatiyi chishika.

³¹Nakamubabesha niyena nianyanindi niambuŋindi nakuluwa kwawu. Nakayiletela niwena, niakwakushakama muYerusalema, niaYuda, kutama kwejima kunayiteneneni, wena kutiyilila nehi.

³²Yeremiya hakutambula mukanda wakuvuŋa wukwawu, hakuwinka nsoneki Baruki, mwana kaNeriya. Yena hakusonekamu chakufuma mukanwa kaYeremiya, mazu ejima amumukanda wocheliyi mwanta wawaYuda Yehoyakimi mukesi. Abombeleluku nawa mazu amavulu adi neyi wenowu.