Read MUKANDA WANZAMBI Jeremia 37 Bible Online

Jeremia 37 - MUKANDA WANZAMBI bible

Jeremia 37

¹Mwana kaYosiya Zedekiya hakushakama muwanta, naswani dehi mwana kaYehoyakimi Koniya, adiishiluwu wanta wamwituŋa daYuda kudi mwanta wakuBabiloni Nebukaneza.

²Hela yena, hela ambuŋindi, hela antu amwituŋa, kutiyilila kumazu aYehova ahosheliyi nakaprofwetu Yeremiya, nehi.

³Mwanta Zedekiya watemesheli mwana kaShelemiya, Yehukali, niZefwaniya mwana kakapristu Maseya, kudi kaprofwetu Yeremiya, nindi, Atulombeluku mwani, kudi Yehova Nzambi yetu.

⁴Henohu Yeremiya wudi nakudendela mukachi kawantu, kanda amushi mukaleyaku.

⁵Henohu njita yaFwaro yafuma dehi muEjipitu. AKaladeya akuchikili Yerusalema hiyakutiya nsaŋu yawu, hiyakujaha chimba chawu chakuYerusalema.

⁶Izu daYehova hidikwinza kudi kaprofwetu Yeremiya,

⁷nindi, Yehova Nzambi yaIsarela nahoshi nindi, Tiyenu chimwakamwila mwanta wawaYuda nayitemeshi kudami nakwihula, nenu, Tiyenu, njita yaFwaro yinenzi nakuyikwashaku yakafunta cheŋi mwituŋa dawu muEjipitu.

⁸AKaladeya akafunta cheŋi kunu, akalwa namukaliwu, akawutambula, akawocha nakesi.

⁹Yehova nahoshi nindi, Bayi mudidimba nenu, AKaladeya chalala akatu fumaku. Hiyakayifumaku.

¹⁰Hela tuhu neyi mwatapa njita yejima yawaKaladeya adi nakulwa nanenu, hikukushala kwampanza hohu, adi kunyamuka mumatenti awu wejima wawu, adi kwocha mukaliwu nakesi.

¹¹Chelili njita yawaKaladeya yinajahi dehi chimba chawu chakuYerusalema, nawomawanjita yaFwarowatiyiluwu,

¹²Yeremiya hakufuma muYerusalema nindi ayi mwituŋa daBenjamini, atambwiluku iseka dindi mukachi kawantu.

¹³Chanashikiyi muchisu chaBenjamini kuwana hikudi mukulumpi wawatulama, ijina dindi Iriya, mwana kaShelemiya, Shelemiya mwana kaHananiya. Hakumukwata kaprofwetu Yeremiya, nindi, Hiwukuya nakudimbukila kudi aKaladeya.

¹⁴Yeremiya nindi, Wunatwambi. Hinidi nakuya nakudimbukila kudi aKaladeyaku. Ilaŋa yena kumutiyilila nehi. Dichi Iriya hakumukwata Yeremiya, hakumutwala kudi atulamba.

¹⁵Atulamba hiyakumuzuwila Yeremiya, hiyakumweta, hiyakumusha mukaleya kamwitala dansoneki Jonatani. Muloŋa adibalumuna dehi kaleya.

¹⁶Helili Yeremiya nenzi dehi mwitala damuwina, nimukapeka kamukachi, Yeremiya nashakami dehi kwenoku mafuku amavulu,

¹⁷mwanta Zedekiya hakutemesha antu nakumuleta. Mwanta hakumwihwila mwitala dindi kumbeŋu, nindi, Kuduhu kadizu kakudi Yehova? Yeremiya nindi, Didi kwoku. Nindi, Eyi akukuhana kudi mwanta wakuBabiloni.

¹⁸Yeremiya nakumwila nawa mwanta Zedekiya nindi, Indi ami nayitamishili hadihi, hela eyi, hela ambugeyi, hela antu awa, mwaka muŋushi mukaleya?

¹⁹Atuprofwetu twenu ayiprofweteli nawu, Mwanta wakuBabiloni hakenza nakulwa nancnu, hela netuŋa iduku, hiyadihi?

²⁰Ichi dinu, eyi nkaka yami mwanta, tiya mwani. Atiyi mwani chinukulemba kumesu eyi. Bayi wunfuntisha cheŋi kwitala dansoneki Jonatanuku, nakenza kafwilaku.

²¹Mwanta Zedekiya hakuyileja antu, hiyakumusha Yeremiya muchipaŋu chaawatulama, hiyakumwinkaŋa dinkendi dimu hefuku hefuku dakufumisha kumukwakwa wawakwakutuŋa mankendi, nichimwamanini mankendi ejima mumukala, Dichi Yeremiya hakushakama muchipaŋu chaawatulama.