Read MUKANDA WANZAMBI Jeremia 38 Bible Online

Jeremia 38 - MUKANDA WANZAMBI bible

Jeremia 38

¹Mwana kaMatani Shefwatiya, nimwana kaPashuri Gedaliya, nimwana kaShelemiya Yukali, nimwana kaMalikiya Pashuri, atiyili mazu ahosheliyi Yeremiya kudi antu ejima,

²nindi, Yehova nahoshi nindi, Muntu wakashala mumukala wunu wakafwa nampoku yakabali, nanzala, nichipupu, ilaŋa wakafumamu nakuya kudi aKaladeya wakahanda, wumi windi wakekala neyi chuma chakupupa kunjita, wakahanda.

³Yehova nahoshi nindi, Chalala mukaliwu akawuhana kudi akwanjita yamwanta wakuBabiloni, wakawutambula.

⁴Atulamba hiyakumwila mwanta, nawu, Muntu iwu amujahi mwani. Muloŋa wudi nakuzeyesha makasa awakwanjita anashali mumukala, nimakasa awantu ejima chadi nakuhoshayi nawu mazu adi chochichi. Muloŋa muntu iwu hadi nakuyikegela awa antu jakumwenaku, wudi nakuyikegela jakuyitamisha.

⁵Mwanta Zedekiya hakuyila nindi, Owu, wudi kumakasenu. Ami mwanta hinatweshi kuyilekesha chumaku.

⁶Hiya kumutwala nakumunata Yeremiya muwina waMalikiya mwana kayena mwanta, wowu wina wadiŋi muchipaŋu chaawatulama. Hiyakumuzelu mwinamu Yeremiya nanyonji. Muwina himwadiŋi mejuku mwadiŋi malowa. Yeremiya hakwijila mumalowa.

⁷KaEtiyopiya Ebedi Meleki, kalala kamwitala damwanta, hakutiya chanamushuwu Yeremiya muwina. Mwanta wadiŋi washakama muchisu chaBenjamini chakumpwembu.

⁸Ebedi Meleki hakwidika mwitala damwanta, hakuhosha namwanta,

⁹nindi, Eyi nkaka yami mwanta, antu awa mwejima mwanamukoŋuwu kaprofwetu Yeremiya ananatiluwu muwina, anakoŋi chatama. Mwenomu mwadiyi keŋa afwilumu nanzala. Muloŋa mumukala himudi nawa mankenduku.

¹⁰Mwanta hakumuleja kaEtiyopiya Ebedi Meleki, nindi, Sendaku amayala makumi asatu adi kunu, wuyi nawu, wakamufumishi kaprofwetu Yeremiya muwina, hohanu hachidiyi kanda afwi.

¹¹Ebedi Meleki hakusenda amayala, hakuya nawu, hakwijila mwitala damwanta, hakuya mwishina detala dakuswekela yuma yalema, hakunonamu yibeli yayikulu, nimahina ataboka taboka, atoka dehi, hakuyizelumwina muwina mwadiŋiyi Yeremiya nanyonji.

¹²KaEtiyopiya Ebedi Meleki hakumwila Yeremiya, nindi, Oyu yibeli yayikulu, ninowu mahina ataboka taboka, atoka dehi, yishi munkwaha kwishina danyonji. Yeremiya ela nichenochu.

¹³Hiyakumukokamu Yeremiya nanyonji, amufumisha nimuwina. Yeremiya hakushakama muchipaŋu chaawatulama.

¹⁴Mwanta Zedekiya hakutemesha antu nakuleta Yeremiya kudi yena muwiŋililu wakwitala daYehova wamuchisatu. Mwanta hakumwila Yeremiya nindi, Nakeŋi nikwihuluhu kachuma, bayi wunjindaku.

¹⁵Yeremiya hakumwila Zedekiya nindi, Neyi nukukulejamu, hiwukunjahaku? Hela neyinukukulejama ana, hiwukuntiyililaku.

¹⁶Zedekiya hakuhoshana Yeremiya kumbeŋu, mazu akusanyika, nindi, Chahandayi Yehova watwilili wumi iwu kwaamu, hinukukujaha kwamuku, hinakakuhana kudi antu anakeŋi kukujahaku.

¹⁷Yeremiya hakumwila Zedekiya nindi, Yehova, Nzambi wamazaza, Nzambi yaIsarela, nahoshi nindi, Neyi wukufuma mumukala, hiwukuya kudi atulamba twamwanta wakuBabiloni, wumi weyi wakahanda, nimukaliwu hiyakawocha nakesuku. Wakahanda nineyi nimutaŋa weyi.

¹⁸Ilaŋa neyi wakabula kufuma mumukala nakuya kudi atulamba twamwanta wakuBabiloni, mukaliwu akawuhana kudi aKaladeya, akawocha nakesi, eyi hiwakapuluka kudiwenaku.

¹⁹Mwanta Zedekiya hakumwila Yeremiya nindi, Ami natiyi woma wawaYudeya anadimbukili kudi aKaladeya, nami akenza kanhana kudi wena, akenza kantaŋula.

²⁰Kuchinka Yeremiya nindi, Hiyakakuhanaku. Nalembi mwani, ovwahilaku izu daYehova dinidi nakuhosha neyi. Wila chenochu chakakuwahila, wumi weyi wakahanda.

²¹Neyi wakaleka kufuma mumukala, tiya izu dananlejiyi Yehova,

²²nindi, Tiyenu, ambanda ejima anashali mwitala damwanta wawaYuda akayiidishilawu atulamba twamwanta wakuBabiloni. Wena ambanda akakwila nawu, Amabwambu jeyi wadikundilaŋa nawu anakudimbi dehi, anakufwomoni. Lelu nyendu yeyi yineŋili dehi mumalowa iyi, anakulutaleli dehi.

²³Niaŋodi jeyi, nianyaneyi akayiidishilawu aKaladeya. Hiwakapuluka kudi wenaku, mwanta wakuBabiloni wakakukwata. Eyi wakakojeja mukaliwu kuwocha nakesi.

²⁴Zedekiya hakumwila Yeremiya nindi, Awa mazu bayi ayitiya kudi muntuku, nineyi hiwakafwaku.

²⁵Neyi atulamba akatiya nawu nadiŋi nakuhosha naneyi, neyi akenza kudeyi nakukwila nawu, Atulejuku mwani yiwunahoshi namwanta, bayi wutujindaku, ninetu hitukukujahaku, atuleji nawa niyahoshayi mwanta naneyi;

²⁶eyi wakayila neyi, Nadiŋi nakumu kumbelela mwanta nami abuli kunfuntisha kwitala daJonatani, kuchina kufwilaku.

²⁷Atulamba ejima hiyakwinza kudi Yeremiya nakumwihula. Yena hakuyileja mwaya mazu ejimawa amulejelu wukudi mwanta. Aleka nikuhosha nindi. Muloŋa nsaŋu hiyatiyakenuku.

²⁸Yeremiya ashakama nimuchipaŋu chaawatulama ndo nikwifuku datambwiluwu Yerusalema.