Read MUKANDA WANZAMBI Jeremia 39 Bible Online

Jeremia 39 - MUKANDA WANZAMBI bible

Jeremia 39

¹Chelili anatambuli dehi Yerusalema, mumwaka wamuchitanunachiwana wamwanta wawaYuda Zedekiya, mukakweji kekumi, mwanta wakuBabiloni Nebukaneza ninjita yindi yejima enjili nakulwa naYerusalema, awukuchikili.

²Mumwaka waZedekiya wekumi nawumu, mukakweji kamuchiwana, mwifuku dakakweji damu chitanu nachiwana, alokweli mpwembu yamukala.

³Atulamba twamwanta wakuBabiloni ejima enjili, hiyakushakama muchisu champwembu chahakachi, iwu Nerigali Sharezeri, iwu Samigari Nebo, iwu Saresekimi, iwu Rabi Sarisi, iwu Nerigali Sharezeri, iwu Rabi Maŋi, hamu nawatulamba twamwanta wakuBabiloni anashaluku ejima.

⁴Amwanta wawaYuda Zedekiya nawakwanjita ejima chanayimonuwu hiyakutemuka, hiyakufuma mumukala nawufuku, hiyakuyila njila yetempada mwanta kuchisu chekala hakachi kampwembu jiyedi, hakwidikila kunjila yakuchana.

⁵Ilaŋa njita yawaKaladeya yayihapili, amuweni Zedekiya muyana yakuYeriku. Chamu kwatiluwu hiyakumutwala nakumukandwisha kudi mwanta wakuBabiloni Nebukaneza kuRibila mwituŋa daHamati, hakumusompesha.

⁶Mwanta wakuBabiloni hakujahila anyana kaZedekiya kumesu indi kuRibila. Mwanta wakuBabiloni hakujaha nawa niayilolu awaYuda ejima.

⁷Hakumulokola Zedekiya mesu, hakumukasa mumaleŋa, kulonda amutwali kuBabiloni.

⁸AKaladeya hiyakwocha itala damwanta, nimetala awantu nakesi, hiyakuhumona mpwembu jakuYerusalema.

⁹Mukulumpi wawatulama Nebuzaradani watweli kuBabiloni muwukoliantu anashali, ashelasheli muYerusalema, niawombolokeli nawa, wowuenjili nakudimbukila kudi yena, niantu amakwawu anashali ashelasheli.

¹⁰Hakwila atuzweŋa ahadi antu, abulili yuma, mukulumpi wawatulama Nebuzaradani wayishiyili mwituŋa daYuda, wayinkeli matempa anyivinyunimaha dodena ifuku odu.

¹¹Mwanta wakuBabiloni Nebukaneza hakushiikamu awakulumpi wawatulama Nebuzaradani nsaŋu jaYeremiya,

¹²nindi, Wumutwalaŋa, wakamutalaŋa chachiwahi, bayi wakamwilaŋa chatamaku, chiŋa wakamwilaŋa mwejima mwakahoshayi naneyi.

¹³Mukulumpi wawatulama Nebuzaradani hakutemesha antu, niNebushazibani, niRabi Sarisi, niNerigali Sharezeri, niRabi Maŋi, niantu alema amwanta wakuBabiloni ejima nawa,

¹⁴hiyakutemesha antu, hiyakufumisha Yeremiya muchipaŋu chaawatulama, hiyakumuhana kudi Gedaliya mwana kaAhikami, Ahika mimwana kaShafwani, kulonda akamutwali kumukala wawu. Ashakamani hamu nawantu.

¹⁵Izu daYehova denjili kudi Yeremiya hadiŋiyi achidi amwenzela muchipaŋu chaawatulama,

¹⁶nindi, Yaku wakahoshi nakaEtiyopiya Ebedi Meleki, neyi, Yehova wamazaza, Nzambi yaIsarela, nahoshi nindi, Tiya, nakashikija mazu ami hamukaliwu kulonda henzi yatama, bayi yayiwahuku; akayikoŋela kumesu eyi ifuku odu.

¹⁷Yehova nindi, Hakwila eyi nakakupulwishahefuku odu. Hiyakakuhana kudi antu iwunatiyi womaku.

¹⁸Muloŋa ami chalala nakakwamwina, hiwakadimbukila kumpoku yakabaluku; wumi weyi wakekala neyi chuma chakupupa kunjita, nanochu chiwunankuhweleli. Dimu mwanahoshiyi Yehova.