Read MUKANDA WANZAMBI Jeremia 41 Bible Online

Jeremia 41 - MUKANDA WANZAMBI bible

Jeremia 41

¹Mukakweji kamuchitanu nachiyedi Ishimeli mwana kaNetaniya, Netaniya mwana kaElishama, wakwivumu dawanta, wahadi atulambatwa mwanta, nawantu ikumi, hiyakwinza kudi mwana kaAhikami Gedaliya kuMizipa. Kwenoku kuMizipa hiyakudiila hamu yakudya.

²Mwana kaNetaniya Ishimeli niantu ikumi adiŋiyi nawu, hiya kunya muka hiya kumutaŋa Gedaliya mwana kaAhikami, Ahikami mwana kaShafwani, nampoku yakabali, hiyakumujaha, muntu akunjikiluwu kudi mwanta wakuBabiloni kwikala nguvulu yetuŋa.

³Ishimeli hakujaha nawa aYudeya ejima adiŋi nayena, adiŋi naGedaliya kuMizipa, niaKaladeya adiŋa kwenoku, wowu akwanjita.

⁴Ifuku damu chiyedi nanaha hajahiliyi Gedaliya, kwosi muntu nachilukuku,

⁵hikukwinza antu akufuma kuShekemi, nikuShilo, nikuSamariya, amayala makumi atanu nasatu, m awevu awu akutewula, mahinawu akutabula, aditaŋola dehi, kumakasawu anasendi nyilambu nilibona, nawu atwalikwitala daYehova.

⁶Mwana kaNetaniya Ishimeli hakufuma kuMizipaha kuya nakuyikinkilila, iku wudi nakuya, iku wudi nakudila. Chayibulakeniyi hakuyila nindi, Twatuyenu kudi mwana kaAhikami Gedaliya.

⁷Cheliluwu anashiki dehi mukachi kamukala mwana kaNetaniya Ishimeliha kuyi jaha, hakuyinatila muwina, niyena niantu indi adiŋiyi nawu.

⁸Mukachi kawu mwamwekeni amayala ikumi amwilili Ishimeli nawu, Bayi wutujahaku, muloŋa twasweka yuma yetu mumpata, nitidiku, nibali, nimanji, niwuchi. Hakuleka, kuyijaha hamu nawana kwawu nehi.

⁹Wena winowu wanatililiyi Ishimeli yibimbi yejima yamayala ajahiliyi nansaŋu yaGedaliya, diwu wapundiliyi mwanta Asa nawoma watiyiliyi mwanta wawaIsarela Bayasha; mwana kaNetaniya Ishimeli hakuwinzesha antu ajahiliyi.

¹⁰Antu ejima asheluku adiŋi muMizipa, nianyana kamwanta awambanda, niantu ejima asheli muMizipa enkeluwu mwana kaAhikami Gedaliya kudi mukulumpi wawatulama Nebuzaradani, Ishimeli hakuyitwala muwukoli. Mwana kaNetaniya Ishimeli hakuyitwala muwukoli, nindi aketuli ayi kudi anyana kaAmoni.

¹¹AYohanani mwana kaKareyana wawakulumpi ayendu adiŋiyi nawu ejima, chatiyiluwu kutama kwakoŋeliyi mwana kaNetaniya Ishimeli kwejima,

¹²hiyakutambika amayala ejima, hiyakuya nakulwa namwana kaNetaniya Ishimeli, hiyakumuwana kwijiyadeneni dekala muGibeyoni.

¹³Dichi cheliluwu antu ejima adiŋi naIshimeli anamoni dehi mwana kaKareya Yohanani niakulumpi ayendu adiniyi nawu ejima, hiyakutiya kuwaha.

¹⁴Antu ejima afumishiliyi Ishimeli kuMizipa adiŋi nakutwalayi muwukoli hiyakubalumuka, hiya kufunta, hiyakuya kudi mwana kaKareya Yohanani.

¹⁵Ilaŋa mwana kaNetaniya Ishimeli hakupuluka kudi Yohanani namayala atanu nasatu, hiyakuya kudi anyana kaAmoni.

¹⁶Mwana kaKareya Yohanani niakulumpi ayendu adiŋayi nawu ejimahiya kuya nawantu ejima asheluhu, wowu akuMizipa afuntishiliyi mwayi laŋa wuna mwana kaNetaniya Ishimeli, heliliyi najahi dehi mwana kaAhikami Gedaliya, wowu akwanjita, niambanda, nianyana, niatulala afuntishiliyi cheŋi kuGibeyoni kwayiluwu;

¹⁷hiya kufumaku hiyakuya nakushakama muchilombu chaChimihami chekala kwakwihi naBetelemi, kulonda ayinakwinila kuEjipitu, nansaŋu yawaKaladeya;

¹⁸muloŋa anayitiyi dehi woma muloŋa mwana kaNetaniya Ishimeli najahi dehi mwana kaAhikami Gedaliya akunjikiluwu kudi mwanta wakuBabiloni kwikala nguvulu yetuŋa.