Read MUKANDA WANZAMBI Jeremia 43 Bible Online

Jeremia 43 - MUKANDA WANZAMBI bible

Jeremia 43

¹Cheliliyi Yeremiya nakumishi dehi kuhosha kudi antu ejima mazu aYehova Nzambi yawu ejima amutemesheleliyi Yehova Nzambi yawu kuhoshe kudi wena, wowu mazu ejimawa,

²mwana kaHoshaya Azariya, namwana kaKareya Yohanani, namayala adinka wanta ejima, hiyakuhosha chakumwila Yeremiya nawu, Wunatwambi. Yehova Nzambi yetu hidiyi nakutemeshi wili neyi, Bayi mwakaya nakushakama muEjipituku.

³Mwana kaNeriya Baruki diyi nakusaŋumuni wutuzuwili, kulonda kutuhana kudi aKaladeya akatuja haŋa, akatutwali kuBabiloni muwukoli.

⁴Dichi mwana kaKareya Yohanani nawawakulumpi ayendu ejima, nawantu ejima, hiyovwahilili izu daYehova ashakami mwituŋa daYudaku.

⁵Ilaŋa mwana kaKareya Yohanani, niakulumpi ayendu ejima atweli aYuda ejima asheluku afunta funtili kunyuza yejima kwayitemwininuwu, nawu ashakami mwituŋa daYuda;

⁶wowu amayala, nawambanda, nawanyana, nawanyana kamwanta awambanda, nawantu ejima ashiyiliyi Nebuzaradani mukulumpi wawatulama kudi Gedaliya mwana kaAhikami, Ahikami mwana kaShafwani, nikaprofwetu Yeremiya, nimwana kaNeriya Baruki,

⁷hiyakuya mwituŋa daEjipitu. Muloŋa wena hiyovwahilili izu daYehovaku. Ashika nikuTapanesi.

⁸Izu daYehova hidi kwinza kudi Yeremiya kuTapanesi,

⁹nindi, Nonaku malola amaneni mumakaseyi, wuyisweki musamendi mumatafwali adi kuwiŋililu wakwitala daFwaro muTapanesi, iku aYuda atalaŋa.

¹⁰Wuyili neyi, Yehova wamazaza, Nzambi yaIsarela, nahoshi nindi, Tiyenu, nakatemesha mazu akutambula kambuŋami Nebukaneza mwanta wakuBabiloni, itanda dindi dawanta nakadisha hamalolawa inasweki; wakalemenahu niitenti dindi dawanta.

¹¹Wakenza nakutapa ituŋa daEjipitu, akwakufwa akafwa, akwakuya muwukoli akaya muwukoli, akwakufwa kumpoku yakabali akafwa kumpoku yakabali.

¹²Nakabutula kesi mumatala awakishi awaEjipitu. Yena wakayocha, wakatwala antu muwukoli. Ituŋa daEjipitu wakadivwala neyi chavwalaŋayi kabiŋa ihina dindi. Wakafumamu naku-mwena.

¹³Wakakotola nawa nituposhi twakupeshela twakuBetishemeshi, wekala mwituŋa daEjipitu. Nimatala awakishi awaEjipitu wakayocha nakesi.