Read MUKANDA WANZAMBI Jeremia 44 Bible Online

Jeremia 44 - MUKANDA WANZAMBI bible

Jeremia 44

¹Izu dakutena aYudeya ejima ashakamini mwituŋa daEjipitu, niashakamini kuMigidoli, nikuTapanesi nikuNofwi, nimwituŋa daPatirosi, denjili kudi. Yeremiya,

²nindi, Yehova wamazaza, Nzambi yaIsarela, nahoshi nindi, Munamoni kutama kwejima kunaleteli Yerusalema, ninyikala yawaYuda yejima. Talenu, lelu aneli dehi kwayihembi, himwashakama antuku,

³muloŋa wakutama kwawu kwakoŋeluwu kwakunvuloka nizuwi, nachina chayiluwu nakwocha insensi, nakupesha akishi abulili kwiluka hela wena, hela enu, hela ankakulula jenu.

⁴Hela chochu, ami nayitemeshelelaŋa ambuŋami atuprofwetu ejima, chakumenekaŋa budidi nakuyitemeshela, nami, Nayilembeli, bayi mwila ichi chishimashima chinabula kukeŋaku.

⁵Ilaŋa wena kutiyilila nehi, hela kuteŋelekaku itu dawu ashiyi kutama kwawu kwakwochela akishi insensi, nehi.

⁶Dihu hafumini kwichila kulendumuka kwami nikuzuwa kwami, hikukubutuka munyikala yawaYuda, nimunyikwakwa yamuYerusalema munashali kwayihembi hohu, munamweni dehi zo-o neyi chimudi lelu idi.

⁷Ichi dinu Yehova, Nzambi wamazaza, Nzambi yaIsarela, nahoshi nindi, Mudi nakukogeladi kutama iku kweneni kwakuditamisha enu aweni, kwakufumisha mukachi kenu niiyala, nimumbanda, nimwana nimukwakwamwa, abuli kwikala muYuda, mushali chakadi muntu,

⁸nanochu chimukunvuloka nizuwi nanyidimu yakumakasenu yakwochela akishi insensi mwituŋa daEjipitu, kumunayi nakushakama. Mwaka mudifumishumu tuhu, mwikali ashigewa, asawuka mukachi kanyuza yejima yaheseki?

⁹Komana munavulameni dehi kutama kwawankakulula jenu, nikutama kwawanyanta awaYuda, nikutama kwawaŋodi jawu, nikutama kwenwenu aweni, nikutama kwawaŋodi jenu kwakogeluwu mwituŋa daEjipitu, nimunyikwakwa yamuYerusalema, tahindi?

¹⁰Nilelu saŋa abuli lawu kudizoza, hela kutiya woma, hela kwenda mwaya nshimbi jami, hela mwaya yidika yami yinayishilili kumesu enu, nikumesu awankakulula jenu.

¹¹Dichi Yehova wamazaza, Nzambi yaIsarela, nindi, Tiyenu, nakayitala mesu akuhila kulonda kuyitamisha, kulonda kufumishahu aYuda ejima.

¹²Nukutambula aYuda anashaluku, anati mesu awu akuya mwituŋa daEjipitu nakushakamaku, wejima wawu akanoŋa zo. Akadimbukila mwituŋa daEjipitu. Akanoŋa nampoku yakabali ninzala. Akafwa nampoku yakabali ninzala, kufumisha kudi wakadi kulema kushika nikudi wasweja kulema. Akekala ashigewa, akuhayama, eshiŋu, asawuka.

¹³Nakayibabesha ashakama mwituŋa daEjipitu neyi chinababeshi Yerusalema nampoku yakabali, nanzala, nachipupu,

¹⁴kulonda aYuda anashaluku, anayi nakushakama mwituŋa daEjipitu, hakabuli kumwekana niwumu wakapuluka hela kushalaku, mwaka akamoni kufunta mwituŋa daYuda, kwashiluwu muchima nawu twakafunta nakushakamaku. Muloŋa kwosi wakafuntaku, chiŋa yowu wakapuluka chakupuluka.

¹⁵Henohu amayala ejima elukili nawu aŋodi jawu adi nakwochela akishi insensi, niambanda ejima emenuku, chipompelu chacheni, kafwampi antu ejima ashakamini muPatirosi mwituŋa daEjipitu, hiyakumwakula Yeremiya,

¹⁶nawu, Izu diwunahoshi nanetu mwijina daYehova, etu kwetu hitukukutiyaku.

¹⁷Mazu ejima anafumi namutunwa twetu akumwochela mwantawamumbanda wamwiwulu insensi, niakumuhuŋunwina nyilambu yakuhuŋununa, mutwelaŋa ninetu, niankakulula jetu, niatulamba twetu, nimunyikala yawaYuda, nimunyikwakwa yamuYerusalema, tukwilamu hohu chalala, muloŋa chitwelilaŋa ochu twamwenaŋa kudya kwakuvulu, twashakaminaŋa chachiwahi, hitwamwenaŋa chuma chatamaku.

¹⁸Ilaŋa kufumisha hitwalekeli kumwochela mwanta wamumbanda wamwiwulu insensi, nikumuhuŋunwina nyilambu yakuhuŋununa, tunabuli yuma yejima, tunanoŋi nampoku yakabali nanzala.

¹⁹Ochu chitwamwochelelaŋa mwanta wamumbanda wamwiwulu insensi, chitwamuhuŋunwinaŋa nyilambu yetu yakuhuŋununa, komana twanamutuŋililaŋa mankendi akumujilokela nachu, twamuhuŋunwinaŋa nyilambu yetu yakuhuŋununa chakadi anfumu jetu, tahindi?

²⁰Yeremiya hakuyakula antu ejima, wowu amayala nawambanda, kafwampi antu ejima amwakwili mwenomu,

²¹nindi, Oyu insensi yimwochelaŋa munyikala yawaYuda, nimunyikwakwa yamuYerusalema, ninenu, niankakulula jenu, nianyanta jenu, niatulamba twenu, niantu amwituŋa, Yehova hayanukiluku? Hiyenjili kumnchima winduku?

²²Mwaka Yehova akaŋanyi kudi wundisha nayatama yimwelilaŋa, nayishimashima yimwakogeli. Dihu hanafumi niituna denu kubalumuka kwayihembi hohu, dakuhayama, deshiŋu, dakadi antu, neyi chididi lelu.

²³Chimunochi insensi, nichimunamuvulumuni Yehova, nichimunabuli kwovwahila izu daYehova, hela kwenda mwaya nshimbi jindi, hela mwaya yidika yindi, hela mwaya wunsahu windi, dichi chimunamoni yuma yatamiyi yimukumona lelu.

²⁴Yeremiya hakuyila cheŋi antu ejima niambanda ejima, nindi, Enu aYuda ejima mudi mwituŋa daEjipitu, tiyenu izu daYehova;

²⁵Yehova wamazaza, Nzambi yaIsarsla, nahoshi nindi, Ninenu, niaŋodi jenu muneli nikuhosha natunwa twenu, nikukoŋamu namakasenu, nenu, Chalala hohu twakakoŋa mutwadishiilili mwakumwochela mwanta wamumbanda wamwiwulu insensi, nimwakumuhuŋunwina nyilambu yetu yakuhuŋununa. Komana koleshenu mumwadishiilili, mukoŋi mumwadishiilili.

²⁶Dichi dinu enu aYuda ejima mwashakama mwituŋa daEjipitu, tiyenu izu daYehova. Yehova nindi, Tiyenu, ami nasanyiki dehi ijina dami deneni, nami, Mwahita ituŋa daEjipitu dejima, ijina dami dakutena nawu, Chahandayi Mwanta Yehova kwaamu; hiyakuditena cheŋi mukanwa kakaYuda niwumuku.

²⁷Tiyenu, nakayiimena kwimana kwakuyitamisha, bayi kwakuyiwahishaku. NiaYuda ejima adi mwituŋa daEjipitu akanoŋa nampoku yakabali nanzala, nichakamanawu to-o.

²⁸Antu akapuluka kumpoku yakabali akafuma mwituŋa daEjipitu, akafunta cheŋi mwituŋa daYuda, akekala antesha hohu. NiaYuda anashali ejima, anayi mwituŋa daEjipitu nakushakamaku, akeluka izu dakakola danyi, dami tahindi dawena?

²⁹Yehova nindi, Kubabesha kunakayibabesha mwenamunu dichinjikijilu chenu, chimwakeluka nachu nenu chalala mazu ami akayikolela chakuyitamisha.

³⁰Yehova nindi, Tiyenu, mwanta wakuEjipitu Fwaro Hofwira nakamuhana kudi ayilumbu jindi, nikudi antu anakeŋi kumujaha, neyi chinaheni mwanta wawaYuda Zedekiya kudi mwanta wakuBabiloni Nebukaneza, yowu chilumbu chindi wakeŋa eli kumujaha.