Read MUKANDA WANZAMBI Jeremia 46 Bible Online

Jeremia 46 - MUKANDA WANZAMBI bible

Jeremia 46

¹Izu daYehova denjili kudi kaprofwetu Yeremiya dakutena nyuza.

²DaEjipitu. Dakutena njita yamwanta wakuEjipitu Fwaro Neko yadiŋi kukaloŋa Yufurati, muKarikemishi atapiliyi mwanta wakuKushi Babiloni Nebukaneza mumwaka wamuchiwana waYehoyakimi mwana kaYosiya, mwanta wawaYuda.

³Nindi, Loŋeshenu ninkebu janyanya ninkebu jamaneni, mukundami kwakwihi nanjita,

⁴kasakasenu tuwalu, mukandamuhu enu akwakwendela hatuwalu, imanenu iwu nahindi, iwu nahindi, namatepenu ayikuŋu. Kosakosenu mayoŋa, vwalenu yikovwelu yatumaleŋi.

⁵Ami namwenidi chumichi? Anahayami hiyakufuntafunta hanyima. Ayilobu jawu kotu-kotu, anatemuki lufuchi nikutala hanyima nehi. Mutentu niniku niniku. Dimu mwanahoshiyi Yehova.

⁶Asweja lufuchi bayi atemukaku. Chilobu bayi apulukaku. Kukabeta kakuchimunswa, kukaloŋa Yufurati, anahukani, anadimbuki.

⁷Yeniwu hinyi wudi nakunana neyi Nile, wukweti meji akubenkaŋila neyi tuloŋa?

⁸Ejipitu hakunana neyi Nile, meji indi hiyakubenkaŋila neyi tuloŋa. Nindi, Nukunyamuka, nukujika iseki wi-i. Nukujilumuna mukala niantu ashakamamu.

⁹Enu tuwalu, nyamukenu. Enu makálu, kindenu, ayilobu ediki. NiKushi, niPuti, akwataŋa kunkebu. NiaLudi, akwataŋa kuwuta wamukunji, awevulaŋa.

¹⁰Muloŋa hiifuku daMwanta Yehova wamazaza, hiifuku dakutenda, kulonda akaditendi hadi akwankunyi nindi. Mpoku yakabali yakadya, yakekuta, yakanwa mashi awu nimpwila ngwa, muloŋa Mwanta, Yehova wamazaza, wakaketula chimuna kwituŋa dakuchimunswa kukaloŋa Yufurati.

¹¹Eyi mwana kaEjipitu wamujiki, nyamukaku wuyi muGileyadi, wakatambwiluku yitumbu. Wudi nakukabakana tuhu nakudikwita yitumbu yeŋi nayeŋi, hikudi kukúukaku.

¹²Nyuza yinatiyi dehi nsaŋu yansonyi yeyi, iseki dejima dawanina dehi kwanyiteti yeyi hohu. Muloŋa chilobu nadimbukili hadi chilobu nindi, mwayedi wawu anadimbukili hamu.

¹³Izu dahosheliyi Yehova nakaprofwetu Yeremiya, dakutena chakenzayi mwanta wakuBabiloni Nebukaneza nakutapa ituŋa daEjipitu.

¹⁴Nindi, Shimunenu muEjipitu, chitiyakeshenu muMigidoli, chitiyakeshenu muNofwi nimuTapanesi. Ilenu nenu, Imanenu mudiloŋeshi. Muloŋa mpoku yakabali yadya dehi kwi-ndo, eyi mukachi.

¹⁵Antu eyi akwaŋovu anakumpukilidi? Kwimana kwawu nehi, muloŋa Yehova diyi nayihaŋi.

¹⁶Yena nadimbwishi amavulu, eŋa, iwu hakudimbukila hadi mukwawu, iwu hakudimbukila hadi mukwawu. Nawu, Nyamukenu tuyenu cheŋi kudi akwetu, kwituŋa ditwasemukilili, tuchini mpoku yakabali yatukabishaŋa.

¹⁷Abidikili kwenoku nawu, Mwanta wakuEjipitu Fwaro hiipumba tuhu. Mpinji yamufuukwililuwu yinamuhiti dehi.

¹⁸Mwanta nindi, Chochinahandami, nikweti ijina daYehova wamazaza kwaamu, chalala wakenza neyi Tabori mukachi kamapidi, neyi Karameli kukaluŋalwŋi.

¹⁹Eyi mwana wamumbanda washakama muEjipitu, kasakasaku yuma yeyi, wuyi muwukoli, muloŋa Nofwi wakabalumuka kwayihembi hohu, wakasukuma, wakekala wakadi antu.

²⁰Ejipitu hiiyoŋa daŋombi wamukaji wasweja lubanji. Kujilumuka kunafumi kukabeta kakuchimunswa, kwenza dehi.

²¹Antu indi akukamba namali adi mukachi kawu adi neyi gombi jakudiisha, muloŋa niwena anabalumuki dehi, anatemukili dehi kumu, kwimana nehi. Muloŋa ifuku dawu dakumona kukala dinayiwani dehi, yoyi mpinji yakuyihempula.

²²Muswalu windi wudi neyi muswalu wakapela wudi nakwenda. Muloŋa akenda nanjita, akenza nakulwa nindi nayizembi, neyi akwakuchaya nchawa.

²³Yehova nindi, Akatema isaŋa dindi hela dasweja kujika. Muloŋa wena abadika atubola kuvula, kutwesha kuyichinda nehi.

²⁴Mwana kaEjipitu wamumbanda akamutiyisha nsonyi. Akamuhana kudi antu akukabeta kakuchimunswa.

²⁵Yehova wamazaza, Nzambi yaIsarela, nindi, Tiyenu, nakababesha Amoni wakuNo, niFwaro, niEjipitu, niakishi indi, nianyanta jindi; wowu aFwaro nawantu ejima amukuhwelela.

²⁶Nakayihana kudi antu akukeŋa kuyijaha, nikudi Nebukaneza mwanta wakuBabiloni, nikudi ambuŋindi. Nkumininaku antu amba kashakamamu cheŋi neyi chadinuwu hanyaka. Dimu mwanahoshiyi Yehova.

²⁷Hakwila eyi kambuŋami Yakoba, bayi wutiya womaku; eyi Isarela, bayi wakamaku, muloŋa tiya, ami nakakwamwina chakukufumisha kwakulehi, nakaamwina nianyaneyi chakuyifumisha mwituŋa danamwenuwu wukoli. Yakoba wamba kafunta, wamba kashakama chakumwena zo-o, mumesu mwawunda be-te-te-e, niwakumutiyisha woma nehi.

²⁸Yehova nindi, Eyi kambuŋami Yakoba, bayi wutiyaloŋa womaku, muloŋa ami nidi neyi. Muloŋa ami namba kakumisha chikupu nyuza yejima kunakutemuni, hakwila eyi hinamba kakukumisha chikupuku. Ilaŋa nakakubabeshaŋa mwawuŋaji, hinakakuleka nihanti chakadi kukubabeshaku.