Read MUKANDA WANZAMBI Jeremia 48 Bible Online

Jeremia 48 - MUKANDA WANZAMBI bible

Jeremia 48

¹DaMowabi. Yehova wamazaza, Nzambi yaIsarela, nahoshi nindi, Yayo Nebo! Anamubalumuni dehi kwachihembi. Kiriyatayimi anamutiyishi dehi nsonyi, anamutambuli dehi. Misiŋabi anamutiyishi dehi nsonyi, anamuhumoni dehi.

²Hikudi nawa kushimeka Mowabuku. Anamukasili dehi yatama muHeshiboni, nawu, Tuyenu twakamufumishuhu abuli kwikala muza. Eyi Madimeni nineyi nawa akakumwenesha; mpoku yakabali yakakuhaŋa.

³KuHoranayimi kunatiyakani nyiteti, hiyakuyipupa, hiyakuyijilumuna nankashi!

⁴Mowabi anamujilumuni dehi, kudi anyanindi kunatiyakani nyiteti.

⁵Adi nakukandukila kumukandu wakuLuhiti namunzenzcnzi wakudila. Muloŋa kumukandu wakukunkumukila kuHoranayimi anatiyuku kukala kwanyiteti yakujilumuka.

⁶Temukenu mudihandishi mwikali neyi kamusasachi kamwisaŋa.

⁷Muloŋa eyi wakakwachikila muloŋa wakukuhwelela nyidimu yeyeyi aweni, niyuma yeyeyi aweni yalema; Kemoshi wakaya muwukoli, niatupristu twindi niatulamba twindi hamu.

⁸Akwakubuwa akenza hanyikala yejima, kwosi mukala niwumu wakapulukaku. Nichinekineki nawa chakakisika, nichana akachikisaŋana mwomwanahoshiyi Yehova.

⁹Mwinkenu Mowabi mpuula kulonda amoni jakutúuka ayi; nyikala yindi yakabalumuka yihembi yakadi antu akushakamamu.

¹⁰Muntu wukukoŋa mudimu waYehova namaleŋu, ekali washigewa, wukulekesha mpoku yindi yakabali kumashi, ekali washigewa nawa.

¹¹Mowabi kufumisha kuwansi windi nashakami kwindi mumesu mwawunda be-te-te-e neyi walwa wunateeli hanchiba jawu, kumuhuŋununa afuma nswaha yimu aya nswaha yikwawu nehi, hela kuya muwukoli nehi. Dichi wuchidi nalumweŋumweŋu lwindi, niivumba dindi kubalumuka nehi.

¹²Dichi Yehova nindi, Tiyenu, kwakenza mafuku inakatemesha antu akamutegeleka kulonda amumwaŋamwaŋi, akamanisha yidi munswaha jindi, akafumpa ninsaba jawu pwashi-pwashi.

¹³Mowabi wakatiya Kemoshinsonyi, neyi chatiyiluwu akwamutaŋa waIsarela chikuhwelela chawu Beteli nsonyi.

¹⁴Indi enu mudi nakuhosha ŋahi nenu, Tuyayilobu, tuyamayala aŋovu jakwasa njita.

¹⁵Mowabi wela dehi kwayihembi, akandukila dehi munyikala yawu, anyikwenzi jawu akutonda chakutonda anakunkumuki dehi kwakuyŋahila. Dimu mwanahoshiyi Mwanta wukweti ijina dindiYehova wamazaza.

¹⁶Kukala kwaMowabi kudi kwakwihi, keŋa kushiki, ikabi dindi hidikunyakala lufuchi.

¹⁷Enu ejima mudi nindi kwakwihi kwi-ndo, ninenu ejima mweluka ijina dindi, dihuŋishenu kunyitu nansaŋuyindi; ilenu nenu, Nkiinyi yakola O chiyinakotoki, oyi mbwechi yadiŋi Okuwaha.

¹⁸Eyi mwana wamumbanda washakama muDiboni, shiyaku kulema kweyi, wukunkumuki, wushakami nampwila; muloŋa mukwakubuwa Mowabi nakuwani dehi, nakisaŋani dehi yipaka yeyi yiwadikaŋila.

¹⁹Eyi washakama muAroweli, imanaku kunjila wutalatali; ihulaku amayala adi nakutemuka, niambanda adi nakupuluka, neyi, Kunasoŋidi?

²⁰Mowabi anamutiyishi nsonyi, nakwati dehi chikasa kukanwa. Kalokenu nyiteti yakudila. Shimunenu muArinoni nenu, Mowabi wela dehi kwayihembi hohu.

²¹Kusompa kwawana dehi ituŋa dachana; kwawana dehi niHoloni, niYahaza, niMefwayata;

²²niDiboni, niNebo, niBeti Dibilatayimi;

²³niKiriyata yimi, niBeti Gamuli, niBeti Meyoni;

²⁴niKeriyoti, niBozira, ninyikala yamwituŋa daMowabi yejima, hela yakwakulehi hela yakwakwihi.

²⁵Luseŋu lwaMowabi aluketula dehi ngwa, chikasa chindi chinakotoki. Dimu mwanahoshiyi Yehova.

²⁶Musheteshenu, muloŋa yena waditohesheli chakudikaŋa naYehova. Mowabi wakaalaŋana mumasanjilindi, akamuyiŋila niyena.

²⁷AIsarela hiyeyi wadiŋi nakuyiyiŋila ku? Hiyayiweni mukachi kawamakombuku? Chejima chiwayitenaŋa wayilembulaŋa nanamutu weyi.

²⁸Enu mwashakama muMowabi, fumenu munyikala, mushakami mwilola; mwikali neyi kambolu katuŋaŋa kasasa kindi mumbavu yawina kuwiŋililu.

²⁹Tunatiyi dehi wanta wadinkayi Mowabi, muloŋa yena wasweja kudinka wanta. O chadimujolayi, nikudinka wanta, nikudi-vuna, nikudilemesha mumuchima windi.

³⁰Yehova nindi, Neluka dehi ndombu yindi, yamukunkulwayi tuhu kwayu. Kudisama kwindi hikwakoŋaŋa chumaku.

³¹Dichi nukukaloka nyiteti nansaŋu yaMowabi, nukuyibila aMowabi ejima. Nukudishona nansaŋu jawantu amuKiriheresi.

³²Eyi muvinyu wakuSibima nukukudila chakubadika kudila kwaYazeri; nyitayi yeyi yinamotoki kaluŋalwiji, yinashiki nikukaluŋalwiji kakuYazeri. Akwakubuwa anazemukili nyikabu yeyi yahankanza, ninyikabu yeyi yavinyu.

³³Nikutiya kuwaha nikuzaŋajala akufumisha dehi mwiha dasoŋaŋa nyikabu nimwituŋa daMowabi. Kuwukamwinu wavinyu naketwishuku dehi vinyu. Kwosi wakadatola vinyu nakudikuwaku. Kudikuwa hikwakekala nawa kudikuwaku.

³⁴Nyiteti yakuHeshiboni yinatiyakani nikuEleyale, izu dawu dinashiki nikuYahazi nawa, kufumisha kuZowari nikuHorona yimi nawa, nikuEgilati Shelishiya. Muloŋa kumeji akuNimirimi kuneli dehi kwayihembi hohu.

³⁵Yehova nindi, MuMowabi nakaketwishamu akwakulambula hayinaŋanaŋa, niakwakwochela akishi awu insensi.

³⁶Dichi muchima wami wamwimbilaŋa Mowabi neyi nzenzi jakudila, muchima wami wembilaŋa antu akuKiriheresi neyi nzenzi jakudila, muloŋa yuma yayivulu yaheteliyi yinakisiki dehi.

³⁷Muloŋa nyitu yejima kwatuwewa hohu, mawevu ejima akutetateta, hamakasa ejima hakutapola tapola, hankuma hadi yikeleyi.

³⁸Hamawulu amatala amuMowabi ejima, nimunyikwakwa yekalamu, mudi kwamakumbu hohu kwejima; muloŋa ami namufumpi dehi Mowabi neyi nsaba yabula kukeŋewa. Dimu mwanahoshiyi Yehova.

³⁹Ochiwa humokadehi! Ochadina kukalokawu! Mowabi o chanafutaleliyi nyima nansonyi janatiyiyi! Dichi Mowabi akamuyiŋila, akamukwatila chikasa kukanwa kudi antu ejima adi nindi kwakwihi.

⁴⁰Muloŋa Yehova nahoshi nindi, Tiyenu, wakatúuka neyi mbuulu, wakamutanjikila Mowabi mpuula jindi.

⁴¹Keriyoti amukwata dehi, mpwembu anajibazumwishi dehi, nyichima yawayilobu amuMowabi denodu ifuku yakekala neyi muchima wamumbanda wudi nanyisoŋu yakuvwala.

⁴²Mowabi akamujilumuna, hakekala nawa cheŋi muzaku, nanochu chanaditoheshiyi naYehova.

⁴³Yehova nindi, Eyi washakama muMowabi, niwoma, niikela, nimuhetu yinakuwani.

⁴⁴Muntu wakatemuka woma Mukena wakakulukila mwikela; muntu wakafuma mwikela wakafwa mumuhetu. Muloŋa nakamuletela, eŋa, nakamuletela Mowabi, mwaka wakuyihempula. Dimu mwanahoshiyi Yehova.

⁴⁵Antu atemukili anemani chakadi Ŋovu, muwulelu waHeshiboni. Muloŋa kesi kanafumi muHeshiboni, nimuzuzu wakesi wunafumi mukachi kaSihoni, wunalashi iwombu daMowabi nimashina anyitu yawantu aletaŋa mapumba.

⁴⁶Eyi Mowabi yayo! Antu aKemoshi anazaazi. Muloŋa anyaneyi amayala anayitwali muwukoli, nianyaneyi awambanda anayitwali muwukoli.

⁴⁷Yehova nindi, Hela chochu, hamafuku akukuminina namba kafuntisha cheŋi aMowabi ayili muwukoli. Henahanu dihu hanakumini kusompesha aMowabi.