Read MUKANDA WANZAMBI Jeremia 49 Bible Online

Jeremia 49 - MUKANDA WANZAMBI bible

Jeremia 49

¹Jawanyana kaAmoni. Yehova neliuli nindi, Isarela hakweti anyana amayalaku, tahindi? Hakweti nswanaku, tahindi? Ndochu Malikami naswaninidi mpata yaGadi? Niantu indi anashakaminidi munyikala yayu?

²Dichi Yehova nindi, Tiyenu, kudi nakwinza mafuku inakatiyakeshela Raba wawanyana kaAmoni kabobobu kanjita; wakabalumuka mulumba wamukunkulwayi, anyanindi awambanda akayocha nakesi. Henaha aIsarela akaswana asweni wena. Dimu mwanahoshiyi Yehova.

³Eyi Heshiboni, kalukaku, muloŋa Ayi anamupupi dehi. Enu anyana kaRaba awambanda, bilelenu, vwalenu yikeleyi. Dilenu, temukenu niniku niniku mukachi kayipaka; muloŋa Malikami wakaya muwukoli, niatupristu twindi niatulamba twindi kumu.

⁴Eyi mwana wamumbanda waselumukilaŋa hanyima, wudi nakudisaminadi nayinekineki yeyi? Chinekineki cheyi chinahiti dehi, eyi muntu wakuhweleleli yuma yeyi yalema, neyi kudami kwakenzanyi?

⁵Mwanta Yehova wamazaza nahoshi nindi, Tiya, nakakuletela woma wakufuma kudi antu ejima akunyeŋumuka niniku niniku. Enu akayitemuna wejima wenu chachikupu, hikwakamwekana muntu wakupompesha akwakukimbokaku.

⁶Hela chochu, nkumininaku nakafuntisha cheŋi anyana kaAmoni ayili muwukoli. Dimu mwanahoshiyi Yehova.

⁷JaEdomi. Yehova wamazaza neliuli nindi, MuTemani himudi nawa cheŋi maanaku, tahindi? Kudi akwakudihoŋesha mumuchima jinayikaŋi dehi jakushakama hampùŋa, tahindi? Maana awu anayifumi dehi, tahindi?

⁸Enu mwashakama muDedani, temukenu, funtenu hanyima, iŋilenu mwakunama mushakamumu, muloŋa ami nakamuletela Esawu kukala, yoyi mpinji yinakamuhempula.

⁹Kudeyi neyi kwenza akwakukumuna nyikabu yavinyu, hiyadi kushila akwawu nyikabuku? Neyi kwenza amakombi nawufuku hiyadi kwila kisaŋane-e nichiyadi kuwaninawuku?

¹⁰Ilaŋa mi namuvúuli Esawu, namubutululi hawusonyi windi, hakatwesha kubatamaku. Anyanindi avikisaŋana dehi, niana kwindi, niakwawu atuŋayi nawu, niyomwenindi hadi kwoku.

¹¹Anyaneyi anshona yishiyi, nukuyihemba akahandi. Niantulu wajeyi awambanda ankuhwelelami.

¹²Muloŋa Yehova nahoshi nindi, Tiya, antu abulili kufuukwilawu kunwa mulupasa, chiŋa akanwamu hohu chalala, indi eyi yeyi wakashalahu kubula kukubabesha, tahindi? Hiwakashalahu kubula kukubabeshaku, wakanwamu hohu chalala.

¹³Yehova nindi, Nadisanyiki dehi ami aweni, nami, Bozira wakekala wakuhayamewa, wasawuka, kwachihembi, niishiŋu. Nyikala yawu yejima yakekala kwayihembi yahaya nyaka.

¹⁴Natiyi nsaŋu jakudi Yehova, anatemeshi kaŋanda munyuza, nawu, Dipompeshenu hamu mwinzi nakulwa nindi, munyamukilinjita.

¹⁵Muloŋa tiya, nakukeheshi dehi mukachi kanyuza, wikali wadiwulewa mukachi kawantu.

¹⁶Eyi washakama munyaji yamwilola, wadikaŋila kwiwulu dampidi, atiyawu woma kudi akwenu, wanta wadinka mumuchima weyi wunakudimbi. Hela wakaala chaala cheyi hewulu dadeni neyi mbuulu nakakuhololahu. Dimu mwanahoshiyi Yehova.

¹⁷Edomi wakekala wakuhayamewa. Antu ejima akahitaŋaku akahayama, akayiŋila nansaŋu jayi pupu yawu yejima.

¹⁸Yehova nindi, Chakisagenuwu Sodoma naGomora ninyikala yatuŋili kwakwihi nawena, dichi kwosi muntu wakushakamamu nehi, dichi himwakazonkama hela mwana kamuntuku.

¹⁹Tiya, wakakandukila kuwushakaminu wakola neyi chakandukaŋayi mutupa mwitu daYodana; ilaŋa ami nakamukasumwisha, nakamutemuna akafumi kudi yena. Muntu atondawu diyi nakakunjika kwikala mwanta wawu. Ochu wudi neyi ami hinyi? Wakanholokela muchota hinyi? Kabiŋanyi wakemana kumesu ami?

²⁰Dichi tiyenu mpupa yaYehova yanakwatiliyi Edomi, niyuma yanafuukwiliyi ashakama muTemani, nindi, Chalala akayitulumona nakuyitwala, wowu anyanya ahamukanka wanyikoku. Chalala wakabalumuna hawushakaminu wawu hekali kwayihembi nawena.

²¹Iseki hidikukanka nalushindu lwakudimbokawu. Kudi mbila, yinatiyakani nikuKaluŋalwiji Kachinana.

²²Tiyenu, wakenza chakutúuka neyi mbuulu, wakatanjikila Bozira mpuula jindi; ninyichima yawayilobu amuEdomi denodu ifuku yakekala neyi muchima wamumbanda natiyi nyisoŋu yakuvwala.

²³JaDamakasa. Hamati natiyi nsonyi, niAripadi nawa. Muloŋa anatiyi nsaŋu jatama, hiyakunowa nikunowa. Adi nakululuta neyi kaluŋalwiji kabulapa kumwena.

²⁴Damakasa nazeyi dehi, hakubalumuka nindi atemuki, kuzaala kunamuwani dehi. Niyikatu niyihuŋu yinamuwani dehi, neyi chamonaŋayi mumbanda wudi nakuvwala mwana.

²⁵Mukala washimekelaŋawu, mukala wunadipi nakuzapalela, o chanawulekuwu!

²⁶Dichi anyikwenzi jindi akadimbukila munyikwakwa yindi, niamayala akwanjita ejima akayimwenesha denodu ifuku. Dimu mwanahoshiyi Yehova wamazaza.

²⁷Nakabutula kesi mumpwembu yaDamakasa, kakalasha matala aBenihadadi awanta.

²⁸JaKedari, nŋama wanta amuHazori, mpata yatapiluwu kudi Nebukaneza mwanta wakuBabiloni. Yehova nahoshi nindi, Nyamukenu muyi kuKedari, mupupi antu akumusela.

²⁹Nimatenti awu ninyikanka yawu yanyikoku akatwala. Akasenda nimahinawu akukudeka, niyuma yawu yejima niaŋgawumeli jawu; akayibidika nawu, Mutentu niniku niniku.

³⁰Yehova nindi, Enu mwashakama muHazori, temukenu, yenu nakukimbuka kwakulehi, inilenu mwakunama mushakamumu; muloŋa mwanta wakuBabiloni Nebukaneza nayikwatili mpùŋa, nayifuukwili chuma chatama.

³¹Yehova nindi, Nyamukenu muyi kumuza wabula kumona kukala, washakama chakadi kwakama; hiyakweti kwawu hela yenzelu hela nyikomenuku, ashakama kanka wawu.

³²Yehova nindi, Aŋawumeli jawu akayi buwabuwa, yendu yaŋombi jawu akayipupa. Antu atewula nsuki jawu mumawombu nakayipalapesha mwahita mpcpela jejima. Nakayiletela kukala kwakufuma kumbadi jawu jejima.

³³KuHazori kwakekala kwakushakama nyumbu, mumahembi ahaya nyaka. Kwosi muntu wakashakama kwoku, hela hikwakazonkama hela mwana kamuntuku.

³⁴Izu daYehova dakutena Elami denjili kudi kaprofwetu Yeremiya, hatachikili wanta wamwanta wawaYuda Zedekiya,

³⁵nindi, Yehova wamazaza nahoshi nindi, Nakakotola wuta wamukunji waElami kwatachikili Ŋovu jawu.

³⁶Nakamuletela Elami mpepela jiwana jakufuma kunsa jewulu jiwana, nakayipekumuna mwahita mpepela jejimoju. Hikwakekala muza wakabula kushika antu amuElami akinjikawuku.

³⁷Yehova nindi, AElami nakayikwatisha chikasa kukanwa kumesu awayilumbu jawu, nikumesu awantu akakeŋa kuyijaha. Nakayiletela katama, yowu kuzuwa kwami kwasweja. Nakayilondesha mpoku yakabali nichinakayinoŋesha to-o.

³⁸Yehova nindi, Nakasha itanda dami dawanta muElami, nakajilumunamu nimwanta niatulamba.

³⁹Yehova nindi, Mumafuku akukuminina namba kaleta cheŋi antu amuElami ayili muwukoli.