Read MUKANDA WANZAMBI Jeremia 50 Bible Online

Jeremia 50 - MUKANDA WANZAMBI bible

Jeremia 50

¹Izu dahosheliyi Yehova kukanwa kakaprofwetu Yeremiya dakutena Babiloni, dakutena niituŋa dawaKaladeya.

²Nindi, Shimunenu mukachi kanyuza, tiyakeshenu, imikenu mpandelu. Tiyakeshenu, bayi mujindaku. Nenu, Babiloni anamutambuli dehi, Beli anamutiyishi nsonyi, Merodaki nakwati chikasa kukanwa. Akishi indi anatiyi nsonyi, akishi indi akutuna anakwati chikasa kukanwa.

³Muloŋa kukabeta kakuchimunswa kudi nakwinza muza wakulwa nayena, ituŋa dindi wakadi balu muna kwa yihembihohu, kwosi muntu wakashakama mwokuku. Anatemuki, anayi, niantu nianyama.

⁴Yehova nindi, Hamafuku owu, nihampinji oyu, anyana kaIsarela akenza, niwena nianyana kaYuda hamu, akaya munjila yawu nakudila hohu, akakeŋakeŋa Yehova Nzambi yawu.

⁵Akehula nsaŋu jaZiyona, iku mesu awu anatali kwoku, nawu, Tuyenu, twakadibombi kudi Yehova nachitiyaŋenu chahaya nyaka chakubula kuvulamena kudi muntu.

⁶Antu ami adiŋi anyikoku ajimbala. Atubiŋa twawu diwu anayiji mbeshi, diwu anayileteshi jakumwaŋela hamapidi, afuma mpidi yeneni aya mpidi yanyanya, anavulameni dehi nihawuwutaminu wawu.

⁷Onsu anayiwani anakumini dakuyidya. Akwankunyi nawu nawu, Hitudi namu loŋaku, muloŋa Yehova, wushakaminu wakuloŋa, Yehova akuhweleleluwu ankakulula jawu, anamuvulumuni dehi.

⁸Temukenu mukachi kaBabiloni, fumenu mwituŋa dawaKaladeya, mwakekali neyi yizamba yanyikoku yidi nakutwaminina nyikanka yayimuna.

⁹Muloŋa tiyenu, nakasaŋumuna chipompelu chanyuza yamaneni yakafuma kwituŋa dakukabeta kakuchi munswa, yakenza nakulwa naBabiloni. Akamutandamina nyisululu nyisu lulu. Akamufumisha kwenoku. Nsewu jawu jakekala neyi jachilobu wasweja ntoŋi. Kwosi muntu wakafunta makasakasaku.

¹⁰AKaladeya akekala akupupewa. Onsu akayipupa akekuta. Dimu mwanahoshiyi Yehova.

¹¹Enu mudi nakubuwabuwa wuswana wami, ochu chimunatiyi kuwaha, ninochu chimukuluŋa, ninochu chimukutaŋala neyi iyoŋa daŋombi wamu kaji wudi nakudatola matahu, ninochu chimukuhosha neyi atuwalu aŊovu,

¹²mama yenu wakatiya nsonyi nankashi; wayivweli wakabaya. Tiyenu, mama yenu diyi wakekala muza wakukuma hanyima yanyuza yikwawu, wakekala isaŋa damukunkulwayi, ituŋa dominina chau, chinkalampata.

¹³Himwakashakama muntuku, mwakekala kwachihembi hohu mwejima, nandombu yaYehova. Antu ejima akahitaŋa kuBabiloni akahayama, akayiŋilaŋa nansaŋu jayipupu yindi yejima.

¹⁴Enu ejima mwevulaŋa mata anyikunji, mutandaminenu Babiloni nyisululu nyisululu kwi-ndo; mwasenu, bayi mwanakena nsewuku, muloŋa yena namuvulumuni dehi Yehova.

¹⁵Mukuwenu niniku niniku kwi-ndo. Nasumi dehi kumpoku, yipaka yindi yinakunduki, mpwembu jindi jinashiwuki; muloŋa hikutenda kwaYehova. Ditendenu nayena. Mukoŋenu mwanakoŋiyi.

¹⁶Yifumishe nuhu akwakudima kuBabiloni, fumishenuhu niakwataŋa kuyikwakwa hachilaaka chakwaŋula; antu ejima akaya, iwu nakuya kwawu, iwu nakuya kwawu, antu ejima akatemuka, iwu nakuya kwituŋa dindi, iwu nakuya kwituŋa dindi, nawoma wampoku yakabali yidi nakuyikabisha.

¹⁷Isarela himukoku wahaŋewa. Anamuhaŋi dehi kudi anyi tupa. Hakusambila amudiili kudi mwanta wakuAshuri. Ichi dinu kunu kukukuminina anamukotoli mafwahindi kudi mwanta wakuBabiloni, iwu Nebukaneza.

¹⁸Dichi Yehova wamazaza, Nzambi yaIsarela, nahoshi nindi, Tiyenu, nakababesha mwanta wakuBabiloni niituŋa dindi, neyi chinababeshi mwanta wakuAshuri.

¹⁹Isarela nakamuleta cheŋi kuwudiilu windi, wakadi ilaŋa haKarameli nahaBashani, wakekutilaŋa hamapidi aEfweremi niamuGileyadi.

²⁰Yehova nindi, Hamafuku owu nihampinji oyu kuluwa kwaIsarela akakukeŋakeŋa, hikwakekala kwokuku; ninshidi jaYuda nawa, hiyakayimonaku, muloŋa nakayanakena awa nakashiya nami ashaluhu.

²¹Nyamukilaku ituŋa daMeratayimi, nidena niashakama muPekodi Jahaku, yijilumuni chikupu mwakuyawu. Dimu mwanahoshiyi Yehova. Ilaku mwejima munakuleji.

²²Mwituŋa mudi ipumba danjita, nidakujilumuka kweneni.

²³Musensi weseki dejima O chiwaketuka dehi, O chiwakotoka dehi! Babiloni O chelayi dehi kwachihembi hohu mukachi kanyuza!

²⁴Eyi Babiloni nakuti muhetu, wunafumu nawa, eyi aweni kuchiluka nehi. Anakuwani, anakukwati nawa, muloŋa wunalwishi naYehova.

²⁵Yehova nenzululi dehi mwitala dindi dayitwa, nedishi dehi yitwa yakufwindashana kwindi. Muloŋa Mwanta, Yehova wamazaza, wudi namudimu mwituŋa dawaKaladeya.

²⁶Fumenu kwakumina ŋinza mwinzi nakumunya mukila, mwenzululi mumatalindi akuswekela, muhumoni matalindi ekali kwanyilumba, mumujilumuni ji-i chikupu. Bayi hashala chuma chinduku.

²⁷Jahenu aŋombi jindi amayala, akunkumuki kwawu kuwujahilu. Yayo O yihuŋu yawu! Ifuku dawu dinashiki, yoyi mpinji yawu yakuyihempula.

²⁸Mazu anawa akutemuka, akupuluka mwituŋa daBabiloni, kulonda akashimuni muZiyona kutenda kwaYehova Nzambi yetu, kwakutenda tembeli yindi.

²⁹Mutambikilenu Babiloni akwakwasa namata anyikunji, ejima evulaŋa mata anyikunji. Mutuŋilenu chilombu kwi-ndo, bayi hapuluka muntuku. Mulubwilenu yashikila munyidimu yindi; mwilenu yashikila muyuma yejima yaneliyi. Muloŋa yena nadinki wanta naYehova, naWajila waIsarela.

³⁰Dichi anyikwenzi jindi akadimbukila munyikwakwa yindi, amayala indi akwanjita ejima akayimwenesha ifuku odu. Dimu mwanahoshiyi Yehova.

³¹Mwanta Yehova wamazaza nahoshi nindi, Tiya, eyi wadinka wanta, ami nakwimani mbe; muloŋa ifuku deyi dinashiki, yoyi mpinji yakukuhempula kudami.

³²Mukwakudinka wanta wakahukana wakadimbuka, kwosi wakamuhindwishaku. Nakabutula kesi munyikala yindi, kakalasha yuma yejima yamunyeŋumukaku kwi-ndo.

³³Yehova wamazaza nahoshi nindi, Nianyana kaIsarela, nianyana kaYuda anayikabishili hamu. Antu ejima ayikwatili muwukoli saŋa ayikakelawu mbe, kuyumbaku kwonti kwawu.

³⁴Nkúuli yawu wudi naŋovu, ijina dindi diyi Yehova wamazaza. Wakahakula muloŋa wawu chachiwahi kulonda akanookeshi iseki, akabindaŋeshi ashakama muBabiloni.

³⁵Yehova nindi, Mpoku yakabali yidi hadi aKaladeya, nihadi ashakama muBabiloni, nihadi atulamba twindi, nihadi antu indi akwamaana.

³⁶Mpoku yakabali yidi hadi akwakudisamba, akasuŋa. Mpoku yakabali yidi hadi ayilobu jindi, akakwata chikasa kukanwa.

³⁷Mpoku yakabali yidi hatuwalu twawu, nihamakálu awu, nihadi antu ejima akwacheŋi adibombabomba adi mukachi kindi, akabalumuka neyi ambanda. Mpoku yakabali yidi hyuma yindi yalema, akayibuwa.

³⁸Chaaŋa chidi hameji indi, akoma chau. Muloŋa hiituŋa dawakishi akusoŋa, azalukila yuma yawu yakuyifwisha mutentu.

³⁹Dichi kwenoku kwakashakama anyama amwisaŋa nawatugwidi, mwakashakama nianyamalanda. Himwakashakama nawa cheŋi antuku haya nyaka. Mwamba kavwalikilaŋa makiŋu awantu mufwawa muvwalikawa himwamba katuŋa muntuku.

⁴⁰Yehova nindi, Chakisagenuwu Sodoma naGomora ninyikala yatuŋili kwakwihi nawena, dichi kwosi muntu wakashakama kwoku, hikwakazonkama hela mwana kamuntuku.

⁴¹Tiyenu, kukabeta kakuchimunswa kudi nakwinza muza wawantu; muza weneni, nianyanta amavulu akayisaŋumuna akafuma kwakumina iseki.

⁴²Akakwata kumata anyikunji nikumayoŋa. Ankatu kwawu, hiyakweti wushonaku. Mazu awu abulumaŋa neyi kaluŋalwiji, endelaŋa hatuwalu, wejimawawu anatandami munyisululu munyisululu chochawantu adi nakuya kunjita, akadasi naneyi, eyi mwana kaBabiloni wamumbanda.

⁴³Mwanta wakuBabiloni natiyi mpuhu yawu, nimakasa lehu. Yikatu yina muwani, ninyi soŋu yidi neyi ya mumba ndawu dina kufunyisha.

⁴⁴Tiya, wakakandukila kuwushakaminu wakola neyi chakandukaŋayi namutupa mwitu daYodana; ilaŋa ami nakamukasu mwisha, nakamutemuna akafumi kudi yena. Muntu atondawu diyi nakakunjika kwikala mwanta wawu. Ochu wudi neyi ami hinyi? Wakanholokela muchota hinyi? Kabiŋanyi wakemana kumesu ami?

⁴⁵Dichi tiyenu mpùŋa yaYehova yanakwatiliyi Babiloni, niyuma yanafu ukwiliyi ituŋa dawaKaladeya, nindi, Chalala akayitulumona nakuyitwala, wowu anyana ahamukanka wanyikoku. Chalala wakabalumuna hawushakaminu wawu hakekali kwayihembi nawena.

⁴⁶Iseki hidikukanka nalushindu lwakutambula Babiloni, nimbila yinatiyakani mukachi kanyuza.