Read MUKANDA WANZAMBI Jeremia 51 Bible Online

Jeremia 51 - MUKANDA WANZAMBI bible

Jeremia 51

¹Yehova nahoshi nindi, Tiyenu, nakasaŋu mwina Babiloni, nanawa ashakamamu akunnyamukila, mpepela yakuyijilumuna.

²Nakatemesha kuBabiloni antu akwacheŋa, akamupepa, akamanisha antu mwituŋa dindi to-o. Muloŋa kamu nyeŋumuka kwi-ndo mwifuku dayihuŋu.

³Muntu wukwevula wuta niyena nawa akamwevwili wuta kudi mukwakusowa, akamwevwili nawa ninowu wukunyamuka, iku navwali chikovwelu chindi chatumaleŋi. Bayi mwanakena nawa anyi kwenzi jinduku. Jilumunenu chikupu njita yindi yejima.

⁴Atapewa akadimbukila mwituŋa dawaKaladeya, ápwikawu dehi akadimbukila munyikwakwa yindi.

⁵Muloŋa hela Isarela, hela Yuda, hiyanayumbi kudi Nzambi yawu, kudi Yehova wamazazaku; kutopa ituŋa dawu dinenzali nanyiloŋa yana wanu wukudi Wajila waIsarela.

⁶Temukenu mukachi kaBabiloni mupulwishiwumi wenu wejima wenu; bayi mukoola kuluwa kwinduku; muloŋa himpinji yakutenda kwaYehova; akamuwanishili wufwetu windi.

⁷Babiloni wadiŋa neli lupasa lwawuru muchikasa chaYehova lwakushetesha isekidejima. Nyuza yanwamu dehi vinyu yidumu; dichi nyuza yinazaluki dehi.

⁸Babiloni nadimbuki chakukasumuka hohu, najilumuki. Mukalokelenu nyiteti. Mukeŋelenu yitumbu yayikatu yindi, wamba kela akamúuka.

⁹Twakeŋeli netu tumúuki Babiloni, aka, kukola kwindi nehi. Múumbenu, tuyenu wejima wetu, iwu kwituŋa dawu iwu kwituŋa dawu. Muloŋa kusompesha kwindi kunashiki nikwiwulu, anachishikŋi nikumavu.

¹⁰Yehova nedishi dehi kuloŋa kwetu hatooka, Tuyenu twakashimuni muZiyona mudimu waYehova Nzambi yetu.

¹¹Kalulenu nsewu, kwatenu kunkebu mbe. Yehova nasaŋumuni dehi jispiritu jawanyanta awaMediya; muloŋa yena nakwatili dehi Babiloni mpùŋa yaku mujilu muna, muloŋa kutenda kwaYehova kwakutenda tembeliyindi kunashiki dehi.

¹²Mpwembu jaBabiloni jiimikilenu mpandelu, koleshenu atulama, shenuku akwakutalatala, loŋeshenu akwakubela mina. Muloŋa Yehova neli nikufuukula diyi, nikukoŋa chuma chatenene niyi akwakushakama muBabiloni diyi.

¹³Lelu eyi washakama hameji amavulu, wasweja yuma yalema, jinakukumi, mwashikila lwisu lweyi mwomwenimu.

¹⁴Yehova wamazaza nadisanyiki yomweni, nindi, Chalala kwaamu nakakwinzesha antu neyi chakukwinzesha tububu, akakukuwa.

¹⁵Yena neli maseki naŋovu jindi, nakoleshi mpata yamunu mwishina namaana indi, natanjiki mawulu nakashinshi kindi;

¹⁶chakuhoshayi izudindi hiipumba dameji mumawulu, wakakumwishaŋa chishishi kunsa jeseki, wakeneshaŋa kulonda nvula, wedishapa mpepela mwaswekaŋa ayi yumayindi yalema.

¹⁷Antu ejima anabalumuki neyi anyama, hiyeluka chumaku, achi awuru ejima anayitiyishi nsonyi kudi akishi awu akusoŋa; muloŋa akishi awu akusuŋununa hiyuma yakutwamba, himwekala muuya ku.

¹⁸Akuhemesha kwawu, himudimu wakudidimba nachu; mumpinji yakayihempulawu akakisika.

¹⁹Iseka daYakoba hididi neyi yumiyuku; diyi mukwakuwumba yuma yejima; aIsarela diwu muchidi wawuswana windi; ijina dindi diyi Yehova wamazaza.

²⁰Yeyi chibáaŋa chami chanjita, yeyi yitwa yami yanjita. Yeyi nakakotolanachu nyuza kotu-kotu. Yeyi nakajilumuna nachu mawanta.

²¹Yeyi nakakotola nachu nituwalu niakwakwendelahu kotu-kotu. Yeyi nakakotola nachu makálu anjita niakwakwendelamu kotu-kotu.

²²Yeyi nakakotola nachu ni amayala niambanda kotu-kotu. Yeyi nakakotola nachu niakulumpi niansanda kotu-kotu. Yeyi nakakotola nachu nianyi kwenzini ayaloŋa adima kotu-kotu.

²³Yeyi nakakotola nachu niatubipa ninyikanka yawu yayimuna kotu-kotu. Yeyi nakakotola nachu niandimi niaŋombi jawu akudima nachu kotu-kotu. Yeyi nakakotola nachu nianguvulu nianyuli kotu-kotu.

²⁴NiBabiloni niakwakushakama muKaladeya nakayifwetesha kutama kwawu kwejima kwakoŋeluwu kumesu enu muZiyona. Dimu mwanahoshiyi Yehova.

²⁵Yehova nahoshi nindi, Eyi mpidi yajilumunaŋa antu, yajilumunaŋaseki dejima, tiya, ami nakwimani mbe. Nakakwolwela chikasa chami, nakakufumisha mumalola, nakakukunkumuna, nakakubalumuna kwikalampidi yasukuma.

²⁶Kudeyi hiyakafumishaku ilola dakwiwombu hela dakuchikukuku. Wakekala kweyi kwachihembi hohu haya nyaka. Dimu mwanahoshiyi Yehova.

²⁷Imikenu mpandelu mwituŋa, imbenu mpùŋa mukachi kanyuza, loŋeshenu nyuza yimwimani mbe, mutambikilenu mawanta aArarati, naMini naAshikenazi, amwimani mbe. Mukunji kenu mwanta wanjita amwimanimbe. Mukanjikilenu tuwalu tudi neyi mahashi.

²⁸Muloŋeshelenu nyuza, nianyanta awaMediya, nianguvulu jawu, nianyuli jawu ejima, niituŋa dawanta windi dejima, amwimani mbe.

²⁹Ituŋa hidikuzaala, dinatiyi yikatu. Muloŋa yanafuukwiluwu Babiloni kudi Yehova, yakubalumuna ituŋa daBabiloni diikali kwayihembi yakadi antu, yinakoli.

³⁰Ayilobu amuBabiloni analeki kulwa, anashakami muyipaka yawu, Ŋovu jawu jinakumi; anabalumuki neyi ambanda; nyikala yindi anayochi; nyikomenu yindi yinakotoki.

³¹Kameli wumu hakuya lufuchi nakukinkilila mukwawu, ntemesha wumu nawa hakuya lufuchi nakukinkilila mukwawu, akaleji mwanta wakuBabiloni nawu, Mukala weyi awutambula dehi mbadi jejima,

³²nawu, Anajikilili dehi kunyaba, mateti anochi dehi nakesi, akwanjita anayitiyishi dehi woma.

³³Muloŋa Yehova wamazaza, Nzambi yaIsarela, nindi, Mwana kaBabiloniwa mumbanda neli dehi neyi hawuhulilu watidiku hayidatolaŋawu; kapinji kanti hohu chilaaka chakwaŋula chakamuwana.

³⁴Mwanta wakuBabiloni Nebukaneza naŋudyi, nanchiki, nambalumuni neyi nswaha yakumwaŋa adehi, nanminyi dehi neyi chanza ŋombi, nekuti dehi ivumu mbena yuma yami yalembuka; naŋumbili dehi hanzi.

³⁵Wáshakama muZiyona wakela nindi, Jandombu jankoŋeluwu ninami nimujimba wami, Babiloni ajikooli; Yerusalema wakela nindi, Ashakama muKaladeya akooli mashi ami.

³⁶Dichi Yehova nahoshi nindi, Nakakuhoshela muloŋa weyi, nakakutenda. Nakomisha kaluŋalwiji kindi, nakomisha kaseloki kindi.

³⁷Babiloni wakabalumuka kwanyilumba, wakekala kuwushakaminu wanyumbu, wakekalawakuhayama, wakuyiŋila, wakadi antu.

³⁸Akata hokela kumu neyi nyenzi yanyituŋa; akabuluma neyi anyana kanyituŋa.

³⁹Chakatatawu naka yitelekela chawija chawu; nakayishetesha walwa, kulonda akaluŋi, akakamitulu twahaya nyaka twákubula kuhinduka. Dimu mwanahoshiyi Yehova.

⁴⁰Nakayi kunkumwisha kuwujahilu neyi anyana kanyikoku, neyi yizamba yanyikoku hamu nayizamba yampembi.

⁴¹O chanatambuluwu Sheshaki! Ashimekawu iseki dejima o chana mukasu mwishuwu, Babiloni o chelayi dehi kwachihembi hohu mukachi kanyuza!

⁴²Kaluŋalwiji kanamuwani dehi Babiloni, anamubuti dehi namankanda indi amavulu.

⁴³Nyikala yindi yela dehi kwayihembi, ituŋadawuma, chinkalampata, ituŋa dakadi kushakama antu, dakadi nikuhitila mwana kamuntu.

⁴⁴Nakamusompesha Beli muBabiloni, nakamusanzisha yami nyayi dehi; nyuza hiyakahwila nawa cheŋa kudi yenaku. Mwalala, mpwembu yaBabiloni yakakunduka.

⁴⁵Enu antu ami fumenu mudi yena, mudamwini wejima wenu kukuzuwa kwaYehova kwasweja.

⁴⁶Bayi mwakazeya munyichima yenuku, bayi mwakatiya woma wansaŋu yanáwunáwu yakatiyakana mwituŋaku; muloŋa kwakenza nsaŋu yanáwunáwu hamwaka wumu, kukumininaku hamwaka wukwawu kwakenza nsaŋu yanáwunáwu, nindombu mwituŋa, nyuli nakumwima namukwawu nyuli.

⁴⁷Dichi tiya, kwakenza mafuku inakasompesha akishi akusoŋa kuBabiloni, niituŋa dindi dejima dakatiya nsonyi, antu indi akajahawu akadimbukila mukachi kindi.

⁴⁸Henohu nimawulu nimaseki niyuma yejima yekalamu, yakemba tumina twakuzaŋa alala nansaŋu yaBabiloni. Muloŋa kwakubuwa akufuma kukabeta kakuchimunswa, akamuwana. Dimu mwanahoshiyi Yehova.

⁴⁹Mwanadimbwi shiluwu aIsarela ajahiluwu kudi aBabiloni, dimu nawa mwakadimbukilawu antu ejima amwituŋa dejima akajahawu kuBabiloni.

⁵⁰Enu munapuluki kumpoku jatubali, yenu, bayi mwimanaku, mwakamwanukilaŋa aYehova kwakulehi, Yerusalema akenzi kunyichima yenu.

⁵¹Tunatiyi nsonyi, muloŋa tunatiyi jakutusawula. Nsonyi jinatubuti dehi kumesu wi-i, muloŋa mumalala amwitala daYehova muneŋili dehi antu akwacheŋi.

⁵²Dichi Yehova nindi, Tiya, kwakenza mafuku inakasompesha akishi indi akusoŋa; mwahita ituŋa dindi dejima mwakekala nyaabu yawantu akatapawu.

⁵³Hela Babiloni wakakandama ashika nikwiwulu, hela wakahatisha hewulu hakolelayi, kudi yena kwakenza akwakubuwa akufumakudami. Dimu mwanahoshiyi Yehova.

⁵⁴KuBabiloni kunatiyakani mbila, kwituŋa dawaKaladeya kunatiyakani kujilumuka kwasweja!

⁵⁵Muloŋa Yehova hakubuwa Babiloni, hakukisaŋanamu izu deneni. Mankandawu hiyakuvuma neyi chimeji chachivulu; izu danahoshuwu dinatiyakani.

⁵⁶Mukwakubuwa namuwani dehi, namuwani Babiloni, ayilobu jindi anayikwati dehi, matawu anyikunji anayikotoli dehi kotu-kotu; muloŋa Yehova hiNzambi wakufwetesha, chalala kwaamu wakafwetesha hohu.

⁵⁷Nakashetesha niatulamba twindi, niantu indi akwamaana, nianguvulu jindi, nianyuli jindi, niayilobu jindi, akakama tulu twahaya nyaka twakubula kuhinduka. Dimu mwanahoshiyi Mwanta, wukweti ijina daYehova wamazaza.

⁵⁸Yehova wamazaza nahoshi nindi, Mpwembu jakuBabiloni jatandumuka jakakunduka chikupu, yenzelu yindi yayilehi yakumpwembu jindi yakasukuma nakesi; nyuza yawantu yakakabakena chuma chamukunkulwayi, nyuza yakakabakena kesi, akazeya.

⁵⁹Izu dakaprofwetu Yeremiya dalejeliyi Seraya mwana kaNeriya, Neriya mwana kaMaseya, hayiliyi namwanta wawaYudeya Zedekiya kuBabiloni, mumwaka wawanta windi wamuchiwana. Henohu Seraya wadiŋi mukulumpi wawatulama.

⁶⁰Yeremiya wasonekeli mumukanda yuma yatama yejima yamba kamona Babiloni, wowu mazu awa ejima anasonekuwu akutena Babiloni.

⁶¹Yeremiya hakumwila Seraya, nindi, Chiwakashika kuBabiloni, wakaanuka kutaŋa mazu awa ejima.

⁶²Wakela neyi, Eyi Yehova wunateni dehi mukala wunu, neyi Nakawufumishahu, mwakabuli kushakama hela muntu hela kanyama. Neyi, Wakekala kwayihembi hohu haya nyaka.

⁶³Chiwakela wunakumishi dehi kutaŋa mukandiwu, wakakasaku ilola, hiwakawunatila mukachi kaYufurati.

⁶⁴Hiwakela neyi, Dichi chakanekamayi Babiloni, hakafumpuka nawa cheŋuku, nayatama yinakamushikŋila; akazeya. Mwenimu dimu munakumini mazu aYeremiya.