Read MUKANDA WANZAMBI Jeremia 7 Bible Online

Jeremia 7 - MUKANDA WANZAMBI bible

Jeremia 7

¹Izu dafumini kudi Yehova denjili kudi Yeremiya,

²nindi, Imanaku luchisu chachipaŋu chakwitala daYehova, wakashimwinuku izu idi la neyi, Enu amuYuda ejima, enu mukwiŋilaŋa muyisu iyi nakudikudi Yehova, tiyenu izu daYehova.

³Yehova wamazaza, Nzambi ela, nahoshi nindi, Wahishenu ninjila jenu niyimwelaŋa, ninami shakamisha munu.

⁴Mazu akutwamba akwila nawu, Tembeli ova, tembeli yaYehova, tembeli yaYehova yoyeniyi, bayi muyikuaŋaku.

⁵Muloŋa neyi mukuwahisha chalala ninjila jenu niyimweneyi mukusompeshaŋa nsaŋu yamuntu namukwawu mwaya wuŋaji;

⁶neyi mukubula kukabisha hela muntu wakwacheŋi, hela nshona, ituluwa wamumbanda; neyi mukubula kupwekesha mashi akadi mwenamunu, hela kwenda mwaya akishi mudiyinjiki nachu;

⁷ami nami nakayishakamisha mwenamunu, mwituŋa dinenkeli ankakulula tufumisha kunyaka nakutwala kunyaka yahaya nyaka.

⁸Tiyenu, mwakuhwelelaŋa mazu akutwamba ákubula kuyikwasha.

⁹Enu komana mukwilaŋa iku mudi nakwiya, mudi nakujaha akwenu, mudi la wuvumbi, mudi nakusanyika chakutwamba, mudi nakumwochela insensi, mudi nakwenda mwaya akishi imunabuli kwiluka,

¹⁰iku himukwinzaŋa nakwimana kumesu ami mwitalidi datenenawu ijina ijina dami, himukwilaŋa nenu, Etu atupulwisha dehi; munalondi mwakakopa patuhu kwenu yishimashima yonsu iyi, tahindi?

¹¹Idi itala datenenawu ijina dami mwadimona dehi kwenu, nenuhi iyeŋu dawamakombi, tahindi? Yehova nindi, Ami, ami aweni, nachimoni dehi.

¹²Ichi dinu yenu ntahi kuchipela chami chadiŋi muShilo kunashakamishili ijina dami hakusambila, mutali chinadikoŋeli nakutama kwataminuwu antu ami aIsarela.

¹³Yehova nindi, Ichi dinu, chimunakoŋi yuma yejimiyi, kutoŋa ami nadiŋi nakuhosha nenu, chakumenekaŋa budidi nakuhosha, enu kutiya nehi, nadiŋi nakuyitambika, enu kwitiya nehi;

¹⁴dichiitaladatenenawu ijina dami, dimwakuhwelela, nichipela chinenkeli enu nawankakulula jenu, nakayikoŋa mwomunakoŋi Shilo.

¹⁵Nakayinata mwakafumi kumesu ami, neyi chinanati ana kwenu ejima, wowu anyana kaEfweremi ejima.

¹⁶Dichi bayi wuyilombela antu awa, hela kuyikanjikila izu dakubilela hela dakuyilombelaku, hela kuyihakwila kudamuku, muloŋa ami hinukuku-tiyaku.

¹⁷Ochu hiwunamoni chadi nakwilawu munyikala yamuYuda, nimunyikwakwa yamatala amuYerusalemaku?

¹⁸Anyana hiyakukuŋula nchawa, atata jawu hiyakubutula kesi, ambanda hiyakuvuba wuŋa akami mankendi amwanta wamumbanda wamwiwulu, ahuŋunwinini akishi nyilambu yakuhuŋununa, kulonda anvuloki nizuwi.

¹⁹Yehova nindi, Komana adi nakuvulokami nawu nizuwi, tahindi adi nakudivuloka awenawu, kulonda adibayishi kumesu awu awenawu?

²⁰Dichi Mwanta Yehova nahoshi nindi, Tiyenu, nikuzuwa kwami nikulendumuka kwami akakwichila hachipela ichi, nihadi antu nihadi anyama, nihanyitondu yamumpata, nihanyikabu yahamaseki, kwakabidimaŋa ho-o, hikwakajimaku.

²¹Yehova wamazaza, Nzambi yaIsarela, nahoshi nindi, Lunjikenu nyilambu yenu yakushita hayimuna yenu, mudyi mbiji.

²²Muloŋa mwi-fuku dinafumishili ankakulula jenu mwituŋa daEjipitu hinahosheli nawu hela kuyileja nsaŋu janyilambu yakushita hela yayimunaku.

²³Nayilejeli chuma chakwila nami, Tiyililenu mwizu dami niikali Nzambi yenu ninenu mwikali antu ami. Nami, Endenuŋa munjila yejima yinayilejeli kulonda mwakamonaŋa kuwaha.

²⁴Ilaŋa wena kutiyililaŋa nehi, kuteŋelekaku itu dawu nehi, endeli kwawu mwakudileja awenawu hohu, mwadikaŋila nyichima yawu yatama, afuntili hanyima hiyayili kumbiduku.

²⁵Kufumisha kwifuku dafuminuwu ankakulula jenu mwituŋa daEjipitu kushika nikwitagwa dalelu, chinatemesha ambuŋami atuprofwetu ejima, namenekaŋa nakuyitemeshelawu budidi jejima;

²⁶hela chochu, wena kutiyilila kudami nehi, hela kuteŋelekaku itu dawu nehi, achini chikishili kwawu nshiŋu jawu; abadikili ankakulula jawu kutamisha.

²⁷Wakahosha nawu mazu awa ejima, ilaŋa wena kwawu hiyakakutiyililaku; wakayitambika wena, ilaŋa wena kwawu hiyakakwitiyaku.

²⁸Wakayila neyi, Iwu diwu muza wunabuli kutiyilila mwizu daYehova Nzambi yawu, kwonti kwawu kuyileja; kashinshi kanoŋa dehi, akafumisha dehi namutunwa twawu.

²⁹Tewulaku nsuki jeyi wujinati, wutumbuli mukeŋa hayinaŋanaŋa yankumbu, muloŋa Yehova naleki dehi, nashiyi dehi ikiŋu idi dazuwilayi dehi.

³⁰Yehova nindi, Muloŋanyana kaYuda aneli dehi chatama kumesu ami, anashi dehi yishimashima yawu mwitala datenenawu ijina dami kulonda kudijilola.

³¹Anatuŋi yinaŋanaŋa yakuTofweti yekala muchinekineki chamwana kaHinomi, kulonda kwocha anyanawu amayala nawambanda mukesi; chuma chinabulili kuyileja, hela kwinza tuhu kumuchima wami nehi.

³²Dichi Yehova nindi, Tiyenu, mafuku akenza hiyakatena nawa cheŋi nawu, KuTofwetuku; hela nawu, Kuchinekineki chamwana kaHinomuku; ilaŋa akatena nawu, Kuchinekineki chaKujahana; muloŋa muTofweti akela jiike-e, kubula nikwakujiikila.

³³Yibimbi yawantu awa yakekala mbiji yakudya atujila ahaluzwizu, nawanyama ahamaseki, kwosi niwakayitemunaku.

³⁴Henohu munyikala yamuYuda, nimunyikwakwa yamuYerusalema, nakamweneshamu izu dakuzaŋalala, niizu dakutiya kuwaha, niizu dansumbuli niizu dansumbuki; muloŋa ituŋa dakabalumukakwa yihembi.