Read MUKANDA WANZAMBI Jeremia 9 Bible Online

Jeremia 9 - MUKANDA WANZAMBI bible

Jeremia 9

¹Neyi namutu wami wadiŋi ŋiya dameji, nimesu ami adiŋi kaselokikamadilu kulonda nidilaŋa nimwaana niwufuku antu amwana kawakwetu wamumbanda anajahuwu!

²Neyi nadiŋi nankunka mwisaŋa yashikenaŋawu akwakwenda, kulonda nishiyi akwetu, nifumi kudi wena! Muloŋa wejima wawu hiyayivumbi hohu, hichipompelu chawakwakukwatila akwawu si makasu.

³Evulaŋa madimi awu neyi mata awu anyikunji kulonda kutwamba, ela dehi akwaŋovu mwituŋa, ilaŋa hiŋovu yakwila yakashinshuku. Muloŋa elaŋa afuma kukutama iku aya kukutama kukwawu, nikuŋiluka hiyaŋilukaku. Dimu mwanahoshiyi Yehova.

⁴Wejima wenu babelenu akwenu mwatuŋa nawu, bayi mukuhwelela mana kwenu niwumuku; muloŋa ana kwenu ejima akasweja kudya yuma yawakwawu, niakwenu ejima mwatuŋa nawu akakimbukaŋa kwanambonji hohu.

⁵Akela iwu nakudimba mukwawu atuŋayi nindi, iwu nakudimba mukwawu atuŋayi nindi, hiyakahosha mwalalaku; madimi awu anayileji dehi kuhosha yakutwamba; adikabakeshaŋa nakwila yakuluwa.

⁶Hiwashakama washakama hakachi kakudimbana; kukudimbana kwawu kwokwananlekeluwu kuŋiluka. Dimu mwanahoshiyi Yehova.

⁷Dichi Yehova wamazaza nahoshi nindi, Tiyenu, nukuyisuŋununa niyeseki; ochu nadi kwila mwacheŋi mudihi nansaŋu yamwana kawakwetu wamumbanda?

⁸Idimi dawu hinsewu yafwana; dahoshaŋa yakudimbana; iwu nakanwa kindi wahoshaŋa jakumwena namukwawu atuŋayi nindi, ilaŋa mumuchima windi mudi kumweba hohu.

⁹Yehova nindi, Nileki kuyi-hempula nayumiyi, tahindi? Nileki kuditenda namuza wudi chochichuku, tahindi?

¹⁰Nukukwata kudila nakutumpa nansaŋu jamapidi, nukutumbula mukeŋa nansaŋu jamadiilu awayimuna mwisaŋa, muloŋa anasukumi dehi bwi-i, chakwila nimuntu wakutwesha kuhitamu nehi; antu nawa hiyakutwesha kutiya izu dawayimunaku; niatujila ahaluzwizu, nianyama anatemuki, anayi.

¹¹Yerusalema nukumubalumuna kwanyilumba nyilumba, mwikali muwushakaminu wawanyumbu; nyikala yamuYuda nukuyibalumuna kwikala yihembi yakadi akushakamamu.

¹²Mukwamaana hinyi kulonda ashinshiki chumichi? Kanwa kaYehova kanahoshi nanyi, kulonda achishimuni? Ituŋa dinanoŋelidi? Dinasukuminidi neyi isaŋa, mwaka mubuli wakuhitamu?

¹³Yehova nindi, Ochu chanalekuwu nshimbi jami jinashili kumesu awu, nichanabuli kwovwahilawu izu dami, hela kwendamu;

¹⁴anendi mwaya kuchinchika kwanyichima yawu awenawu, nimwaya aBayali ayilejeluwu ankakulula jawu;

¹⁵dichi Yehova wamazaza, Nzambi yaIsarela, nahoshi nindi, Tiyenu, chalala antu awa nakayidiisha mutondu walula, nakayinwisha meji awulembi.

¹⁶Nakayimwaŋila mwahita nyuza yabulili kwilukawu wenahela ankakulula jawu. Nakayilondesha mpoku yakabali nichinakayinoŋesha to-o.

¹⁷Yehova wamazaza nahoshi nindi, Toŋojokenu chachiwahi, mutambiki ambanda akweti mudimu wakudila, kulonda akenzi, mutambiki ambanda akweti maana, kulonda akenzi.

¹⁸Akanyakali, akatu kwatili mudimu wakutumpa, kulonda mumesu etu mupolomoki madilu, munlabu jetu namutupuki chimeji.

¹⁹Muloŋa muZiyona munatiyakani izu dakutumpa, nawu, Ochanatupupuwu! Tunabayi dehi kwetu chakubadika, muloŋa tunafumi dehi mwituŋa, muloŋa anasandi dehi nimataletu.

²⁰Hela chochu, tiyenu izu daYehova enu ambanda, matu enu atambuli izu dakukanwa kindi, muleji anyanenu awambanda muwutumpilu, wejima wenu muleji akwenu tuŋa nawu mukeŋa.

²¹Muloŋa kufwa kwakandama dehi, kuneŋili dehi janina jetu, kuneŋili dehi mumataletu amaneni amawahi, kulonda lishuhu anyanetu adi hanzi, afumishuhu ninyikwenzi yetu adi munyiwa.

²²Yehova nindi, Hoshaŋa neyi, Yibimbi yawantu akadimbuka kala neyi wushi wamumaha, neyi mbutu jakukamatila muchikasa ila antu aaŋula dehi, kwosi niwakayikuŋulaku.

²³Yehova nindi, Mukwamaana bayi adisamba namaana induku, mukwa bayi adisamba naŋovu jinduku, mukwakuheta bayi adisamba namahetidu.

²⁴Mukwakudisamba adisambi nanochu chashinshikayi, nichaŋilu nindi yami Yehova nelaŋa mwaluwi, mwawuŋaji, nimwaloŋa hamaseki; muloŋa natiyaloŋa kuwaha nayumiyi.

²⁵Dimu mwanahoshiyi Yehova. Yehova nindi, Tiyenu, mafuku akenza inakababesha antu ejima alamiru dehi, iku saŋa aduwu nawudima wawu;

²⁶niaEjipitu, niaYuda, niani, nianyana kaAmoni, niaMowabi, niatewulaŋa nsuki jawu mumawomu mawombu, ashakama mwisaŋa. Muloŋa nyuza yejima hiya yidima, niakwamutaŋa waIsarela nawa hiyayidima munyichima yawu.