Read MUKANDA WANZAMBI Malilo 2 Bible Online

Malilo 2 - MUKANDA WANZAMBI bible

Malilo 2

¹Mwanta o chanamukuŋwiliyi mwana kaZiyona wamumbanda mavu nakuzuwa kwindi! Lubanji lwaIsarela nalufumishi dehi mwiwulu, nalunati dehi heseki. Mwifuku dakuzuwa kwindi hanaanuki nawa itanda dakunyendu yinduku.

²Mwanta naminyi dehi nyikala yejima yashakamaŋayi Yakoba, nikutiya luwi nehi. Yipaka yindi mwadikaŋililiyi mwana kaYuda wamumbanda nayisandi dehi yejima nandombu yindi. Nayishikŋi dehi niheseki. Natamishi dehi niwanta niatulamba twawu.

³Naketuli dehi nseŋu jaIsarela jejima nakuzuwa kwindi kwasweja. Chikasa chindi chachidiilu nachifuntishumu dehi kumesu achilumbu. Namushiti dehi Yakoba bwi neyi kesi kabidimaŋa, kalashalashaŋa kwi-ndo.

⁴Nevuli dehi wuta windi neyi chilumbu; nemani dehi, iku navuŋi chikasa chindi chachidiilu neyi mukwankunyi; antu ejima twatiyilaŋa kuwaha kuyitala, nayijahi dehi kwindi; nasukuli dehi kulendumuka kwindi hetenti damwana kaZiyona wamumbanda neyi kesi.

⁵Mwanta nekali dehi chilumbu, naminyi dehi aIsarela. Naminyi dehi matalawu awanta ejima, nakisaŋani dehi yipaka yawu mwadikaŋililuwu. Mudi mwana kaYuda wamumbanda navulishumu dehi kudihomba nakudila.

⁶Nafumishi dehi tabanaka yindi naŋovu, neyi chelaŋawu itempa. Nakisaŋani dehi chipela chindi chakupompela. Yehova navulameshi dehi nichawija chakushiika nisabata muZiyona, nasekeshi dehi nianyanta niatupristu nandombu yakuzuwa kwindi.

⁷Mwanta nombi dehi kameŋa kindi, naleki dehi malalindi, mbaŋu jakumatalindi awanta wajihana dehi kudi chilumbu. Anabobweli dehi mwitala daYehova, neyi chelilaŋawu hefuku dachawija chakushiika.

⁸Yehova nafuukuli dehi kukisaŋana mpwembu jamwana kaZiyona wamumbanda. Mwonji wakweseka nachu nawutanjiki dehi, chikasa chindi hanachifuntishumu kulonda chileki kukisaŋanaku. Nimpwembu yakudima nimpwembu yakutuŋa najidilishi dehi makumbu, jinazeeleli dehi kumu.

⁹Yenzelu yindi yampwembu yinavumbami dehi hamaseki, nyikomenu yindi nayikisaŋani dehi, nayikotoli dehi. Mwanta windi niatulamba twindi adi kunyuza kwakadi nshimbi. Atuprofwetu twindi hiyanamoni chimwenu chakufuma kudi Yehovaku.

¹⁰Akulumpi amwana kaZiyona wamumbanda anashakami heseki, chochamwenawu zo-o. Anadisukwili lunkuŋu hanyitu yawu, anavwali yikeleyi. Ajiki amuYerusalema ananoŋami nyitu yawu ndo niheseki.

¹¹Mumesu ami munomi dehi nakudila, natiyi muchima mwivumu bwi, muchima wami wunamwaŋali dehi heseki mwa-mwa, nakukisaŋana kwanakisaŋanuwu mwana kawantaŋa jami wamumbanda, muloŋa nianyana anyanya, niakwakwamwa adi nakuhwidŋela munyikwakwa yamumukala.

¹²Chakuhwidiŋelawu munyikwakwa yamumukala neyi antu anatapuwu, chamwaŋikaŋa wumi wawu hantulu jawamama jawu, hiyakwihujola amama jawu nawu, Tidi ku navinyu yidi kudihi?

¹³Eyi mwana kaYerusalema wamumbanda, nukukushimwina wunsahwinyi? Nukukufwikŋa neyi chumanyi? Eyi mwana kaZiyona wamujiki, nukukwesekesha nachumanyi kulonda nikukundeji? muloŋa kujilumuka kweyi kunatohi neyi kaluŋalwiji, wukutwesha kukuhizumwisha hinyi?

¹⁴Atuprofwetu tweyi anakumweni yimwenu yamukunkulwayi yawusupi. Hiyanabutululi kuluwa kweyi kulonda akufumishi cheŋi muwukoli weyuku. Anakumweni wuprofwetu wamukunkulwayi, anakumweni yuma yakukukinjika nachu.

¹⁵Antu ejima akahitaku hiyakukwetela mumakasawu; hiyakumuyiŋila mwana kaYerusalema wamumbanda, hiyakumulembula nanyitu yawu, nawu, Weniwu diwu mukala watenenaŋawu nawu, Dilu lubanji lwamana, diwu wazaŋalelawu iseki dejima, tahindi?

¹⁶Ayilumbu jeyi ejima anakwasa mini mukanwa nankashi. Hiyakuyiŋila, hiyakudisumona kumaji, nawu, Tunamuminyi dehi. Chalala kwaamu, dodifuku twadiŋi nakutalila. Tunadiwani dehi, tunadimoni dehi.

¹⁷Yehova nakoŋi dehi mwafuukwi liyi, namanishi dehi izu dindi dayilejeliyi hamafuku ahashankulu, nakunati dehi heseki, nikutiya luwi nehi. Namutiyishi dehi chilumbu kuwaha nansaŋu yeyi, nemiki dehi nseŋu jawakwankunyi neyi kwiwulu.

¹⁸Nyichima yawu yadililili kudi Yehova. Eyi mpwembu yamwana kaZiyona wamumbanda, madilu eyi apolomoki neyi kaloŋa nimwaana niwufuku. Bayi wunookaku, kantu kadisu deyi bayi kamwenaku.

¹⁹Hindukaku wukaluki nyiteti nawufuku, hachilu hachilu. Mwaŋilaku muchima weyi heseki kumesu aMwanta, neyi meji. Nyamunaku makaseyi, wumwolweli, wulembeleli wumi wawanyaneyi anyanya anazeyi nanzala kunsa janyikwakwa yejima.

²⁰Eyi Yehova, tala wutali awa wunakoŋi mwenimu. Ambanda kwaamu adiyi avwalika mumavumu awu, anyana akataŋawu munkondu? Atupristu nawatuprofwetu ayijahili kwaamu mumalala aMwanta?

²¹Atwansi nawatushinakaji hiyakukamujoka hamaseki munyikwakwa. Yaŋadima yami ninyikwenzi yami anadimbuki nampoku yakabali. Wunayijahi hefuku deyi dakuzuwa. Wunayijaholi nikutiya luwi nehi.

²²Wunantambikili mutentu niniku niniku, neyi chakutambika chipompelu chakudihudika. Kwosi wapulukili hela kushalahu, mwifuku dakuzuwayi Yehova. Awa naakatili munkondu, naleleli, anayinoŋeshi kudi chilumbu.