Read MUKANDA WANZAMBI Malilo 3 Bible Online

Malilo 3 - MUKANDA WANZAMBI bible

Malilo 3

¹Yami muntu namoni ihuŋu namutondu windi wakuzuwa.

²Nanlomboli nakuŋendesha mumwidima, mwakadi chejeji.

³Chalala kwaamu, yami abalumwinaŋayi chikasa chindi hanti nahanti mwaana wejima.

⁴Nanyikwishi dehi ikowadami ninyisunyi yami, nakotoli dehi mafwahami.

⁵Nantuŋili dehi, naninyeŋumwishi dehi nawulembi nakukabakana.

⁶Nanshakamishi mwiyila bwi-i, neyi antu afwili dehi chachikulu.

⁷Nankolekeli dehi ikoli kwi-ndo kulonda nikaŋanyi kwidika. Nanlemesheli dehi ileŋi dami.

⁸Mwalala chinukukaloka nyiteti nakutambika nami ankwashuku, yena hakwenzelela kulombela kwami hanzi.

⁹Kunjila jami yena nakolekuku ikoli damalola akubalula, naheŋeshi dehi njila jami.

¹⁰Kudami yena nekali dehi neyi bera wudi nakubelamina, neyi mutupa wawutamaŋa kumbeŋu kumbeŋu.

¹¹Nanteŋulwili dehi njila jami, nansansoli dehi sansu sansu; nankonki dehi.

¹²Nevuli dehi wuta windi, naŋimiki dehi niikali chuma chakwasaŋa muvu windi.

¹³Nyivu yamungongu windi nayiŋŋi dehi munyijiŋwa yami.

¹⁴Yami akusehawu kudi antaŋa jami ejima; yami akwimbaŋawu namutumina twawu mwaana wejima.

¹⁵Naŋikutishi dehi yalula, nanwishi dehi mutondu walula ivumu mbe.

¹⁶Nankotoli dehi maji ami nankalawanda, nambuti dehi namawuti wi-i.

¹⁷Wunaŋumbili dehi kwakulehi nakuwunda. Navulameneni yayiwahi.

¹⁸Nelili nami, NiŊovu yami niyinatalilaŋa kudi Yehova yinanoŋi dehi kwayu.

¹⁹Anukaku yihuŋu yami, nichinukulumbwaŋila, nimutondu walulaniwulembi.

²⁰Muchima wami wuchidi kwanukamu nihanu, hiwukunoŋama mukachi kami.

²¹Muchima wami chiwukutoŋojokamu hinukukuhwelela.

²²Chanabuli kutunuŋununawu lwoluwi lwambala lwaYehova lwavula, niwushona windi wabulaŋa kukuma.

²³Wabalumukaŋa kwawu wawiha habudidi habudidi; kashinshi keyi kasweja.

²⁴Muchima wami nindi, Yehova diyi iseka dami, dichi chinukumukuhwelela.

²⁵Amumonaŋa Yehova kuwaha wowu amuchiŋililaŋa, nimuchima wamukeŋakeŋaŋa.

²⁶Kukuhwelela wamwinu waYehova nakudiwunjikilamu zo-o chachiwahi.

²⁷Chawaha muntu kusenda mpanda hawansi windi.

²⁸Ashakami kwindi kanka windi nakudimwenena zo-o, muloŋa anamutwikiyi kudi yena.

²⁹Anoŋami kwindi heseki, wamba kela kukwikala kukuhwelela.

³⁰Atalishi ikidi dindi kudi mukwawu wukumweta; ekuti kusawuka.

³¹Muloŋa Mwanta hakomba muntu chahaya nyakaku.

³²Hela wukumwesha muntu kukala, wakamutiyila wushona mwashikila luwi lwindi lwasweja.

³³Muloŋa yena hakeŋa kukabisha muntu, hela kumwesha anyana kawantu kukalaku.

³⁴Kudatola ahanu heseki akasewa ejima nakuyichika,

³⁵kuteŋulula kuloŋa kwamuntu kumesu aMukwakubadika,

³⁶kuheŋesha muloŋa wamuntu, yumiyi Mwanta hayikeŋaku.

³⁷Hinyi wukuhosha chuma chakadi kumuleja kudi Mwanta, chimwekana?

³⁸Mukanwa kaMukwakubadika himwafumaŋa niyatama niyayiwahuku, tahindi?

³⁹Muntu wamumi atatokaŋa tuhu, muntu atatoki nachakumubabeshawu nanshidi jindi.

⁴⁰Tukeŋakeŋenu njila jetu, tutalenu mujinayi, tufuntenu kudi Yehova.

⁴¹Tutalishenu nyichima yetu nimakasetu hamu kudi Nzambi mwiwulu.

⁴²Tunaputoli, tunadikaŋi, eyi kweyi kutwanakena nehi.

⁴³Wunatubuti kuzuwa, wunatuhaŋi; wunatujahi, nikutiya luwi nehi.

⁴⁴Wunadibuti ivu kulonda kulomba kwetu kubuli kuhanuka.

⁴⁵Wunatubalumuni dehi neyi nkaku nanswadi mukachi kanyuza yawantu.

⁴⁶Ayilumbu jetu ejima anatwasamini mukanwa.

⁴⁷Niwoma niikela yinatuwani, nikutukonka nikujilumuka nawa.

⁴⁸Mesu ami apolomokaŋa kwatuloŋa twameji nakujilumuka kunajilumuki mwana kawantaŋa jami wamumbanda.

⁴⁹Mesu ami apolomokaŋa hohu, hiyamwenaŋaku, hiyanookeshaŋaku,

⁵⁰nichamba kelayi Yehova wudi mwiwulu hakutala mwishina, hakumona.

⁵¹Mesu ami aneyilishi dehi muchima wami, nansaŋu yawanyana awambanda ejima ahamukala wami.

⁵²Awa aneli ayilumbu jami chakadi muloŋa, ananhaŋi nankashi neyi kajila.

⁵³Anaketwili wumi wami mukaleya kamuwina, ombilahu niilola.

⁵⁴Meji anhita nihanamutu wi-i, nami, Nafwi dehi.

⁵⁵Mukaleya kamuwina kakuma kwishina chikupu, natambikili ijina deyi, eyi Yehova.

⁵⁶Eyi watiyili izu dami; chinukwonashana nakudila bayi wubuta kwitu deyuku.

⁵⁷Wakundamini kwakwihi ifuku dinakutambikili, welili neyi, Bayi wutiya womaku.

⁵⁸Eyi Mwanta, wunanhakwili nyiloŋa yami, wunakuuli wumi wami.

⁵⁹Eyi Yehova, wunamoni chanankoŋuwu chatama, sompeshaku muloŋa wami.

⁶⁰Wunamoni kutenda kwawu kwejima niyuma yanankasakasiluwu yejima.

⁶¹Eyi Yehova, wunatiyi chanansawuluwu, niyuma yakunkasakasilawu yejima;

⁶²nyivumbu yanawa annyamukilili, nimwadiŋi nakunfuukwilawu mwaana wejima.

⁶³Talaku nichakushakamawu nichakwimanawu, yami kamina kawu.

⁶⁴Eyi Yehova wakayinka wufwetu wawu mwashikila nyidimu yakumakasawu.

⁶⁵Wakayinka nyichima yachinchika, dodishiŋu diwakayishiŋa.

⁶⁶Wakayikupisha nakuzuwa, wakayijilumuna mwishina damawulu aYehova.