Read MUKANDA WANZAMBI Malilo 4 Bible Online

Malilo 4 - MUKANDA WANZAMBI bible

Malilo 4

¹Wuru o chiwunakuyiki dehi! Wuru wasweja kukoseka o chiwunabalumuki dehi! Malola akumalala anayimwaŋamwaŋili kunsa janyikwakwa yejima.

²Anyana kaZiyona amayala alema afwikijawu kulema neyi wuru wakoseka, o chayifuukulawu dehi neyi manuŋu amawumba, neyi mudimu wakumakasa akaŋemi!

³Kaŋanyahu anyumbu enkaŋa anyanawu iyeli, aamwishaŋa nyanawu, hakwila mwana kawantaŋa jami wamumbanda nekali dehi nkatu neyi anyamalanda ekala mwisaŋa.

⁴Madimi awanyana achidi kwamwa anakakeli mundakwila nampwila. Anyana anyanya hiyakulomba yakudya niwakuyihumwinayi nehi.

⁵Adiilaŋa yawanta anashakami dehi makasa munshiŋu munyikwakwa. Alelelaŋawu nakuvwala mahina achinana lelu hiyakukumbata mazalelu.

⁶Kuluwa kwamwana kawantaŋa jami wamumbanda, kunabadiki nshidi yaSodoma ajilumwinuwu kapinji kanti hohu, chakadi kukwataku makasa.

⁷Ayilolu yindi adiŋi atooka to-o kubadika mpeza, adiŋi atooka to-o kubadika mayeli, nyijimba yawu kuchinana kubadika marubi, yakulezumwisha neyi kasafira.

⁸Kumesu awu kuneyili dehi bwi kubadika mwidima; hiyayiluka nawa munyikwakwaku. Ikowa dawu dinalamati dehi kumafwahawu, dinakonyati dehi, dinabalumuki dehi neyi mutondu.

⁹Akujahawu nampoku yakabali amawahi, akujahawu nanzala atama; muloŋa wena adi nakuya nakunoŋa wushikishiki, ayipwika dehi zwa-a nákubula yakudya yamumaha.

¹⁰Makasa awambanda aluwi anateleki anyanawu. Diyi mbiji yawu hajilumukilaŋa mwana kawantaŋa jami wamumbanda.

¹¹Yehova nawanishi dehi kulendumuka kwindi, nechili dehi kuzuwa kwindi kwasweja, nabutuli dehi kesi muZiyona, kanalashi dehi niyikuku yawu.

¹²Anyanta ahamaseki, hela akwakushakama munu mwishina ejima, niwena hiyetiyili nawu mukwankunyi wukutwesha kwijila muyisu yampwembu jaYerusalemaku.

¹³Chinafumi hanshidi jawatuprofwetu twindi, nihakuluwaluwa kwawatupristu twindi, apwekesheli mashi awantu aloŋa mukachi kamukala.

¹⁴Hiyakupuputa neyi amputamesu munyikwakwa, atama dehi namashi, chakwila niantu kutwesha kukwata kumahinawu nehi.

¹⁵Ayibidikili nawu, Fumenukwo! Majilwo! Fumenukwo! Fumenukwo! Bayi muyikunkakwo! Chadiŋi nakutemukawu nakulumbalumba, antu amunyuza elilaŋa nawu, Bayi ashakama nawa cheŋi kunuku.

¹⁶Kuzuwa kwaYehova kwokunayipalaŋeshi, hakayitala nawa cheŋuku. Hiyalemesheli atupristu kumesu awuku, hiyatiyilili awakulumpi luwuku.

¹⁷Mumesu etu saŋa mwomina chau nakutalila wukwashi wakuhemesha, chitwatalililaŋa komana twatalililaŋa muza wákubula kutwesha kutwamwina.

¹⁸Adi nakutuzombazomba mutwayaloŋa, mwaka tukaŋanyi kwenda munyikwakwa yetu. Kukuma kwetu kudi kwakwihi, mafuku etu anawani, muloŋa kukuma kwetu kunashiki.

¹⁹Akwakutuhaŋa abadika ambuulu ahaluzwizu lufuchi. Atukupishili hamapidi, atubelaminini mwisaŋa.

²⁰Múuya wamumazulu etu, yowu awayishawu manji kudi Yehova, amukwatili mumakelawu; yowu twateneni netu, Muwulelu windi dimu twakahandila mukachi kanyuza.

²¹Eyi mwana kaEdomi wamumbanda washakama mwituŋa daUzi, luŋaku, tiyaku kuwaha, lupasa lwakahita lwakashika nikudeyi nawa. Wakasheta, wakadivúula, wakekala nzekesi.

²²Eyi mwana kaZiyona wamumbanda, kubabesha kwakukubabesha nakuluwa kweyi kunawani dehi. Hakakutwala nawa cheŋi muwukoluku. Eyi mwana kaEdomi wamumbanda, wakakubabesha nakuluwa kweyi, wakabutulula nshidi jeyi.