Read MUKANDA WANZAMBI Malilo 5 Bible Online

Malilo 5 - MUKANDA WANZAMBI bible

Malilo 5

¹Eyi Yehova, anukaku yuma yinatuwani. Talaku wumoni chitukusawuka.

²Wuswana wetu wunabalumuki dehi hiwambala wawantuacheŋi, mataletu hiyambala awantu akunyuza yacheŋi.

³Tuyanshona akadi atata, amama jetu adi neyi antuluwa.

⁴Meji twanwaŋa akulanda namali; nchawa jetu jakulanda.

⁵Anatuhaŋi hiyadi nihanshiŋu jetu njika! Tunazeyi, hitunamoni kunookaku.

⁶Tunayolweli aEjipitu nawaAshuri makasetu, netu atwikutishi yakudya.

⁷Atata jetu anavulumuni, hiyadi nawa kwokuku, tunakooli dehi kuluwaluwa kwawu.

⁸Hiyakutuyula kudi anduŋu; hikudi muntu wakutupulwisha mumakasawuku.

⁹Etu kumona yakudya yetu chiŋa kuhita haheni hawufu, muloŋa wampoku yakabali yidi mwisaŋa.

¹⁰Ikowa detu deyila dehi wuloloomba bwi neyi ŋiku nanzala yinasweji kutwocha.

¹¹Asawishili aŋodi jambala muZiyona, niajiki munyikala yaYuda.

¹²Akudikilili atulamba kuchikasa; hiyalemesheli awakulumpi kumesu awuku.

¹³Anyikwenzi hiyakusendaŋa mayanda, anyana hiyakudimbokaŋa nanchawa.

¹⁴Akulumpi hiyanamoni nawa kuya kuyotaku, anyikwenzi hiyanamoni nawa kwimba tumina twawuku.

¹⁵Kuzaŋajala kwamunyichima yetu kunakumi, ŋoma jetu jinabalumuki dehi kudila.

¹⁶Chibaŋula chinaholoki dehi kunamutu wetu. Yayo etu akwawu! Tunavulumuni.

¹⁷Hachumichi dihu hanazeyeli nyichima yetu, hayumiyi nihu hanafumunukili mesu etu.

¹⁸Muloŋa hampidi yaZiyona haneli dehi kwachihembi hohu, hihambala hakwendela nyumbu hohu.

¹⁹Eyi Yehova, eyi washakama nyaka yejima, itanda deyi dawanta delaŋa difuma kwikiŋu idi, diya nawa kwikiŋu di kwawu.

²⁰Wunatuvulamenidi haya nyaka? Wunatulekelidi mafuku ashikaha?

²¹Eyi Yehova, tubalumuni tutali kudeyi, twakabalumuki. Tubalumwini mafuku etu ekali amaha neyi hanyaka.

²²Eyi kweyi wunatúumbi dehi kweyi chikupu, wunasweji kutuzuwila.