Read MUKANDA WANZAMBI Ezekiele 11 Bible Online

Ezekiele 11 - MUKANDA WANZAMBI bible

Ezekiele 11

¹Spiritu yaYehova hakunfumisha heseki, hakuntwala kwiwulu, hakuntwala kuchisu chakwitala daYehova chakumusela, chochatalakumusela. Kutala kuwiŋililu wakuchisu kudi amayala makumi ayedi natanu. Mukachi kawu hinukumonamu mwana kaAzuri Yazaniya, nimwana kaBenaya Pelatiya, atulamba twawantu.

²Hakuŋila nindi, Eyi mwana kamuntu, wenawa diwu antu adi nakukasakasa yakuluwa, adi nakuleja akwawu mpùŋa yatama mumukaliwu.

³Diwu elaŋa nawu, Hakutuŋila matala kanda. Nawu, Mukaliwu hiinuŋu, etu yetu mbiji.

⁴Dichi eyi mwana kamuntu, profwetaku nsaŋu jakuyizuwila, profwetaŋa.

⁵Spiritu yaYehova hakuholokela hadami, hakuŋila nindi, Hoshaku neyi, Yehova nahoshi nindi, Enu akwamutaŋa waIsarela munahoshi dehi mwenimu; muloŋa ami neluka yuma yenzaŋa munyichima yenu.

⁶Akwenu munajahajahi munayivulishi mumukaliwu, munyikwakwa munenzeshumu akwenu munajahajahi.

⁷Dichi Mwanta Yehova nahoshi nindi, Akwenu munajahajahi munalumbeki mukachi kamukala, diwu anekali mbiji, mukaliwu diyi inuŋu; hakwila enu aweni akayifumishamu.

⁸Enu mwatiyili woma wampoku yakabali, ami nakayiletela yoyi mpoku yakabali. Dimu mwanahoshiyi Mwanta Yehova.

⁹Ami nakayifumishamu, nakayihana kudi antu akumatuŋa acheŋi, nakayikoŋa mwomwayisompesheleluwu.

¹⁰Mwakadimbuka nampoku yakabali. Nakayisompesha muŋinza yaIsarela. Himwakeluka nenu yami Yehova.

¹¹Mukaliwu hiwakekala inuŋu yenuku, ninenu himwakekala mbiji yidumuku. Nakayisompesha muŋinza yaIsarela.

¹²Mwakeluka nenu yami Yehova. Muloŋa enu himunendi munshimbi jamuku. Himunakoŋi mwaya wuŋaji wamuku, ilaŋa munakoŋi mwaya yijila yanyuza yayinyeŋumuka kwi-ndo.

¹³Chinelili nidi nakuprofweta, mwana kaBenaya Pelatiya hakufwa. Hinukudimbuka chamesu ami heseki, hinukubilela nezu deneni, nami, Ala Mwanta Yehova! Keŋa wumanishi aIsarela anashaluku, tahindi?

¹⁴Izu daYehova hidikwinza kudami,

¹⁵nindi, Eyi mwana kamuntu, ana kweyi, wowu ana kweyeyi, wowu awusoku weyeyi aweni, niakwamutaŋa waIsarela wejima wawu, diwu aneluwu kudi ekala kuYerusalema, nawu, Fumenu kudi Yehova muyi kwakulehi nayena. Ituŋiidi anatwinkidu diikali detu.

¹⁶Dichi hoshaku neyi, Mwanta Yehova nahoshi nindi, Hela nayifumisha dehi kunu nakuyitwala kwakulehi mwahita nyuza, hela nayiŋalaŋesha dehi mwahita matuŋa, hela chochu, kudi wena ami nekali malalawu kapinji kantesha mumatuŋa mwayawu.

¹⁷Dichi hoshaku neyi, Mwanta Yehova nahoshi nindi, Nakayipompesha nakuyifumisha munyuza yawantu, nakayikumaŋeja, nakuyifumisha mumatuŋa mwayiŋalaŋesheleluwu, nakayinka ituŋa daIsarela.

¹⁸Akenza kwenoku, akafumishaku yuma yawunyeŋu yejima yiduku, niyishimashima yejima yiduku.

¹⁹Nakayinka wena muchima wumu, nakasha spiritu yayiha mudenu. Nakafumisha muchima welola mumujimba wawu, nakayinka muchima wamusunyi,

²⁰kulonda akendaŋa munshimbi jami, akahembaŋa mwaya yiyulu yami, akelaŋamu. Hiyakekala antu ami, ninami nakekala Nzambi yawu.

²¹Hakwila akweti muchima wayaloŋa mwaya yuma yawu yawunyeŋu niyishimashima yawu, nakayiletela hanyitu yawu yuma yawu yelaŋawu.

²²Dimu mwanahoshiyi Mwanta Yehova. Akerubi anyamuna nimpuula jawu, tufumbu saŋa tudi kumbavu jawu. Kulema kwaNzambi yaIsarela kudi hewulu dawu.

²³Kulema kwaYehova hikukunyamuka mukachi kamukala, hikukuya nakwimana hampidi yidi kumbadi yamukala yakumusela.

²⁴Spiritu hakunnyamuna kwiwulu, hakuntwala kuKaladeya kudi ayili muwukoli, antweli muchimwenu, chakuntwala kudi Spiritu yaNzambi. Chimwenu ochu chinamweni hichikunyamuka kwiwulu, hichikunfuma.

²⁵Hinukuleja atweluwu muwukoli yuma yejima yanmwekesheleliyi Yehova.