Read MUKANDA WANZAMBI Ezekiele 12 Bible Online

Ezekiele 12 - MUKANDA WANZAMBI bible

Ezekiele 12

¹Izu daYehova denjili nawa kudami,

²nindi, Eyi mwana kamuntu, wunashakami mukachi kamutaŋa wadikaŋa, mesu akumona akweti, ilaŋa hiyamonaŋaku, matu akutiya akweti, ilaŋa hiyatiyaloŋaku; muloŋa wena himutaŋa wadikaŋa.

³Dichi eyi mwana kamuntu, ioŋcjaku yuma yatuntukaŋayi nachu muntu, wutuntuki namwaana, iku adi nakutala; wakatuntuki kweyi kuwekala, iku adi nakutala. Wamba kela akatoŋojoka chachiwahi, hela himutaŋa wadikaŋa.

⁴Wakedishi yuma yeyi namwaana, iku adi nakutala, neyi yuma yatuntukaŋayi nachu muntu. Wakediki kweyi namelela, iku adi nakutala, neyi chedikaŋawu antu atwalaŋawu muwukoli.

⁵Pundaku hampwembu wuyilokoli, iku adi nakutala, widishilumu yuma.

⁶Wakayisendi hachifwiji cheyi, iku adi nakutala, wakayitwali hakabwidibwidi. Wakabuta kumesu eyi kulonda wakabuli kumona heseki. Muloŋa ami nakushumu dehi wikali chinjikijilu chakutalila mutaŋa waIsarela.

⁷Hinukwila mwanlejeluwu. Hinukwidisha yuma yami namwaana, neyi yuma yatuntukaŋayi nachu muntu, hinukupunda hampwembu nachikasa chami, hinukuyilokola. Hinukwidisha yuma hakabwidibwidi, hinukuyisenda hachifwiji chami, iku adi nakutala.

⁸Habudidi izu daYehova hidikwinza kudami,

⁹nindi, Eyi mwana kamuntu, iwu mutaŋa waIsarela, iwu mutaŋa wadikaŋa, kukwihula nawu, Wudi nakwila ŋahi; nehi?

¹⁰Kayili neyi, Mwanta Yehova nindi, Idi izu dinateni kalamba wudi muYerusalema, nimutaŋa waIsarela wejima washakamawu nawu.

¹¹Hoshaku neyi, Yami chinjikijilu chenu. Munelami dimu mwakayilawu ninenu. Akayitwala mumpata yacheŋi muwukoli.

¹²Kalamba wudi mukachi kawu niyena wakasenda chiteli hachifwiji chindi hakabwidibwidi, wakedika kwindi. Akapunda hampwembu, akalokola mwakwidishila yuma. Wakabuta kumesu indi, muloŋa yena hakamona hamaseki namesu induku.

¹³Nakamutanjika nawa wanda wami hewulu, wakafwa mumuhetu wami. Nakamutwala kuBabiloni kwituŋa dawaKaladeya. Ilaŋa yena hakadimonaku, kutoŋa diku kwakafwilayi.

¹⁴Antu ejima adiyi nawu, akweti mudimu wakumukwashaku, ninyikanka yindi yejima, nakayikuwila mwaya mpepela jejima, nakasomona mpoku yakabali, nakayilondeshamu.

¹⁵Akeluka nawu yami Yehova, chinakayimwaŋila mwahita nyuza, chinakayipalaŋeshela mwahita matuŋa.

¹⁶Ilaŋa kumpoku yakabali, nikunzala, nikuchipupu nakashiyahu antu antesha, kulonda akashimuni yishimashima yawu yejima mwahita nyuza yidi kwakayawu. Akeluka nawu yami Yehova.

¹⁷Izu daYehova denjili nawa kudami,

¹⁸nindi, Eyi mwana kamuntu, dyaku yakudya yeyi nakulukuma, nwaku meji eyi nakuzaala nakwakama.

¹⁹Wakayili antu amwituŋa neyi, Mwanta Yehova nateni antu ashakama muYerusalema nimwituŋa daIsarela, nindi, Akadya yakudya yawu nakwakama, akanwa meji awu nakuhayama, kulonda ituŋa dawu dakekali neyi mahembi, dakubuwa dehi yuma yejima yalumbaminumu, nansaŋu yamadombu awantu ejima ashakamamu.

²⁰Ninyikala yadiŋi nawantu yakashala yamukunkulwayi, niituŋa dakekala kwamahembi hohu. Himwakeluka nenu yami Yehova.

²¹Izu daYehova denjili kudami,

²²nindi, Eyi mwana kamuntu, ichi chishimu chimukweti mwituŋa daIsarela, chakwila nawu, Mafuku anasweji dehi kuvula, niyimwenu yejima muyatwala kumwekana nehi, hichishimwinyi?

²³Dichi kayileji neyi, Mwanta Yehova nindi, Chishimu ichi nakachifumishamu, hiyakachita nawa cheŋi muIsarelaku. Ilaŋa kayili neyi, Mafuku ashika dehi, nimwatwala yimwenu yejima.

²⁴Muloŋa hikwakekala nawa cheŋi chimwenu chamukunkulwayi, hela kuhoŋa kwakulambisha nachu muntu chakutwamba mumutaŋa waIsarelaku.

²⁵Muloŋa yami Yehova nukuhosha, niizu dinukuhosha dakakoŋewa. Muloŋa enu akwamutaŋa wadikaŋa, mumafuku enu nukuhosha izu, nikukoŋa nukudikoŋa. Dimu mwanahoshiyi Mwanta Yehova.

²⁶Izu daYehova denjili kudami cheŋi nawa,

²⁷nindi, Eyi mwana kamuntu, tiya, antu akumutaŋa waIsarela nawu, Chimwenu chanamoniyi muchidi mafuku amavulu, wudi nakuprofweta nsaŋu janyaka yichidi kwakulehi.

²⁸Dichi kayili neyi, Mwanta Yehova nindi, Kwosi mazu ami akalaba nawa chepuku, izu dinakahosha dakakopewa. Dimu mwanahoshiyi Mwanta Yehova.