Read MUKANDA WANZAMBI Ezekiele 13 Bible Online

Ezekiele 13 - MUKANDA WANZAMBI bible

Ezekiele 13

¹Izu daYehova denjili kudami,

²nindi, Eyi mwana kamuntu, profwetaku nsaŋu jakuzuwila atuprofwetu awaIsarela adi nakuprofweta. Wakayili wena adi nakuprofweta chamunyichima yawu awenawu, neyi, Tiyenu izu daYehova.

³Mwanta Yehova nindi, Yayo, owu atuprofwetu asuŋa alondaŋa spiritu yawu awenawu, chakadi nichuma chanamonuwu!

⁴Enu aIsarela, atuprofwetu twenu adi neyi nyumbu yekala muyinkalampata yamukunkulwayi.

⁵Himunemani mumapwata ekoluku, himunatupululi ikoli dakumutaŋa waIsarelaku, himunemani kunjita mwifuku daYehovaku.

⁶Anamoni yuma yakuhemesha, nikuhoŋa kwakutwamba, awa akwila nawu, Yehova nindi; kutoŋa Yehova hanayitemeshuku. Analeteshi antu kukuhwelela, nawu izu dakakola.

⁷Ichi chimukwila nenu, Yehova nindi; komana ami hinahoshuku; himunamoni chimwenu chamukunkulwayuku? Himunahopi mwakutwambaku?

⁸Dichi Mwanta Yehova nindi, Ochu chimunahoshi yakuhemesha, nichimunamoni yakutwamba, dichi tiyenu, ami nidi nenu nandombu. Dimu mwanahoshiyi Mwanta Yehova.

⁹Awa atuprofwetu amonaŋa yuma yakuhemesha, ahoŋaŋa yakutwamba, chikasa chami chakekala nawu nandombu. Hiyakekala hampùŋa yawantu amuku, hela kuyisoneka mwasonekaŋawu mutaŋa waIsarela nehi, hela kwipila mwituŋa daIsarela hiyakepila mwoku. Mwakeluka nenu yami Mwanta Yehova.

¹⁰Dihu henaha, eŋa, dihu henaha hanaluwishiluwu antu ami, nakwila nawu, Kwamwena; komana kwosi kumwenaku; neyi chelaŋa muntu wudi nakutuŋa mpwembu yakadi mudita, kutala hiyakuyimacheka mpeza yamukunkulwayi.

¹¹Kayili awa adi nakuyimacheka mpeza yamukunkulwayi, neyi, Yakakunduka. Neyi, Kwakenza nvula yikweti nicheji. Ninenu malola anvula amaneni mwakaholoka. Mpepela yaŋovu yakayibalula.

¹²Tiyenu, chakakunduka mpwembu akayiihula nawu, Iku kumacheka kumwamachekeli kudi kudihi?

¹³Dichi Mwanta Yehova nahoshi nindi, Nakayibalula nampepela yaŋovu, nakulendumuka kunakalendumuka. Kwakanoka nvula yikweti nicheji nakuzuwa kunakazuwa, kwakanoka nimalola anvula amaneni nakulendumuka kunakalendumuka, kulonda kuyikisaŋana.

¹⁴Dichi nakahumuna mpwembu yimwamachekeli nampeza, nakayikundula heseki, kulonda chikuku chayu chakamwekani ta-lamba! Mwakeluka nenu yami Yehova.

¹⁵Dimu nakamanishila kulendumuka kunakalendumukila mpwembu, nikunakalendumukila awa ayimachekeli mpeza. Hinakayila nami, Mpwembu yinayi, ninawa ayimachekeli anayi,

¹⁶wowu atuprofwetu awaIsarela aprofwetaŋa nsaŋu jaYerusalema, amumwena yimwenu yakwila nawu, Kudi kumwena; komana kumwena kwosi. Dimu mwanahoshiyi Mwanta Yehova.

¹⁷Dichi dinu eyi mwana kamuntu, awa ambanda, anyana kawakwenu, aprofwetaŋa chakunyichima yawu awenawu, yitali naŋovu, wuprofweti nsaŋu jakuyizuwila,

¹⁸neyi, Mwanta Yehova nindi, Yayo, owu ambanda achimaŋa masaku akuŋakata munkwaha jejima, atuŋaŋa yitambala yakusha kunyitu yawantu niataluka niabula kutaluka, kulonda kuzomba nachu wumi wawantu! Muzombaŋa tuhu wumi wawantu ami, mupulwishi tuhu wumi wawantu kulonda ekali enwenu?

¹⁹Enu munantamishi dehi mukachi kawantu ami, nakukoola tumasa twamuchikasa hela tuyakudya, kulonda mujahi wumi wawantu abula kutela kufwa, muhandishi nawa wumi wawantu abula kutela kuhanda, nakutwambatwamba kwenu kumwatwambaŋa kudi antu ami atiyililaŋa yuma yenu yakutwamba.

²⁰Dichi Mwanta Yehova nindi, Tiyenu, masaku enu imwazombaŋa nachu wumi wawantu kulonda kuyitúukisha, ami kwami kuyikeŋa nehi, nakayitabola kumakasenu, nakasubula wumi wawantu wakayi kwawu, wowumi wumwazombaŋa kulonda kuwutúukisha.

²¹Niyitambala yenu nakayitabola, nakapulwisha antu ami kumakasenu, hiyakekala nawa cheŋi kumakasenu kulonda kuyizombazombaku. Mwakeluka nenu yami Yehova.

²²Muloŋa nyichima yawantu aloŋa yinabulili kuneŋesha ami, enu munayineŋeshi dehi nakutwambatwamba. Munakoleshi makasa awantu atama kulonda abuli kuleka munjila yawu yatama ahandi.

²³Dichi himwakamona nawa cheŋi yuma yakuhemeshaku, himwakahoŋahoŋa nawa cheŋuku, muloŋa ami nakayipulwisha antu ami kumakasenu. Mwakeluka nenu yami Yehova.