Read MUKANDA WANZAMBI Ezekiele 14 Bible Online

Ezekiele 14 - MUKANDA WANZAMBI bible

Ezekiele 14

¹Akulumpi awaIsarela amakwawu enjili nakushakama kumesu ami.

²Izu daYehova hidikwinza kudami,

³nindi, Eyi mwana kamuntu, awa antu asha dehi akishi awu munyichima yawu, chuma chakuluwa kwawu chadimbukilaŋawu achisha dehi kwakuyawu, diwu antu akuŋihulami kalusaŋu kwaamu?

⁴Dichi hoshaku nawu, wuyili neyi, Mwanta Yehova nindi, Antu ejima akumutaŋa waIsarela ashaŋa akishi awu munyichima yawu, ashaŋa kwakuyawu chuma chakuluwa kwawu chadimbukilaŋawu, hiyakwinza nikudi kaprofwetu, ami Yehova nakayakula mwavulila akishi awu akutuŋa,

⁵kulonda nakakwatili mutaŋa waIsarela munyichima yawu awenawu, nanochu chadambulawu dehi nanami wejima wawu nansaŋu yawakishi awu.

⁶Diclii yili akwamutaŋa waIsarela, neyi, Mwanta Yehova nindi, Funtenu, futalelenu akishi enu akutuŋa, teŋululenu mesu enu mubuli kutala yishimashima yenu yejima.

⁷Muloŋa antu akumutaŋa waIsarela ejima, niantu akwacheŋi ashakama muIsarela akudambula kudami, akusha akishi awu munyichima yawu, akusha kwakuyawu chuma chakuluwa kwawu chadimbukilaŋawu, hiyakwinza nikudi kaprofwetu nakwihula nsaŋu jindi kudami, ami Yehova nukumwakula ami aweni.

⁸Muntu owu nukumutala naŋovu, nukumubalumuna wukwikala wakuhayama kudi akwawu, wukwikala chinjikijilu nichishimu, hadi antu ami nukumufumishahu. Mwakeluka nenu yami Yehova.

⁹Neyi kaprofwetu anamudimbi, hakuhosha niizu, ami Yehova yami inamudimbi owu kaprofwetu, nakamwolwela chikasa chami, nakamukisaŋana mukachi kawantu ami aIsarela.

¹⁰Akakoola kuluwa kwawu; kuluwa kwanowu kaprofwetu kwokumu nakuluwa kwamuntu wukuya nakwihula kudi yena;

¹¹kulonda mutaŋa waIsarela wakabuli kupwapuka cheŋi kudami, hela kuditamisha cheŋi nanyiloŋa yawu yejima; kulonda akekali antu ami, ninami nakekali Nzambi yawu. Dimu mwanahoshiyi Mwanta Yehova.

¹²Izu daYehova denjili kudami,

¹³nindi, Eyi mwana kamuntu, neyi ituŋa dimu dinavulumuni dehi muloŋa wakumotoka lushimbi lwami, ami nadolweli dehi chikasa chami, nakeheshumu dehi niyakudya, natemeshumu dehi ninzala, najilumunumu dehi niantu niayimuna;

¹⁴hela mukwikala awa amayala asatu niNowa, niDanyeli, niYoba, akupulwisha kwawumi wawu awenawu hohu nakuloŋa kwawu. Dimu mwanahoshiyi Mwanta Yehova.

¹⁵Neyi ami nahitishi mwituŋa anyama atama, anakwatakwatumu dehi chakwila mwila kwamahembi hohu, mwakadi nikuhita muntu nansaŋu yawenowu anyama;

¹⁶hela mukwikala awa amayala asatu, chinahandichi kwaamu, ami Mwanta Yehova nahoshi dehi, nami hiyakapulwisha hela anyana amayala hela anyana awambandaku, akadiŋulwisha awenawu hohu, ituŋa dakekala kwamahembi hohu.

¹⁷Hela neyi ami naleti dehi mpoku yakabali mwituŋa odu, nayili dehi nami, Eyi mpoku, hitaku mwituŋa odu, chakwila ami nafumishamu dehi niantu, niayimuna;

¹⁸hela mukwikala awa amayala asatu, chinahandichi kwaamu, ami Mwanta Yehova nahoshi dehi, nami, hiyakapulwisha hela anyana amayala hela anyana awambandaku, akadiŋulwisha awenawu hohu.

¹⁹Hela neyi ami natemeshi dehi chipupu mwituŋa odu, nechiluhu dehi kulendumuka kwami kwamashi kulonda kufumishamu niantu niayimuna;

²⁰hela mukwikala niNowa, niDanyeli, niYoba, chinahandichi kwaamu, ami Mwanta Yehova nahoshi dehi, nami, hiyakapulwisha hela mwana weyala hela mwana wamumbandaku, akapulwisha kwawumi wawu awenawu hohu nakuloŋa kwawu.

²¹Muloŋa Mwanta Yehova nindi, Indi chinakatemesha muYerusalema kubabesha kwami kuwana, nimpoku yakabali, ninzala, nianyama atama, nichipupu, kulonda nifumishumu niantu nianyama, hichakaswejaku?

²²Hela chochu, tiyenu, mwakashala antu antesha akafumishawu mwenomu, nianyana amayala nianyana awambanda akafumamu, akayiwana kunu, mwakamona nimwendaŋawu nimwelaŋawu; akayikundeja nakutama kunaleteli Yerusalema, ninayuma yejima yinaletumu.

²³Chimwakamona mwendaŋawu nimwelaŋawu akayikundeja. Mwakeluka nenu yuma yejima yinakoŋi mwenomu hinayikoŋi kwami chamukunkulwayuku. Dimu mwanahoshiyi Mwanta Yehova.