Read MUKANDA WANZAMBI Ezekiele 16 Bible Online

Ezekiele 16 - MUKANDA WANZAMBI bible

Ezekiele 16

¹Izu daYehova denjili nawa cheŋi kudami,

²nindi, Eyi mwana kamuntu, mwilukishi Yerusalema yishimashima yindi,

³neyi, Mwanta Yehova namwili Yerusalema nindi, Kuvwalika kweyi nikusemuka kweyi kwamwituŋa daKenani. Tata yeyi kaAmori, mama yeyi kaHiti.

⁴Hakusemuka kweyi ifuku diwavwalikili hiyakuketwili mukwa weyuku, hiyakuwchesheli mumeji kulonda akufumishi majiluku. Hiyakukwitiluhu hela tumuŋwa hela kukubutaku.

⁵Ifuku diwavwalikili eyi, hosi wakutalili naluwi lwakukwila yumiyi, hela kukutiyila wushonaku, akunatilili tuhu hampata yamukunkulwayi nawunyeŋu watiyiluwu mujimba weyi.

⁶Chinahitili kuwadiŋi, nakumweni wudi nakudiputa mumashi eyi, nakwilili nami, Hela wudi mumashi eyi, handaku; mwalala, nakwilili nami, Hela wudi mumashi eyi, handaku.

⁷Nakuvulishili neyi nyitombu yamumpata, hiwukuvula, hiwukwikala muneni, wushika nihakudileŋaleŋa, hiwukusela nimayeli, nsuki jeyi jileha nikuleha, eyi muntu wadiŋi nzekesi chakadi nichuma chakuvwala.

⁸Chinahitili kuwadiŋi, chinakutalili, namweni mwaka weyi wakukeŋa washika dehi. Hinukwala ihina dami hadeyi, hinukukubuta nachina chiwadiŋi nzekesi. Mwalala, hinukusanyika kudeyi, hinukutiyaloŋana naneyi chitiyaŋenu, hiwukwikala wamami. Dimu mwanahoshiyi Mwanta Yehova.

⁹Nakuwelesheli meji; mwalala nakuwelesheli nakukufumisha mashi eyi iwadipi nawu, nakuwayishili nimanji.

¹⁰Nakuvwikili mahina akusowasowa, kunyendu yeyi nashiluku yitembi yanzunzu, nakukasili mumbunda ihina dadiwahi, hinukukubuta naswala.

¹¹Nakukudekeli yingelingeli, nakuvwikili yikomu kumakaseyi, nikadilepi kunshipu yeyi.

¹²Nakushili kazeya kumazulu eyi, nimashikinyi kumatu eyi, nichibapula chalubanji kunamutu weyi.

¹³Wadipi wakukudeka wuru nasiliva. Yuma yeyi yakuvwala wowu mahina amawahi, najiswala, namahina akusowasowa. Wadiilaŋa wuŋa walembuluka hohu, niwuchi, nimanji. Wadipi wasweja lubanji, wamweni kuwaha ho-o nichiwashikili kuwanta.

¹⁴Mpuhu yalubanji lweyi yatiyakeni munyuza yejima ti-i. Muloŋa lwadipi lwashikamu chikupu nawukelepi wami wunakushilili. Dimu mwanahoshiyi Mwanta Yehova.

¹⁵Ilaŋa eyi kweyi hiwukukuhwelela lubanji lweyi, hiwukwila wuvumbi nanichi chiwunatiyakani dehi, hiwukwichila mawuvumbi eyi hadi antu ejima akuhita, wukuhita yowu hiyindi hohu.

¹⁶Hiwukunona yuma yeyi yakuvwala, hiwukwila nachu yinaŋanaŋa yakuwahisha nawulombu wepi nawepi, hiwukwililahu niwuvumbi; yuma yakadi kumonaŋahu dehi, nikumbidi hiyamba kekala kwoku.

¹⁷Yuma yeyi yasweja kuwaha yaleuwuru wami nikusiliva yami yinakwinkeli, hiwukuyinona hiwukwila nachu akishi awamayala, hiwukwila nawu wuvumbi;

¹⁸hiwukunona mahinami akusowasowa hiwukuyivwika, hiwukusha manji ami niinsensi yami kumesu awu.

¹⁹Yakudya yami nakwinkeli, wuŋa walembuluka, nimanji, niwuchi, yinakudiishilaŋa, hiwukuyisha kumesu awu yiikali yevumba dadiwahi; dimu chadiŋi. Dimu mwanahoshiyi Mwanta Yehova.

²⁰Hiwukunona nianyaneyi amayala nawambanda iwunanvweli, hiwukuyiketwila akishi eyi kulonda akayidyi.

²¹Komana mawuvumbi eyi anakehi dehi, winzi wulunjikuku kujaha nianyanami, hiwukuyihanahana, kulonda wuyihitishi mukesi ayi kudi akishi eyi?

²²Chiwelilaŋa yishimashima yeyi yejima nimawuvumbi eyi, hiwaanukili mafuku akuwansi weyi, iwadipi nzekesi chakadi nichuma chakuvwala, iwadipi nakudiputa mumashi eyuku.

²³Kulondesha hakutama kweyi kwejima Mwanta Yehova nindi, Yayo, yayo eyi!

²⁴hiwukutuŋa niitala dahewulu, hiwukwila niyinaŋanaŋa yeyi munyikwakwa yejima.

²⁵Hiwukutuŋa yinaŋanaŋa yeyi kumaakenu ejima, lubanji lweyi hiwukulubalumuna lwikali chishimashima, antu ejima akuhitaku hiwukuyikezalela nyendu yeyi, hiwukuvulisha niwuvumbi weyi.

²⁶Mwela dehi wuvumbi nawakwenu aEjipitu mwadihata nawu, akweti nyijimba yamaneni; ochu chiwunavulishi wuvumbi weyi wunalondi wunvuloki nizuwi.

²⁷Dichi dinu tiya, nakwolweli dehi chikasa chami, nakukehesheli dehi yuma yakudya yinakwinkaŋa, nakuhani dehi kudi awa abula kukukeŋa akukoŋi mwanakepuwu, awa anyana kawaFwilistinu anatiyi nsonyi yakubajama kweyi.

²⁸Wuneli nawa wuvumbi nawaAshuri, muloŋa mpwila yeyi hiyaketukaŋaku. Mwalala, wuneli nawu wuvumbi, hela chochu, mpwila yeyi kuketuka nehi.

²⁹Wunavulishi nawa wuvumbi weyi mwituŋa daKenani, ndo nikuKaladeya, hela chochu, hiwunaketwishi nachu mpwila yeyuku.

³⁰Mwanta Yehova nindi, Owu muchima weyi kuzeya chiwelaŋa yuma yejimiyi, hinyidimu yamumbanda wachivumbi wakeŋa a mwindi yena hohu;

³¹chiwatuŋaŋa matala ahewulu kumaakenu ejima, welaŋa yinaŋanaŋa yeyi munyikwakwa yejima, hiwunakumini muchivumbuku, muloŋa eyi wadiwulaŋa nyondami.

³²Mumbanda wukushiya nfumwindi ayi nakwila wuvumbi neyala wacheŋi! Wukuhipisha antu akwacheŋi mwadipi nfumwindi!

³³Ayivumbi ejima ayinkaŋa yamukunkulu, hakwila eyi yeyi wenkaŋa amayala akukeŋa yamukunkulu yeyi, hiwukuyifumba nakuyifweta kulonda akenzi kudeyi mbadi jejima, akeli wuvumbi naneyi.

³⁴Wuvumbi weyi wacheŋi, wunaambuki nawawakwenu ambanda, muloŋa kwosi muntu wakulondaŋa eyi, nindi eli neyi wuvumbuku; muloŋa eyi yeyi wahanaŋa nyondanu, kwosi wakwinkaŋa eyi nyondanuku, dimu muwunaambukili nawakwenu.

³⁵Dichi eyi chivumbi, tiyaku izu daYehova.

³⁶Mwanta Yehova nahoshi nindi, Ochu chiwunakumini dakumwaŋa majilu eyi, ihepu deyi hidikumwekana nihatooka nawuvumbi weyi welaŋa nawatujila tweyi; nimuloŋa wawakishi akutuŋa ejima ayishimashima yeyi, niwamashi awanya neyi iwenkelaŋa akishi.

³⁷Dichi tiya, nakapompesha atujila tweyi ejima iwaditiyishilaŋa nawu kuwaha, niantu ejima iwakeŋelaŋa, hamu nawantu ejima iwunaheli; nakayipompesha kudeyi mbadi jejima, nakamwekesha ihepu deyi kudi wena kulonda wejima wawu akamoni ihepu deyi.

³⁸Nakakusompesha neyi chasompeshaŋawu apodi jawantu akwila wuvumbi nawamayala acheŋi, niakupwekesha mashi. Nakakuletela mashi akulendumuka, niamukawu.

³⁹Nakakuhana kudi wena, akasanda itala deyi dahewulu, akahumona yinaŋanaŋa yeyi, akakuvúula mahineyi, akakutambula yuma yeyi yalubanji, akakushiya nzekesi chakadi nichuma chakuvwala.

⁴⁰Akakukandwishila chendu chawantu, akakwasola malola, akakuhanwisha mpoku jawu jatubali.

⁴¹Akwocha mataleyi nakesi, akakubabesha kumesu awambanda amavulu; nakakumisha wuvumbi weyi welaŋa, hiwakondaŋa nawa chepuku.

⁴²Dimnakamanishila kulendumuka kwami kunakakulendmukila, nimukawu wami wakakufuma, nakamwena kwami zo-o, hinakazuwa nawa chepuku.

⁴³Chinafumi hákubula kwanuka mafuku akuwansi weyi, muloŋa wunankabishi nayuma yejimiyi. Dichi dinu tiya, Mwanta Yehova nindi, Ami nawanakaleta hanamutu weyi yuma yeyi yiwelaŋa; hayishimashima yeyi yejima hiwakalunjikahu nawa cheŋi chumichi chakubajamaku.

⁴⁴Tiya chishimu chakakutilawu kudi antu ejima ataŋa yishimu, akela nawu, Chekala mama yamuntu, dichi chekala nimwanindi wamumbanda.

⁴⁵Yeyi mwana wamumbanda wukweti mama yeyi wahelaŋa nfumwindi nawanyanindi; yeyi mumbanda wukweti ana kweyi ahelaŋa anfumu jawu nawanyanawu. Mama yeyi kaHiti, tata yeyi kaAmori.

⁴⁶Yaya yeyi wamumbanda diyi Samariya washakama kuchikasa cheyi chachimunswa, niyena nianyanindi awambanda. Mwanyikeyi wamumbanda washakama kuchikasa cheyi chachidiilu, diyi Sodoma nawanyanindi awambanda.

⁴⁷Hiwunakumini mwelilaŋawu wenaku, hiwunakumini dakukoŋa mwaya yishimashima yawuku. Mwenomu munakehi dehi nankashi. Muyuma yejima yiwelaŋa wunaditokeshi chakubadika wena.

⁴⁸Mwanta Yehova nindi, China handichi kwaamu, hela mana kweyi Sodoma, hela anyanindi awambanda, hiyaneli chiwuneleyi nawanyaneyi awambandaku.

⁴⁹Tiya dinu kuluwa kwamana kweyi Sodoma; kudi yena nawanyanindi awambanda kwadipi kudinka wanta, nikusweja kwikuta yakudya, nikushakama nakuluŋa chakadi nyidimu, hiyakolesheli chikasa chakazwepi nawabulyumaku.

⁵⁰Adinikeli wanta, akoŋeli yishimashima kumesu ami, dichi chinamweni chumochu hinukuyifumishahu.

⁵¹Hela Samariya hanakoŋi yashika muchibalu chanshidi jeyuku, eyi wunasweji kuvulisha yishimashima yeyi, wunayibadiki wena, wunayipishi dehi ana kweyi nayishimashima yeyi yejima yiwunakoŋi.

⁵²Eyi nawa yaku nansonyi jeyi, nanochu chiwunaketuli dehi muloŋa wawana kweyi; kunshidi jeyi ŋawunakoŋi wunakopeluku yishimashima yakubadika yawu, wena anakubadiki dehi eyi kuloŋa. Mwalala, kwataku chikasa kukanwa, yaloŋa nansonyi jeyi, nanochu chiwunayipishi dehi ana kweyi.

⁵³Nakayifuntisha cheŋi muwukoli wawu mwayiluwu, wowu wukoli waSodoma nawanyanindi awambanda, niwukoli waSamariya nawanyanindi awambanda, niwukoli wawankoli jeyi adi mukachi kawu.

⁵⁴Kulonda wakayaloŋa nansonyi jeyi, wakatiyaloŋa nsonyi jyuma yejima yiwunakoŋi, nanochu chiwudi nakuyikundeja.

⁵⁵Ana kweyi awambanda, aSodoma nawanyanindi awambanda, akafunta cheŋi mwawu mwadiŋuwu hakusambila, niaSamariya nawanyanindi awambanda akafunta cheŋi mwawu mwadiŋuwu hakusambila, nineyi nawanyaneyi awambanda mwakafunta cheŋi mwenu mumwadipi hakusambila.

⁵⁶Muloŋa mana kweyi Sodoma hiwamutenenaŋa mukanwa keyi ifuku diwadinkelaŋa wantaku;

⁵⁷henohu kutama kweyi kuchidi kanda akumwekeshi hatooka, neyi hakusawiluwu kudi anyana kawaSiriya awambanda, nikudi adiŋiyi nawu kwi-ndo, wowu anyana kawaFwilistinu awambanda akudiwujoleli niniku niniku.

⁵⁸Wunasendi dehi chiteli chakubajama kweyi nayishimashima yeyi. Dimu mwanahoshiyi Yehova.

⁵⁹Muloŋa Mwanta Yehova nindi, Nakakukoŋa muwunakoŋi eyi aweni, eyi wadiwili kusanyika hana hiwajahili chitiyaŋenu.

⁶⁰Hela chochu, nakaanuka chitiyaŋenu chami chinatiyapeni naneyi kumafuku akuwansi weyi, nakakukoleshela chitiyaŋenu chahaya nyaka.

⁶¹Henohu, chiwakatambula ana kweyi awambanda, niyaya yeyi, nimwanyikeyi, wakaanuka mweyi muwelilaŋa, wakatiya ninsonyi. Ninami nakawinkawu akekali anyaneyi, ilaŋa dinu hichakuchitiyaŋenu cheyuku.

⁶²Ami nakakolesha chitiyaŋenu chami naneyi. Wakeluka neyi yami Yehova.

⁶³Chiwakela nakwanakeni dehi yuma yejima yiwunakoŋi, wakaanukaŋa, wakakwata chikasa kuleanwa nansonyi yiwakatiya, hiwakajikula nawa cheŋi mukanwa keyuku. Dimu mwanahoshiyi Mwanta Yehova.