Read MUKANDA WANZAMBI Ezekiele 18 Bible Online

Ezekiele 18 - MUKANDA WANZAMBI bible

Ezekiele 18

¹Izu daYehova denjili nawa cheŋi kudami,

²nindi, Enu mwataŋa chishimu ichi chakutena ituŋa daIsarela, nenu, Atata jawantu anadyi nyikabu yavinyu yabatuka, anyana anatiyi ŋaŋanyi kumaji, mwatwalaŋaa mudihi?

³Mwanta Yehova nindi, Chinahandichi kwaamu, himwakamona nawa cheŋi hawutilu wachishimu ichi muIsarelaku.

⁴Tiyenu, antu ejima amami. Chidi tata yamuntu, dichi nawa chidi mwana kamuntu, ejima amami hohu. Yowu muntu wukuvulumuna diyi wakafwa.

⁵Ilaŋa neyi muntu wukwikala waloŋa, wukwila yaya muwuŋaji nakuloŋa,

⁶hanadiili kumapiduku, hanafumbuli mesu indi atali kudi akishi akutuŋa awakwamutaŋa waIsarelaku, hanatamishi iŋodamukwawuku, hanakundami kwakwihi namumbanda wudi kwitala dikwawuku,

⁷haneli mukwawu chatamaku, ilaŋa namufuntishili mukwamukudi chuma chamwinkeliyi kukwataku, hanabuwi muntuku, wenkelaŋa akwanzala yakudya yindi, wavwikilaŋa akwawuvu,

⁸hanasondamishi yuma yakudiila nŋalanyuku, hela kudiilahu chilunji nehi, nafumishi chikasa chindi kukuheŋa, nakoŋi mwaya wuŋaji mwamuntu namukwawu,

⁹nendi mwaya nshimbi jami, nahembi mwaya wuŋaji wami kulonda kwila mwákubula kutwamba; yena kwindi waloŋa, chalala yena wakahanda. Dimu mwanahoshiyi Mwanta Yehova.

¹⁰Neyi yena wukuvwala mwana weyala wukweti wukombi wekulula, himukwakupwekesha mashi awakwawu, wamwilaŋa mukwawu yumiyi,

¹¹helaŋa nawa yumoyu yikwawuku, ilaŋa yena kwindi nadiili kumapidi, natamishi iŋodamukwawu,

¹²kazwepi nawabula yuma nayili chatama, nabuwi akwawu, hanafuntishili mukwamukudi chuma chamwinkeliyi kukwatakuku, nafumbuli mesu indi atali kudi akishi akutuŋa, nakoŋi chishimashima,

¹³nasondamishi yuma yakudiila nŋalanyi, nadiiluhu chilunji. Yenowu ahandi? Hakahandaku. Nakoŋi dehi yishimashima yejimiyi, chalala wakafwa hohu, mashi indi akamukumina yomweni.

¹⁴Yenowu nawa hakuvwala mwanindi weyala, mwana hakumona nshidi jatata yindi jejima janavulumuniyi, hakutiya woma, kwilamu nehi,

¹⁵hanadiili kumapiduku, hanafumbuli mesu indi atali kudi akishi akutuŋa awakwamutaŋa waIsarelaku, hanatamishi iŋodamukwawuku,

¹⁶hanamwili muntu chatamaku, hanakwatili chuma chamukwamukuduku, hanabuwi akwawuku, yena kwindi nenki akwanzala yakudya yindi, navwiki akwawuvu,

¹⁷hanafumishi chikasa chindi kudi atuzwepuku, hanadyi nŋalanyi hela chilunjuku, nakoŋi mwaya wuŋaji wami, nendi munshimbi jami. Hakafwa nakuluwa kwatata yinduku, yena chalala wakahanda hohu.

¹⁸Hakwila tata yindi, wakabishili akwawu chatama, wabuwili mana kwindi, welili mwakadi kuwaha mukachi kawantaŋa jindi, tiyenu, yena kwindi wakafwa nakuluwa kwindi.

¹⁹Hela chochu, mudi nakwila nenu, Mwana wukubuliladi kukoola kuluwa kwatata yindi? Neyi mwana neli dehi yuma yaya muwuŋaji nakuloŋa, nahembi dehi nshimbi jami jejima nakujila, chalala yena kwindi wakahanda.

²⁰Muntu wukuvulumuna diyi wukufwa. Mwana hakakoola kuluwa kwatata yinduku, hela tata yindi hakakoola kuluwa kwamwaninduku. Kuloŋa kwamukwakuloŋa kwakekala hadi yomweni, kutama kwamukwakutama kwakamukumina yomweni.

²¹Ilaŋa neyi muntu watama wakabalumuka, hakuleka nshidi jindi jejima janavulumuniyi, hakuhemba nshimbi jami jejima, hakwila yuma yaya muwuŋaji nakuloŋa, chalala yena wakahanda, hakafwaku.

²²Nyiloŋa yindi yaneliyi yejima hiyakamutenenayuku, mwaloŋa mwaneliyi dimu mwakahandilayi.

²³Mwanta Yehova nindi, Chafwaŋa muntu watama, ami natiyaloŋamu kuwaha hela hanti, tahindi? Hinatiyaloŋa kuwaha nami afunti, aleki mwayaloŋayi ahanduku?

²⁴Ilaŋa neyi mukwakuloŋa wukubalumuka, hakuleka kuloŋa kwindi, hakukoŋa yakuheŋa, hakwila mwaya yishimashima yejima yelaŋa muntu watama, wakahanda? Yuma yejima yaloŋa yaneliyi hiyakamutenenayuku; mumuloŋa windi wanamotokiyi nachu nshimbi, nimunshidi yindi yanavulumuniyi, dimu mwakafwilayi.

²⁵Hakwinza enu mudi nakwila nenu, Mwelaŋayi Mwanta himwesekanaku. Enu akwamutaŋa waIsarela, tiyenu dinu, komana munelaŋami himwesekanaku? Mwabula kwesekana himwomu mumwelapenuku?

²⁶Chakubalumukayi mukwakuloŋa hakuleka kuloŋa kwindi, hakukoŋa yakuheŋa hakufwilamu, wakafwa nakuheŋa kwindi kwanaluwiyi.

²⁷Cheŋi nawa chakubalumukayi muntu watama, hakuleka kutama kwindi kwanakoŋiyi, hakwila yuma yaya muwuŋaji nakuloŋa, wakahandisha wumi windi.

²⁸Muloŋa yena natopojoki chachiwahi, nabalumuki, naleki nyiloŋa yindi yaneliyi, chalala wakahanda, hakafwaku.

²⁹Hakwinza akwamutaŋa waIsarela adi nakuhosha nawu, Mwelaŋayi Mwanta himwesekanaku, enu akwamutaŋa waIsarela, munelaŋami komana himwesekanaku? Mwabula kwesekana hidimu mumwelapenuku?

³⁰Dichi enu akwamutaŋa waIsarela, nakayisompesha wejima wenu, iwu mwelaŋayi, iwu mwelaŋayi. Dimu mwanahoshiyi Mwanta Yehova. Funtenu, balumukenu, muleki nyiloŋa yenu yejima yimunamotoki nachu nshimbi, kulonda kuluwa kwenu kubuli kwikala chuma chakuyidimbwisha.

³¹Natenu nyiloŋa yenu yejima yimunamotoki nachu nshimbi, mubalumuni muchima wenu wikali wawuha, nispiritu yenu yiikali yayiha. Indi mufwilidi, enu akwamutaŋa waIsarela?

³²Muloŋa hinatiyaloŋa kuwaha nakufwa kwafwaŋa muntuku. Dimu mwanahoshiyi Mwanta Yehova. Dichi balumukenu, muhandi.