Read MUKANDA WANZAMBI Ezekiele 19 Bible Online

Ezekiele 19 - MUKANDA WANZAMBI bible

Ezekiele 19

¹Dichi dinu yidilili atulamba twawaIsarela mukeŋa,

²neyi, Mama yeyi wadipi ŋahi? Wadipi mukaji wamutupa, wawutaminaŋa mukachi kawakwawu anyituŋa, hakulela anyanindi mukachi kanyenzi yanyituŋa.

³Hakukulisha mwanindi wumu; hakwikala mwenzi wamutupa; hakudiza kukwata, hakudya antu.

⁴Nyuza hiyikutiya nsaŋu yindi; hiyakumukwata muwina wawu. Hiyakumutwala mwituŋa daEjipitu namalonda.

⁵Mukaji wamutupa chanamoniyi neli dehi talile-e, nimwakuhwelelaŋayi munakumi dehi, hakunona mwanindi mukwawu, hakumukulisha ekali mwenzi wamutupa.

⁶Hakwendaŋana mukachi kawanyituŋa, hakwikala mwenzi wamutupa; hakudiza kukwata, hakudya antu.

⁷Welukili kumatalawu awanta, hakujilisha nyikala yawu to-o, ituŋa dadipi denzala yuma dibalumuka nimahembi nakubuluma kwabuluminaŋayi.

⁸Hiyakumukumaŋena mbadi jejima kudi nyuza yinafumi kumawulopu, hiyakumunatila wanda wawu hewulu, hiyakumukwata muwina wawu.

⁹Hiyakumusha muchiŋala namalonda, hiyakumutwala kudi mwanta wakuBabiloni. Hiyakumutwala muyiŋaka yakuhatisha, kulonda izu dindi dibuli kutiyakana cheŋi hampidi jamuIsarela.

¹⁰Mama yeyi wudi neyi muvinyu wamwitempa danyivinyu, anamutumbulwila kumeji. Wasopeli nyikabu, wasemeni nyitayi nameji amavulu adiŋuku.

¹¹Wadipi nanyiteela yakola yakwila ndonda jawakwakuyula, yaswejeli kuleha mukachi kanyitayi yadita, chiyaleheli hiyikumwekana hamu nanyitayi yawu yayivulu.

¹²Ilaŋa yena hiyakumubwita chakumulendumukila, hiyakumunata heseki, mpepela yakumusela hiyikúumisha nyikabu yindi. Nyiteela yindi yaŋovu hiyikuhatokaku, hiyikulepuka, hiyikunoŋa nakesi.

¹³Ichi dinu anamutumba dehi mwisaŋa, mwituŋa dawuma dakufwa mpwila.

¹⁴Kesi kanafumi dehi kunyiteela yanyitayi yindi, kesi kanalashi dehi nyikabu yindi, himunashali nawa cheŋi muteela wakola wakwila nachu ndonda yakuyula nachuku. Weniwu diwu mukeŋa wakadilaŋawu nachu.