Read MUKANDA WANZAMBI Ezekiele 2 Bible Online

Ezekiele 2 - MUKANDA WANZAMBI bible

Ezekiele 2

¹Hakuŋila nindi, Eyi mwana kamuntu, imanaku zulumba, nihoshi neyi.

²Chahosheliyi nanami Spiritu hakwijila mudami, hakuŋimika zulumba, hinukumutiya owu wudi nakuhosha nanami.

³Hakuŋila nindi, Eyi mwana kamuntu, nakeŋi kukutemesha kudi anyana kaIsarela, kunyuza yadikaŋa, yadikaŋa dehi nanami. Niwena niankakulula jawu anamotoki dehi mazu ami kushika nikwifuku dalelu dinu.

⁴Anyana oma hamesu, achinchika nyichima. Nakeŋi kukutemesha kudi wena, wakayili neyi, Tiyenu chanahoshiyi Mwanta Yehova.

⁵Niwena, hela akatiya, hela akaleka—muloŋa mutaŋa waweni wowu wadikaŋa—akeluka nawu, Twadiŋi nakaprofwetu.

⁶Nineyi mwana kamuntu, bayi wakayitiyaloŋa womaku, hela mazu awu bayi wakayitiyaloŋa womaku, hela tuhu neyi wakamona yikwata nanyiŋa yikwikala naneyi, hela tuhu neyi wunashakami mukachi katunjimbu. Mazu awu bayi wakayitiyaloŋa womaku, bayi wakayakama chakakutalawuku, hela tuhu wena himutaŋa wadikaŋa.

⁷Wakayilejaŋa mazu ami, hela akatiya, hela akaleka, muloŋa adikaŋa nankashi.

⁸Hakwila eyi mwana kamuntu, tiya chinukukuleja, nami, Eyi bayi wudikaŋa neyi mutaŋowu wadikaŋaku. Asamaku mukanwa, wudyai chuma chinukukwinka.

⁹Nami nitali, hinukumona anaŋolweli chikasa. Hinukumona mudi mukanda wakuvuŋa.

¹⁰Hakuwunta ndumwina, awusoneka nimukachi nihewulu. Asonekamu ninyikeŋa, nikuneŋa, niyayo!