Read MUKANDA WANZAMBI Ezekiele 20 Bible Online

Ezekiele 20 - MUKANDA WANZAMBI bible

Ezekiele 20

¹Mumwaka wamuchitanu nachiyedi, mukakweji kamuchitanu, mwifuku dakakweji dekumi, awakulumpi awaIsarela amakwawu enjili nakwihula kudi Yehova, hiyakushakama kumesu ami.

²Izu daYehova hidikwinza kudami,

³nindi, Eyi mwana kamuntu, hoshaku nawawakulumpi awaIsarela, wakayili neyi, Mwanta Yehova nindi, Munenzi nakwihula kudami, tahindi? Mwanta Yehova nindi, Chinahandichi kwaamu, kwonti kwami kupihula kudenu.

⁴Eyi mwana kamuntu wukuyisompesha, tahindi? Wukuyisompesha, tahindi? Yitoti eluki yishimashima yakoŋeli ankakulula jawu;

⁵wuyili neyi, Mwanta Yehova nindi, Ifuku dinatondeli Isarela, dinayisanyikilili anyana akumutaŋa waYakoba, dinadimwekesheli kudi wena mwituŋa daEjipitu, dinayisanyikilili nami, Yami Yehova Nzambi yenu,

⁶dena ifuku odu nayisanyikilili nami nukuyifumisha mwituŋa daEjipitu, nakayitwali mwituŋa dinayili nakuyendeshela, dikweti tuloŋa twamayeli nawuchi, dalubanji lwamatuŋa ejima.

⁷Nayilili nami, Wejima wenu natenu yishimashima yenu yimwatalaŋa. Nami, Bayi muditamishaŋa nawakishi akutuŋa amuEjipituku. Yami Yehova Nzambi yenu.

⁸Ilaŋa wena adikapili nanami, kwonti kwawu kutiyilila kudami. Wejima wawu kunata yishimashima yawu yatalilaŋawu nehi, hiyalekeli akishi amuEjipituku. Henohu nelili nami, Komana nukuyiichila kulendumuka kwami, nikopi mwaya kuzuwa kwami kwakuyizuwila mukachi ketuŋa daEjipitu.

⁹Ilaŋa mi chinakoŋeli yumiyi nalondeli kulema kwejina dami, kuchina kudijilola kumesu anyuza yadiŋuwu nayu, nadishimwini kumesu awu nachina chinayiidishili mwituŋa daEjipitu.

¹⁰Dichi hinukuyifumisha mwituŋa daEjipitu, hinukuyitwala mwisaŋa.

¹¹Hinukuyinka nshimbi jami, hinukuyileja wuŋaji wami wakwila muntu kukwilamu hakuhandilamu.

¹²Hinukuyinka nawa nisabata jami jiikali chinjikijilu hakachi kamami nawena, kulonda akeluki nachu nawu yami Yehova nayijilikaŋa.

¹³Ilaŋa mutaŋa waIsarela wadikapili nanami mwisaŋa. Hiyendeli munshimbi jamuku. Wuŋaji wami wakwila muntu wakakoŋamu wakahandilamu awulekeli. Aswejeli kujilola sabata jami. Hinukwila nami nukuyiichila kulendumuka kwami mwisaŋa niyijilumuni.

¹⁴Ilaŋa mi chinakoŋeli yumiyi nalondeli chakwakama kulema kwejina dami, kuchina kudijilola kumesu anyuza yatalilaŋa chinukuyifumisha mwituŋa.

¹⁵Kulunjikaku nawa nayisanyikilili mima mwisaŋa, nami, Ituŋa dinayinkeii, datuloŋa twamayeli nawuchi, dalubanji lwamatuŋa ejima, hinakayiŋija mwokuku.

¹⁶Muloŋa wena alekeli muwuŋaji wami, hiyundeli munshinimbi jamuku, ajiloleli sabata jami. Muloŋa nyichima yawu yadiŋi nakuya mwaya akishi awu akutuŋa.

¹⁷Hela chochu, disu dami dayanakeneni kubula kuyijilumuna, hinayimanishili chikupu muna mwisaŋaku.

¹⁸Hinukuyila anyanawu muna mwisaŋa, nami, Bayi mwenda munshimbi jawankakulula jenuku, bayi musha muchima kuwuŋaji wawuku, bayi muditamisha nawakishi awu akutuŋaku.

¹⁹Yami Yehova Nzambi yenu. Endenuŋa munshimbi jami, shenu muchima kuwuŋaji wami, ilenumu.

²⁰Jilikenu sabata jami, kulonda jakekali chinjikijilu mukachi kami nanenu, kulonda mwakeluki nenu yami Yehova Nzambi yenu.

²¹Ilaŋa anyana adikaŋili nanami. Hiyendeli munshimbi jamuku, hiyashili muchima kuwuŋaji wami kulonda kwilamuku, wuŋaji wakwila muntu wukwilamu hakuhandilamu. Ajiloleli sabata jami. Hinukwila nami nukuyiichila kulendumuka kwami, kulonda nikoŋi mwaya kuzuwa kwami kunayizuwiliii muna mwisaŋa.

²²Hela chochu, nafuntishilumu chikasa chami, nalondeli kulema kwejina dami, kuchina kudijilola kumesu anyuza yamweni chinayifumishili mwituŋa.

²³Hinukuyisanyikila muna mwisaŋa, nami, Nakayiŋalaŋeshela mwahita nyuza, nakayimwaŋamwaŋila mwahita matuŋa;

²⁴nanochu chabuliluwu kwila mwaya wuŋaji wami, hiyakuleka nshimbi jami, hiyakujilola nisabata jami, hiyakutalisha mesu awu kudi akishi akutuŋa awankakulula jawu.

²⁵Hinukuyinka nawa ninshimbi jabula kuwaha, niwuŋaji wákubula kuhandilamu;

²⁶nayitamishili nayamukunkulu yawu awenawu, nachina chahanwishiluwu mukesi anyana ejima ásambilili kuvwalika mumavumu awamama jawu, kulonda nakayikonki, kulonda akeluki nawu yami Yehova.

²⁷Dichi eyi mwana kamuntu, hoshaku nawanyana kaIsarela, wakayili neyi, Mwanta Yehova nindi, Chananmotokuwu ankakulula jenu, anantuki.

²⁸Muloŋa chinayileteli mwituŋa dinayisanyikilili nami nakayinkadu, chamwenuwu mpidi jajilehi jejima, ninyitondu yejima yafwankila mafu, hiyakuketwilaku niyimuna yawu, hiyakulambwilaku nyilambu yakunvuloka nachu, hiyakwililaku yamavumbawu amawahi, hiyakuhuŋununaku ninyilambu yawu yakuhuŋununa.

²⁹Indi ochu chinaŋanaŋa chimudi nakuyaloŋaku, chanka? Achitumba niijina, nawu Bama, ndo nikulelu.

³⁰Dichi kayili akwamutaŋa waIsarela, neyi, Mwanta Yehova nindi, Muditamishi tuhu kwenu neyi chaditamishiluwu ankakulula jenu, tahindi? Muyi tuhu kwenu nakwila wuvumbi wamwaya yishimashima yawu, tahindi?

³¹Mula mbulaŋa yamukunkulu yenu, muhitishaŋa nyanenu mukesi, muditamishaŋa nawakishi enu akutuŋa, ndo nikulelu, tahindi? Komana akuŋihula kudenu akwamutaŋa waIsarela? Mwanta Yehova nindi, Chinahandichi kwaamu, kwonti kwami kuŋihula kudenu.

³²Nichuma china chidi nakwinza kunyichima yenu, chimudi nakwila nenu, Etu kwetu tukwikala neyi chekala nyuza, neyi chekala yisaka yamumatuŋa, tukupeshaŋa kwetu nyitondu namalola, chumochu hichakekalaku nihantuku.

³³Mwanta Yehova nindi, Chalala chinahandichi kwaamu, nakekala Mwanta wenu wachikasa chaŋovu, wachikasa chakwolola, wakwichila kulendumuka.

³⁴Nakayifumisha mukachi kanyuza yawantu, nakayifumisha mumatuŋa mumwaŋalaŋeneni, nakayipompesha nachikasa chaŋovu, nachikasa chakwolola nakulendumuka kwakwichila.

³⁵Nakayitwala mwisaŋa dakunyuza yawantu, nakayitota chakuditala mesu namesu.

³⁶Mwanta Yehova nindi, Nakayisoinpesha neyi chinayisompeshelaŋa ankakulula jenu mwisaŋa dakwituŋa daEjipitu, dimu nakayisompeshela.

³⁷Nakayiselwisha mwishina dankunyi, nakayifumisha cheŋi mumwonji wachitiyaŋenu.

³⁸Mukachi kenu nakatookeshelamu nakufumishamu akwakudikaŋa, nianmotokaŋa; nakayifumisha mwituŋa dambala mwashakamawu. Hela chochu, hiyakeŋila mwituŋa daIsarelaku. Mwakeluka nenu yami Yehova.

³⁹Hakwila enu akwamutaŋa waIsarela, Mwanta Yehova nindi, Yenu, mwakapeshi akishi enu akutuŋa, iwu nawindi, iwu nawindi, nihanu ninkumininaku, neyi enu kwonti kwenu kuntiyilila; ilaŋa ijina dami dajila himwakadijilola nawa cheŋi nayamukunkulu yenu, hela nawakishi enuku.

⁴⁰Mwanta Yehova nindi, muloŋa akwamutaŋa waIsarela, wejima wawu, akankalakela mwituŋa, kumpidi yami yajiia, kwokumpidi yamuIsarela yanyuŋa. Diku kunakayitambwila chachiwahi, diku kunakayilila nami, Letenu nyilambu yenu, ninyilambu yenu yayakudya yatachi, hamu nayuma yenu yajiia yejima.

⁴¹Chinakayifumisha mukachi kanyuza yawantu, chinakayifumisha mumatuŋa mumwaŋalaŋeneni nakuyipompesha hamu, nakayitambula neyi chakutambula ivumba dadiwahi. Ami nakadijilika mudenu kumesu anyuza.

⁴²Chinakayiŋija mwituŋa daIsarela, mwituŋa dinasanyikilili ankakulula jenu nami nakayinkadu, mwakeluka nenu yami Yehova.

⁴³Kwenoku diku kumwakaanukila mumwendelelaŋa, nimumwelililaŋa, nimumwadijilolelelaŋa. Mwakadimona kutama nankashi nayuma yenu yatama yejima mwakoŋeli.

⁴⁴Chinakela nayikoŋi dehi enu mwaya kulema kwejina dami, bayi mwaya njila jenu jatamaku, hela mwaya kwila kwenu kwatoka dehuku, enu akwamutaŋa waIsarela mwakeluka nenu yami Yehova. Dimu mwanahoshiyi Mwanta Yehova.

⁴⁵Izu daYehova denjili nawa cheŋi kudami,

⁴⁶nindi, Eyi mwana kamuntu, talisha mesu eyi kukabeta kakuchidiilu, wushimuni izu deyi nakutalisha kukabeta kakuchidiilu, wuprofweti nsaŋu jakuzuwila isaŋa dakumpata yakuchidiilu.

⁴⁷Wili isaŋa dakukabeta kakuchidiilu, neyi, Tiya izu daYehova; Mwanta Yehova nindi, Tiya, nakabutula kesi mudeyi, kakalasha nyitondu yituuta yejima yidi mudeyi, ninyitondu yawuma yejima. Nyilaŋu yazuzuma hiyakayijimaku, kufumisha kukabeta kakuchidiilu, ndo nikukabeta kakuchimunswa, mesu awantu ejima akasukuma namulaŋu owu.

⁴⁸Antu ejima akamona nawu yami Yehova inakabutuli; hikakajimaku.

⁴⁹Hinukwila nami, Ala, Mwanta Yehova! Ami adi nakuŋila nawu, Himukwakuhosha nayishimuku?