Read MUKANDA WANZAMBI Ezekiele 21 Bible Online

Ezekiele 21 - MUKANDA WANZAMBI bible

Ezekiele 21

¹Izu daYehova denjili kudami,

²nindi, Eyi mwana kamuntu, talisha mesu eyi kuYerusalema, wushimuni izu deyi nakutalisha kumalala, wuprofweti nsaŋu jakuzuwila ituŋa daIsarela.

³Wili ituŋa daIsarela neyi, Yehova nindi, Tiya, ami nidi neyi nandombu, nakasomona mpoku yami yakabali muchindalu chayu, antu eyi aloŋa niatama nakayifumishahu.

⁴Nanochu chinakafumishahu antu eyi aloŋa niatama, dichi chiyakafumina mpoku yami yakabali muchindalu chayu, hiyakalotokela niantu ejima, kufumisha kukabeta kakuchidiilu, ndo nikukabeta kakuchimunswa.

⁵Antu ejima akeluka nawu ami Yehova naholi dehi mpoku yami yakabali muchindalu chayu, hiyakafunta nawa cheŋuku.

⁶Eyi mwana kamuntu, dishishimuni. Dishishimuni kumesu awu chakuketuka nyima hakachi ngwa, chakutiya kumuchima kulula.

⁷Chakakwihulawu nawu, Wudi nakudishishimunadi? eyi wakayili neyi, Nidi nakudishishimuna nsaŋu, muloŋa yidi nakwinza. Nyichima yejima yakanowa, makasa ejima akalepuka, nispiritu jejima jakazeya, niantu ejima akatiya mumanuŋu zo-o neyi meji. Tiyenu, hiyikwinza, yakakoŋewa hohu. Dimu mwanahoshiyi Mwanta Yehova.

⁸Izu daYehova denjili kudami,

⁹nindi, Eyi mwana kamuntu, profwetaku neyi, Yehova nindi, Mpoku yakabali, mpoku yakabali, ayihotola dehi, ayilezumwisha dehi.

¹⁰Anayihotoli kulonda yakajahani. Anayilezumwishi kulonda yakekali neyi nzaji. Tuzaŋajali nawa? Nkunyi yamwanami, diyi yikusekesha nyitondu yejima.

¹¹Anayihani dehi kulonda akayilezumwishi, kulonda akayikwati muchikasa, mpoku yakabali oyu anayihotoli, eŋa, anayilezumwishi kulonda akayihani muchikasa chamukwakutaŋana.

¹²Eyi mwana kamuntu, bilelaku nakukaloka nyiteti, muloŋa yinawani dehi antu ami, yinawani dehi tulamba twejima twawaIsarela. Anayihani dehi kumpoku yakabali hamu nawantu ami. Dichi etaku muchikasa.

¹³Muloŋa kudi kweseka. Indi neyi nkunyi yasekeshaŋa nyitondu yikwawu kwikalaku nawa nehi, tukwila ŋahi? Dimu mwanahoshiyi Mwanta Yehova.

¹⁴Dichi eyi mwana kamuntu, profwetaku, weti mumakasa pwa, mpoku yakabali yitaŋani kayedi nikasatu, yoyi mpoku yataŋanaŋa chakujahana, mpoku yasweja kutoha, yataŋanaŋa chakujahana.

¹⁵Natalishi dehi insa yampoku kuyisu yejima yampwembu jawu, kulonda nyichima yawu yakanowi, nikudimboka kwawu kwakavuli. Iyayi! Oyi mpoku yela dehi neyi nzaji, ayitwisha dehi kulonda yŋahani.

¹⁶Yaku hela iku hela iku, hela kuchidiilu hela kuchimunswa, kwonsu kuwunatalishi mesu kwoku.

¹⁷Ninami naketa mumakasa pwa, nakawanisha kulendumuka kwami. Ami Yehova nachihoshi dehi.

¹⁸Izu daYehova denjili nawa cheŋi kudami,

¹⁹nindi, Eyi mwana kamuntu, fuukulaku njila jiyedi jakwinjila mpoku yakabali yamwanta wakuBabiloni; mujiyedi jakafuma mwituŋa dodimu. Funjikaku chuma chakuleja nachu njila, chifunjiki kumaakenu anjila yaya kumukala.

²⁰Fuukulaku njila yakwinjila mpoku yakabali kuRaba wawanyana kaAmoni, nikuYuda muYerusalema ahatawu dehi mpwembu.

²¹Muloŋa mwanta wakuBabiloni wemeni haambukila njila, hamaakenu anjiloju jiyedi, kulonda ahoŋi. Hakunyinkesha nyivu, hakwihula nkishi jakuŋanda, hakutala mumuchima wakanyama.

²²Muchikasa chindi chachidiilu mwadiŋi chuma chakuhoŋesha Yerusalema, kulonda emiki yuma yakusanda nachu mpwembu, kulonda aasami mukanwa, ataŋani, atwali kwiwulu izu dakudikuwa, ashi yuma yakusanda nachu mpwembu kuyisu yampwembu, adiminuku nyilundu, atuŋi mpwembu.

²³Wawena adishiŋili asanyikili, akamona kuhoŋoku neyi kwamukunkulwayi; ilaŋa yena wakaanukisha kuluwa kulonda akayikwati.

²⁴Dichi Mwanta Yehova nindi, Ochu chimunaanukishi kuluwa kwenu, ninochu chinamwekani dehi nyiloŋa yenu, nichinamwekani nshidi jenu muyuma yejima yimwelaŋa, ochu chanayanukuwu dehi, komana akayikwata namakasa.

²⁵Nineyi ataŋawu dehi chakukujaha hohu, eyi watama, eyi kalamba kaIsarela, wukweti ifuku dinenzi dehi, mumpinji yakuluwa kwakukuminina,

²⁶tiya chanahoshiyi Mwanta Yehova, nindi, Fumishaku makonku, fumishaku chibaŋula; yuma hiyakekala nawa cheŋi muyadiŋuku, chuma chadiŋi kwishina achitwali kwiwulu, chadiŋi kwiwulu achitwali kwishina.

²⁷Nakakantumuna, nakakantumuna, nakakantumuna, chumichi hichakekala nawa kwoku, chiŋa mwenichiyulu chindi nenzi dehi, ninami namwinkichu dehi.

²⁸Eyi mwana kamuntu, profwetaku neyi, Mwanta Yehova nateni dehi anyana kaAmoni nikusawula kwasawulaŋawu; ilaku neyi, Mpoku yakabali, mpoku yakabali anayiholi dehi, anayilezumwishi dehi kulonda yakajahani, kulonda kuyidiishayi antu, yakekali neyi nzaji;

²⁹iku achidi kukumwena yimwenu yakuhemesha, iku achidi kukuhoŋela yakutwamba, kulonda akakudatishi nshiŋu jawantu atama ataŋawu dehi chakujaha hohu, akweti ifuku dinenzi dehi mumpinji yakuluwa kwakukuminina.

³⁰Yifuntishi cheŋi muchindalu chayu. Mwituŋa diwavwalikili, mwakuleŋeleluwu, dimu nakakusompeshela.

³¹Nakakwichila ndombu yami. Nakakupeŋa mukesi kakuzuwa kwami. Nakakuhana kudi antu adi neyi anyama, asweja maana akujilumuna akwawu.

³²Wakekala nchawa jakusha hakesi; mashi eyi akekala mukachi ketuŋa; hiyakakwanuka nawa cheŋuku, muloŋa ami Yehova nachihoshi dehi.