Read MUKANDA WANZAMBI Ezekiele 23 Bible Online

Ezekiele 23 - MUKANDA WANZAMBI bible

Ezekiele 23

¹Izu daYehova denjili nawa cheŋi kudami,

²nindi, Eyi mwana kamuntu, kwadiŋi ambanda ayedi, mama yawu wumu.

³Elili wuvumbi muEjipitu. Kwenoku elili wuvumbi hawusanda wawu, ayikwatakwatili hamayeli awu, ayichikitili hantulu jawu jawujiki.

⁴Majinawu, iwu Ohola yowu mukulumpi, iwu mwanyikindi Oholiba. Hiyakwikala amami, hiyakuvwala anyana amayala nawambanda. Majinawu, Samariya diyi Ohola, Yerusalema diyi Oholiba.

⁵Ohola hakudinata muwuvumbi, iku wuchidi wamami. Hakusweja kukeŋa nankashi atujila twindi, wowu aAshuri adihata nindi,

⁶avwala mahina awuzeeli, anguvulu nawanyuli, wejima wawu anyikwenzi akwila kuyitala wutiya nikumuchima to, akwatuwalu, endelaŋa hatuwalu.

⁷Hakukoŋakoŋa nawu wuvumbi, wejima wawu hiyamayala amuAshuri akutonda chakutonda hohu; onsu aswejeli kukeŋayi hakuditamisha nawakishi awu akutuŋa ejima.

⁸Kufumisha kuEjipitu halekaŋa mawuvumbi induku; hadiŋiyi nsanda akaminaŋa nindi, amuchikitilaŋa hantulu yindi yawujiki, amwichililaŋa wuvumbi wawu.

⁹Dichi chinamuheni kudi atujila twindi, wowu aAshuri akeŋeliyi nankashi.

¹⁰Wenawa amwekesheli iheŋu dindi. Anyanindi amayala nawambanda ayikwatili, yomwenindi amujahili nampoku yakabali. Hakushiya niijina dampuhu yatama hakachi kawambanda, muloŋa amusompesheli.

¹¹Mwanyikindi Oholiba wachimweni, osweja nikuditokesha chakubadika yaya yindi, hakubadika kukeŋa nankashi amayala; mawuvumbi indi abadika niayaya yindi.

¹²Hakusweja kukeŋa nankashi aAshuri, anguvulu nawanyuli, adihatiliyi nawu, avwalilaŋa wuvwalu wasweja lubanji nankashi, akwatuwalu adi nakwendela hatuwalu, wejima wawu anyikwenzi akwila kuyitala wutiya nikumuchima to.

¹³Namweni nami anamutamishi, mwayedi wawu aya dehi njila yoyimu.

¹⁴Hakuswejesha nankashi nimawuvumbi indi. Muloŋa yena wamweni amayala asonekawu hambaŋu, yoyifwikija yawaKaladeya yakusoneka nawulombu wuchinana,

¹⁵avwala nyiya mumbunda jawu, kunyitu yawu ajiŋajiŋaku mahina akuloomba, kuyitala wejima wawu hiyandumi hawu, afwana neyi antu akuBabiloni ekala muKaladeya, ituŋa dasemukililuwu.

¹⁶Chanayimoniyi namesu indi, hakuyikeŋa nankashi, hakuyitemeshela antemesha muKaladeya.

¹⁷Antu akuBabiloni hiyakwinza kudi yena mukadidi kakukeŋa, hiyakumutamisha nawuvumbi wawu, hakudijilola nawu, ayifumisha nikumuchima.

¹⁸Dimu mwamwekesheleliyi mawuvumbi indi, mwamwekesheleliyi niiheŋu dindi; nimufumisha nikumuchima wami neyi chinafumishili yaya yindi.

¹⁹Hela chochu, chavulishayi mawuvumbi indi ho-o, hakwanakana mafuku awusanda windi, helilaŋayi wuvumbi mwituŋa daEjipitu.

²⁰Hakusweja nikukeŋa nankashi atujila twindi, akweti mbiji yidi neyi mbiji yayimbulu, akweti nilusemu ludi neyi lwawatuwalu.

²¹Hiwukwanakana chiwabajaminaŋa hawusanda weyi, chakuchikitilaŋawu hantulu kudi aEjipitu, chakukwatilaŋawu hamayeli ahawusanda weyi.

²²Dichi eyi Oholiba, Mwanta Yehova nahoshi nindi, Tiya, nakakusa ŋumwina atujila tweyi iwafumisna dehi kumuchima, nakakuzemwinawu zemu;

²³wowu aBabiloni nawaKaladeya, nawaPekodi naShowa naKowa, hamu nawaAshuri ejima; anyikwenzi akwila kuyitala wutiya nikumuchima tó, wejima wawu anguvulu nawanyuli ho-o, atulamba nawantu atúumbakana, wejima wawu adi nakwendela hatuwalu hohu.

²⁴Akakuzemukila nayitwa, namakálu, namatemba, nachipompelu chanyuza yawantu; akakutandamina nankebu janyanya nŋamaneni, nimateŋa ayikuŋu kwi-ndo; nakayinka mudimu wakukusompesha, akakusompesha mwaya kusompesha kwawu.

²⁵Nakakuzuwila namukawu, akakukoŋa chakukulendumukila; akakuketula nimazulu nimatu; antu eyi akashalaku akadimbuka nampoku yakabali. Anyaneyi amayala nawambanda akayikwata; antu eyi akashalaku akayilasha nakesi.

²⁶Akakuvúula mahineyi, akakufumisha yuma yeyi yayiwahi yiwadileŋaleŋaŋa nachu.

²⁷Dimu munakakuketwishila kubajama kweyi, niwuvumbi weyi wafumishili kuEjipitu; kulonda wakabuli kuyifumbwila cheŋi mesu eyi, wakabuli kwanuka nawa cheŋi Ejipitu.

²⁸Muloŋa Mwanta Yehova nindi, Nukukuhana kudi antu wekala nawu nankunyi, wowu antu iwafumisha dehi kumuchima;

²⁹akakukoŋa chankunyi hohu, akakufumisha yuma yejima wakabakeni, akakushiya nzekesi chakadi nikachuma kakuvwala, iheŋu damawuvumbi eyi dakamwekana, nikubajama kweyi nimawuvumbi eyi.

³⁰Akakukoŋa yumiyi nanochu chiwunalondeli nyuza yikwawu nakwila nawu wuvumbi, nichiwunadijiloli nawakishi awu akutuŋa.

³¹Wunayi dehi munjila yayaya yeyi, dichi nakakwinka luŋasa lwindi muchikasa cheyi.

³²Mwanta Yehova nindi, Wakanwa muluŋasa lwayaya yeyi, luŋasolu lwakunama lweneni. Akakuseha, akakuyiŋila. Muluŋasolu mudi yayivulu.

³³Wakenzala kusheta nayihuŋu, naluŋasa lwakuhayama, lwakushala wunka, lwoluŋasa lwayaya yeyi Samariya.

³⁴Wakalunwa, wakalumanisha to, wakakeleketa niyizanda yalu, wakatabola nimayeli eyi; muloŋa ami nahoshumu dehi. Dimu mwanahoshiyi Mwanta Yehova.

³⁵Dichi Mwanta Yehova nahoshi nindi, China chiwunanvulameni, chiwunannatili kunyima, komana wakakoola kubajama kweyi nimawuvumbi eyi.

³⁶Yehova waŋilili nawa nindi, Eyi mwana kamuntu, keŋa wusompeshi Ohola naOholiba, tahindi? Neyi chochu, yishimwini yishimashima yawu.

³⁷Muloŋa wena aneli wuvumbi, mumakasawu mudi mashi, aneli wuvumbi nawakishi awu akutuŋa; anyanawu amayala anvweleleluwu ami, anayihanwishi mukesi, kulonda akayilashi nakesi.

³⁸Tiyenu nawa mwanankoŋuwu, ifuku dodimu anatamishi malalami, anajiloli sabata jami.

³⁹Wena akwila iku anajahili dehi anyanawu kudi akishi awu akutuŋa, ifuku dodimu hiyakwinza mumalalami nakujilolamu. Tiyenu ntahi mwaneluwu mukachi ketala dami.

⁴⁰Chuma chikwawu nawa, munatambiki antu afuma kwakulehi; atemesheleluwu ntemesha, enza nikwinza. Hiwukuyiwelela, hiwukudikwitakwita wulombu kumesu, hiwukudileŋaleŋa nayuma yayiwahi;

⁴¹hiwukushakama nihakadidi kawanta, iku kudi mesa yakwala dehi, washahu dehi niinsensi yami, nimanji ami.

⁴²Hikukutiyakana ipumba daluntu ludi nakuluŋa nayena, afumishili mwisaŋa asakusheta, hiyakuyileta hamu nawantu akadi kulema. Wena hiyakuyivwika mwayedi wawu yikomu kumakasawu, niyibaŋula yalubanji kunyitu yawu.

⁴³Hinukumutena owu mumbanda wakulila dehi mumawuvumbi, nami, Ichi dinu wena akela nindi mawuvumbi, niyena nawa wakela nawu.

⁴⁴Eŋilili mudi yena neyi cheŋilaŋawu mudi mumbanda wachivumbi. Dichi cheŋililuwu mudi Ohola naOholiba, ambanda abajama.

⁴⁵Antu aloŋa diwu akayisompesha mwasompeshelaŋawu ayivumbi awambanda, nimwasompeshelaŋawu ambanda apwekeshaŋa mashi. Muloŋa wena hiyayivumbi awambanda, mumakasawu nawa mudi mashi.

⁴⁶Muloŋa Mwanta Yehova nindi, Nakayiletela chipompelu, nakayihana kulonda akayizukumoni nakuyibuwabuwa.

⁴⁷Chipompelu ochu chakayasa malola, chakayijahola nampoku jawu jatubali; akajaha anyanawu amayala nawambanda, akocha matalawu nakesi.

⁴⁸Dimu nakaketwishila mwituŋa kubajama, kulonda ambanda ejima akadiziluku kubula kwimbujola kubajama kwenu.

⁴⁹Akayilubwili kubajama kwenu, nshidi jawakishi enu akutuŋa mwakajikoola. Mwakeluka nenu yami Mwanta Yehova.