Read MUKANDA WANZAMBI Ezekiele 24 Bible Online

Ezekiele 24 - MUKANDA WANZAMBI bible

Ezekiele 24

¹Mumwaka wamuchitanu nachiwana, mukakweji kekumi, mwifuku dakakweji dekumi, izu daYehova denjili nawa cheŋi kudami,

²nindi, Eyi mwana kamuntu, sonekaku ijina defuku, dodifuku dalelu dinu. Mwanta wakuBabiloni wakundamini kwakwihi naYerusalema dodifuku dalelu dinu.

³Tilaku mutaŋa wadikaŋa chishimu, wuyili neyi, Mwanta Yehova nindi, Shaku inuŋu hakesi, shaku, huŋunwinenumu meji.

⁴Pompeshelenumu nyisunyi yayu, nyisunyi yayiwahi yejima, nimwendu nichikasa; yinzeshi mafwaha akusakula.

⁵Kwataku chimuna chakusakula mwiyinda, lumbikaku nchawa mwishina dayu; yibwakatishi chachiwahi; eŋa, mafwaha adumu ahi.

⁶Dichi Mwanta Yehova nindi, Yayo, o mukala wamashi! Yayo, o inuŋu yikweti ndala mukachi, yabula kufuma ndala yidumu! Fumishakumu mbiji hamusunyi hamusunyi. Hikunayimwekeni chinjikijilu chakusakula nachuku.

⁷Muloŋa mashi indi adi mukachi kindi. Yena wayisha dehi helola hatooka. Hanayi huŋununi heseki akayishikili lunkuŋuku;

⁸Ami nashi dehi mashi indi helola hatooka, kulonda akabuli kuyishikila, kulonda akaleteshi kulendumuka kwakutenda.

⁹Dichi Mwanta Yehova nindi, Yayo, o mukala wamashi, ami nawa nakatohesha mulumba.

¹⁰Vulishaku nchawa, kundakeshaku kesi, telekaku mbiji chachiwahi, kondeshaku muzoŋu, kulonda mafwaha asukumi.

¹¹Nkumininaku wakayishi hamakalayu chakadi chuma mukachi, yakatati, wuneŋu wayu wakasukumi, kulonda majilu ayu akasuŋu nukumu, kulonda ndala yayu yakamani.

¹²Nadizeyeshi dehi kwindi namanyidimu; hela chochu, ndala yindi yasweja hiyamufumaŋaku, ndala yindi hiyamufumaŋa nakesuku.

¹³Majilu eyi yowu kubajama; chinakwila dehi tookeshe-e hiwatookaŋaku, komana hiwamba katooka nawa cheŋi majilu eyuku, chiŋa nakumanishili dehi kulendumuka kwami.

¹⁴Ami Yehova inachihoshi dehi, chakamwekana, nakachikoŋa. Hinakafunta munyima, hela kwanakena, hela kubalumuka mumuchimaku. Mwomwaya njila jeyi, mwomwaya yuma yiwelaŋa, dimu mwakakusompeshelawu. Dimu mwanahoshiyi Mwanta Yehova.

¹⁵Izu daYehova denjili nawa cheŋi kudami,

¹⁶nindi, Eyi mwana kamuntu, tiya, hinukukufumisha weyi iwamona kuwaha, iŋanda dimu hohu. Bayi wakadishona hela kudilaku, hela madilu eyi bayi awulumukaku.

¹⁷Kumina dakudishishimona hohu, ilaŋa bayi chitiyakanaku. Bayi wumudila makumbu adilaŋawu mufuku, kumina dakujiŋajiŋa ihina deyi kunamutu, kumina dakuvwala masaŋatu eyi kunyendu, bayi wakabuta kunyivumbu yeyuku, bayi wakadya yakudya yawantuku.

¹⁸Hinukuyilejamu antu nabudidi; chikuneli melela iŋodami hakufwa. Chikunachi hinukwila mwanlejawu.

¹⁹Antu hiyakuŋila nawu, Imu muwudi nakwila, etu chikutulejadi? Hiwukutuleja mwoku?

²⁰Hinukuyila nami, Izu daYehova denza kudami,

²¹nindi, Hoshaku nawakwamutaŋa waIsarela, neyi, Mwanta Yehova nahoshi nindi, Tiyenu, nakajilola malalami, imwataŋela, imwamwena Ŋovu, imwamona kuwaha, imwatiyila wushona munyichima yenu. Nianyanenu amayala nawambanda imunashiyi akadimbuka nampoku yakabali.

²²Mwakela mwomunelami. Himwakabuta kunyivumbu yenuku, himwakadya yakudya yawantuku.

²³Kunyitu yenu mwakavwala mahinenu akujiŋajiŋa, nimasaŋatu enu kunyendu. Himwakadishona hela kudilaku; mwakaya nakunyaloŋa ho-o nakuluwa kwenu, mwakanyinzanyinza.

²⁴Dichi Ezekeli wakekala chinjikijilu chakutalilahu enu, mwaneliyi mwejima dimu mwakela enu. Chichakenza chumichi mwakeluka nenu yami Mwanta Yehova.

²⁵Eyi mwana kamuntu, ifuku dinakayifumisha chuma chamwenawu Ŋovu, nichuma chawu chalubanji chazaŋajalilaŋawu, chamonawu kuwaha, chashawu nyichima yawu, nianyanawu amayala nawambanda,

²⁶dena ifuku odu muntu wakapuluka hakenza kudeyi nakukuleja, kulonda wutiyi namatu eyuku?

²⁷Dena ifuku odu kanwa keyi kakamujikukila owu muntu napuluki, wakahosha, hiwakekala nawa cheŋi kamamaku. Chochina wakekala chinjikijilu chakutalilahu wena. Akeluka nawu yami Yehova.