Read MUKANDA WANZAMBI Ezekiele 25 Bible Online

Ezekiele 25 - MUKANDA WANZAMBI bible

Ezekiele 25

¹Izu daYehova denjili kudami,

²nindi, Eyi mwana kamuntu, talishaku mesu eyi kudi anyana kaAmoni, wuprofweti nsaŋu jakuyizuwila,

³wuyili anyana kaAmoni neyi, Tiyenu izu daMwanta Yehova. Mwanta Yehova nindi, Ochu chimwelili nenu, Lelo! nansaŋu yamalalami ajiloleluwu; netuŋa daIsarela dabalumwinuwu diikali mahembi; namutaŋa waYuda watweluwu muwukoli;

⁴dichi tiyenu, nakayihana kudi antu akumusela, akatuŋa yimba yawu mudenu, akatuŋa matalawu nawa mudenu; akadya nyikabu yenu, akanwa mayeli enu,

⁵nakabalumuna Raba ekali itaŋa dawangameli, nikwawanyana kaAmoni nakabalumunaku kwakekali kuwuwutaminu wawanyikoku. Mwakeluka nenu yami Yehova.

⁶Muloŋa Mwanta Yehova nindi, Chimweteli mumakasa pwa, himukudata nimwendu heseki ti-i, himukuzaŋalela ituŋa daIsarela nankunyi yejima yamunyichima yenu,

⁷dichi tiyenu, nayolweli dehi chikasa chami, nayihani dehi kudi nyuza kulonda akayibuwabuwi; nakayimanisha to-o mukachi kanyuza, nakayinoŋesha mukachi kamatuŋa; nakayijilumuna, mwakeluka nenu yami Yehova.

⁸Mwanta Yehova nindi, Ochu chadi nakwilawu aMowabi naSeyiri nawu, Komana mutaŋa waYuda wudi neyi nyuza yejima;

⁹dichi tiyenu, nakajikula kumbavu yaMowabi, kufumisha kunyikala yamaneni, kufumisha kunyikala yindi yamaneni yekala kuŋinza jindi, kwelaŋawu nawu kulubanji lwetuŋa, kuBetiyeshimoti, kuBayali Meyoni, nikuKiriyatayimi,

¹⁰ndo nikudi antu akumusela, kulonda antu akayi nakulwa nawanyana kaAmoni, ninami nakayinkawu kulonda akayiheti, kulonda akabuli kuyanuka cheŋi anyana kaAmoni mukachi kanyuza.

¹¹Mowabi nakamukoŋa mwomunamusompesha dehi. Akeluka nawu yami Yehova.

¹²Mwanta Yehova nindi, Edomi chanakoŋiyi mutaŋa waYuda, chanaditendiyi, nawani dehi muloŋa weneni, muloŋa naditendi yomweni kudi wena,

¹³dichi Mwanta Yehova nahoshi nindi, Nakamwolwela Edomi chikasa chami, nakamanishamu amayala nawambanda, nakabalumuna mpata yawu yakekali mahembi, kufumisha kuTemani; akadimboka nampoku yakabali, ndo nikuDedani.

¹⁴Nakaditenda kudi Edomi nachikasa chawantu ami aIsarela, nakakoŋa muEdomi mwaya kuzuwa kwami, mwaya nikulendumuka kwami. Akeluka munaditendaŋa. Dimu mwanahoshiyi Mwanta Yehova.

¹⁵Mwanta Yehova nindi, Chanakoŋuwu dehi aFwilistinu mwakuditenda, chanaditenduwu nankunyi munyichima yawu, nawu ajilumuni mpata yawu nankunyi yahaya nyaka,

¹⁶dichi Mwanta Yehova nindi, Tiya, nakayolwela aFwilistinu chikasa chami, nakamanishamu aKereti, nakajilumuna antu anashali kuchikumu chakaluŋalwiji.

¹⁷Nakaditenda kudi wena mwasweja nankashi mwakuyihoshola chakuyilendumukila; chinakaditenda kudi wena, akeluka nawu yami Yehova.