Read MUKANDA WANZAMBI Ezekiele 26 Bible Online

Ezekiele 26 - MUKANDA WANZAMBI bible

Ezekiele 26

¹Mumwaka wekumi nakamu, mwifuku dakakweji damuchimu, izu daYehova denjili kudami,

²nindi, Eyi mwana kamuntu, Tira chanamwiliyi Yerusalema nindi, Lelo! wadiŋi chenzelu chanyuza yawantu nakotoki dehi, nabalumuki dehi nakutala kudami, ichi chanamubalumunuwu dehi ekali mahembi, ami akaŋinzesha to-o.

³Dichi Mwanta Yehova nindi, Eyi Tira tiya, ami nidi neyi nandombu, nakakuzemwina nyuza yayivulu, neyi chazemunaŋayi kaluŋalwiji mankandindi.

⁴Akakisaŋana mpwembu jaTira, akahumona tuposhi twindi. Nilunkuŋu lwindi lwalweni nakalukoolahu, hakashali kwelola damukunkulwayi.

⁵Hakekala hawanyikilu wamawanda hakachi kakaluŋalwiji; muloŋa ami nachihoshi dehi. Dimu mwanahoshiyi Mwanta Yehova. Tira wakekala wakubuwa dehi kudi nyuza.

⁶Anyanindi awambanda akekala mumaha, akayijaha nampoku yakabali; akeluka nawu yami Yehova.

⁷Muloŋa Mwanta Yehova nindi, Tira nakamuletela mwanta wakuBabiloni Nebukaneza, mwanta wawanyanta, wakafuma kukabeta kakuchimunswa nawatuwalu, namakálu, nawakwatuwalu, nayendu yawantu, naluntu lwalweni.

⁸Anyaneyi awambanda wakayijahila mumaha, wakakutuŋila jimpwembu, wakakudimina mukandu, wakakunyamwina nkebu kwiwulu.

⁹Kumpwembu jeyi wakemikaku yuma yindi yakuhumona nachu mpwembu, tuposhi tweyi wakatuhumona nayizembi yindi.

¹⁰Atuwalu twindi chakaswejawu kuvula, lunkuŋu lwawu lwakakubuta wi-i. Chakeŋilayi muyisu yeyi yampwembu neyi cheŋilaŋawu antu mumukala wabalulawu dehi mpwembu, mpwembu jeyi jakatenta nalushindu lwawakwatuwalu, nilwamatemba namakálu.

¹¹Munyikwakwa yeyi yejima wakachikachikamu nakudatolamu nayikwa yatuwalu twindi. Antu eyi wakayijaha nampoku yakabali, yishimi yeyi yamalola yiwaditemba akakunduka heseki.

¹²Maheteyi akayipuŋa, yuma yeyi yiwalandujolaŋa akakutambulayi. Mpwembu jeyi akajihumona, nimataleyi akutiya nichipeŋa akayikisaŋana. Maloleyi, ninyitondu yeyi, hela tuhu lunkuŋu lweyi akayijiyisha hakachi kameji.

¹³Izu datumina tweyi nakadimwenesha; kuvuma kwavumaŋa tudada tweyi hikwakatiyakana nawa cheŋuku.

¹⁴Nakakubalumuna wakekali ilola damukunkulwayi; wakekala hawanyikilu wamawanda hohu, hiyakakutuŋulula nawa cheŋuku. Muloŋa ami Yehova nachihoshi dehi. Dimu mwanahoshiyi Yehova.

¹⁵Mwanta Yehova namwili Tira, nindi, Yitutu hiyakatenta nalushindu lwakudimbuka kweyi hakabawu antu akataŋawu, hakajahawu antu mukachi keyuku?

¹⁶Henohu atulamba akukaluŋalwiji ejima akafumafuma hamatandawu awanta, akatenteka mahinawu akuluka kumbadi, akavuulavuula yuma yawu yakuvwala yamahina akusowasowa. Akavwala kuzaala. Akashakama heseki, akazaala mwaana wejima, akakuhayama.

¹⁷Akakwimbila mukeŋa, akakwila nawu, Eyi mukala washakaminaŋa akwakwenda hakaluŋalwiji, mukala watiyakeni mpuhu, wadiŋi naŋovu kukaluŋalwiji, niyena niantu ashakaminaŋamu, wafwishilaŋa mutentu antu ejima ashakaminaŋamu, o chiwunakisiki!

¹⁸Ichi dinu ifuku diwakaholoka, yitutu yakazaala, eŋa, chiwakafuma, yitutu yamukaluŋalwiji yakakwata chikasa kukanwa.

¹⁹Muloŋa Mwanta Nzambi nindi, Chinakakubalumuna wikali mukala wamahembi hohu neyi nyikala yabula kushakama antu; chinakakukumpwila inyiŋi, chakakubutawu nachimeji chachivulu,

²⁰nakakukunkumwisha hamu nawantu akakunkumuka muwina kudi antu akushankulu, akakushakamisha mumashina amaseki, mwela dehi mahembi akufumisha kunyaka, hamu nawantu akakunkumuka muwina, kulonda antu akabuli kushakama cheŋi mudeyi; ami nakasha lubanji mwituŋa dawamomi.

²¹Nakakubalumuna wikali wakufwaŋa mutentu kudi akwenu, hiwakekalaku nawa cheŋuku, hela akakukeŋakeŋa hiyakakumona nawa cheŋuku haya nyaka. Dimu mwanahoshiyi Mwanta Yehova.