Read MUKANDA WANZAMBI Ezekiele 27 Bible Online

Ezekiele 27 - MUKANDA WANZAMBI bible

Ezekiele 27

¹Izu daYehova denjili cheŋi kudami,

²nindi, Eyi mwana kamuntu, mwimbili Tira mukeŋa,

³wumwili Tira neyi, Eyi washakamaŋa kuwiŋililu wakukaluŋalwiji, eyi mukwakulandujola wanyuza yayivulu, walandujolaŋa kuyitutu yayivulu, Mwanta Yehova nindi, Eyi Tira, wuneli neyi, Ami nikweti lubanji lwawanina chikupu,

⁴Ŋinza jeyi jidi mukachi katuluŋalwiji, akwakukutuŋa anawanishi lubanji lweyi chikupu.

⁵Maŋalangeyi anasoŋuwu anyinjunŋa yafumini kuSeniri. Anatambuli nyisida kuLebanoni kulonda kukusoŋela nyitondu yakukudika mahina akwendesha nachu maatu.

⁶Yilapu yeyi anasoŋi yanyikula yakuBashani, nyitondu yeyi yakushakama yakutuŋa nambiŋa yanjamba yakufuma kuKitimi.

⁷Ihina deyi dakwendesha nachu watu hiihina dadiwahi dakusowasowa namahina akuEjipitu, kulonda diikali neyi mpandelu yeyi; hawatu wabutiluhu mahina awuzeeli nawusombu akufuma kuyitutu yakuElisha.

⁸Ashakama kuZidoni nakuArivadi diwu adiŋi akwakukuvuwila; eyi Tira akwamaana adiŋi mudeyi, diwu adiŋi akwakwendesha maatu eyi.

⁹Akulumpi akuGebali nawakwamaana adiŋuku adiŋi mudeyi, diwu adiŋi akwakuji kajika munyaji yamaatu eyi. Maatu ejima amukaluŋalwiji nawakwakukala kalamu adiŋi mudeyi nakuhimpahimpa yuma yeyi yakulandujola.

¹⁰APeresi nawaLudi nawaPuti adiŋi muchendu cheyi chanjita, diwu akwakukwasila majita, akudikilaŋa nkebu nimateŋa ayikuŋu mudeyi; amwekesheli wukeleŋi weyi.

¹¹Antu akuArivadi adiŋi hamu nachendu cheyi chanjita hampwembu jeyi kwi-ndo, namutuposhi tweyi mwadiŋi aGamadi. Akudikilaŋa nkebu jawu kumpwembu jeyi kwi-ndo, diwu anawanishi lubanji lweyi.

¹²Tarashishi wadiŋi nlandishi yeyi muloŋa wamaheta kuvula, maheta anyitundu yejima; alandilaŋa yuma yeyi nasiliva, nayikuŋu, nawufoyu, nansumbu.

¹³Yavani, naTubali, naMesheki, diwu adiŋi akwakulandalanda naneyi. Alandishilaŋa anduŋu niyuma yawuneŋu nayuma yeyi yakulandujola.

¹⁴Akwamutaŋa waTogoma akulandishili tuwalu, nituwalu twanjita, niyingonŋavalu nayuma yeyi.

¹⁵Antu akuDedani adiŋi akwakulandalanda naneyi. Yitutu yayivulu yadiŋi soku yakuchikasa cheyi. Akuletelelaŋa mbiŋa janjamba namaŋalanŋa atupwipu ahimpina yuma yeyi.

¹⁶Siriya wadiŋi nlandishi yeyi muloŋa wyuma yeyi yawukalawenu yalumbamini. Hiyakulanda yuma yeyi nama emeraladi, nawusombu, namahina akusowasowa, namahina asweja kutooka, nakorali, namarubi.

¹⁷Yuda netuŋa daIsarela adiŋi akwakulandalanda naneyi, alandishilaŋa tidiku yakuMiniti, niŋanaŋi, niwuchi, nimanji, niyitumbu, nayuma yeyi yakulandujola.

¹⁸Damakasa wadiŋi nlandishi yeyi kulonda atambulaŋa yuma yeyi yawukalawenu yalumbamini, muloŋa wamaheta kuvula, maheta anyitundu yejima, hamu navinyu yakuHeliboni, nawanda wanyikoku wutooka.

¹⁹Vedani naYavani akulandishilaŋa wanda wakushinta nayuma yeyi; niyikuŋu yalezumuka, nikasiya, ninyisachi yevumba dadiwahi, yadiŋi muyuma yeyi yakulandujola.

²⁰Dedani wadiŋi mukwakulandalanda naneyi mahina alema wuseya akwenda nachu hatuwalu.

²¹Arabiya nawatulamba akuKedari ejima adiŋi anlandishi akuchikasa cheyi; yuma yakulandishilaŋawu, nyana kanyikoku, niyizamba yanyikoku, nimpembi.

²²Akwakulandalanda akuSheba nakuRama diwu adiŋi anlandishi jeyi; alandilaŋa yuma yeyi nanyiseki yejima yabadika, natumalola twasweja kulema twejima, niwuru.

²³Harana naKane naEdeni, wowu akwakulandalanda akuSheba, nakuAshuri, nakuKilimadi, adiŋi akwakulandalanda naneyi.

²⁴Diwu adiŋi akwakulandalanda naneyi yuma yasweja kuwaha, makuŋa amahina awuzeeli akusowasowa, niyikasha yamahina awanheti, yakukasa chachiwahi nanyonji yambalawanda yakushinta, yakutuŋa nanyisida, yadiŋi muyuma yeyi yakulandujola.

²⁵Maatu amaneni akuTarashishi diwu akusendelelaŋa yuma yeyi yakulandujola. Hiwukwinzala mbe, hiwukusweja nikulema mukachi katu-luŋalwiji.

²⁶Akwakukuvuwa anakushikija muchimeji chachivulu. Mpepela yakumusela yinakukotoli mukachi katuluŋalwiji.

²⁷Nimaheteyi, niyuma yeyi, niyuma yeyi yakulandujola, niantu akalakalaŋa mudeyi, niakwakukwendesha, niakwakujikajika munyaji yeyi, niakwakukuhimpila yuma yeyi yakulandujola, niantu eyi anjita ejima adi mudeyi, hamu nachendu cheyi chejima chidi mukachi keyi, akaholokela mukachi katuluŋalwiji mwifuku diwakakuluka.

²⁸Mŋata jeyi jidi kunsa yamukala jakatenta nanyiteti yawakwakukwendesha.

²⁹Antu akwatilaŋa kuyilapu ejima, niakwakukalakala mumaatu, niakwakwendesha maatu hakaluŋalwiji ejima, akasuloka mumaatu awu, akemana heseki,

³⁰akatiya kesha mazu awu hadeyi, akadila chalula, akadisukwila maseki hanyitu yawu, akadikumbakumba mumawuti,

³¹akakutewila tuwewa, akavwala yikeleyi, akakudila nanyichima yinatiyi kulula makumbu aweni alula.

³²Kumakumbu awu akakwimbila mukeŋa, mukeŋa wakukwila nawu, Hinyi wudi neyi Tira amweneshawu dehi zo-o mukachi kakaluŋalwiji?

³³Yuma yeyi yakulanda chiyafuminaŋa namutuluŋalwiji, wekutishilaŋa nyuza yawantu yayivulu; waheteshelaŋa anyanta ahamaseki namaheteyi alumbamini, nayuma yeyi yakulandujola.

³⁴Hiwakotokeli natuluŋalwiji mumanyiŋi achimeji, yuma yeyi yakulandujola nichendu cheyi chejima chakulukilili mukachi keyi.

³⁵Akwakushakama kuyitutu ejima anakuhayami, anyanta jawu anatiyi woma nankashi, anadihombi nikumesu.

³⁶Akwakulandujola adi mukachi kanyuza yawantu hiyakukuyiŋila. Wunekali dehi wakufwaŋa mutentu kudi akwenu, hiwakekalaku nawa cheŋuku haya nyaka.