Read MUKANDA WANZAMBI Ezekiele 28 Bible Online

Ezekiele 28 - MUKANDA WANZAMBI bible

Ezekiele 28

¹Izu daYehova denjili cheŋi kudami,

²nindi, Eyi mwana kamuntu, kamwili nlomboli yaTira, neyi, Mwanta Yehova nindi, Ochu chiwunananishi muchima weyi, chiwuneli neyi, Ami niNzambi, nashakama muchididi chaNzambi, mukachi katuluŋalwiji, kutoŋa eyi wumuntu, hiwuNzambuku, hela wadifuukula tuhu mumuchima, neyi, Nikweti maana neyi muchima waNzambi.

³Komana wukweti maana akubadika Danyeli, hikudi chuma chakujinda chanakuswekuwu eyuku.

⁴Kumaaneyi nikukashinshi keyi wunaheteluku maheta, wunaheteluku niwuru nisiliva yidi muwaswekaŋa yuma yeyi yalema.

⁵Kumaaneyi abadika, nikukulandalanda kweyi wunavulishiluku maheteyi, wunananishi dehi nimuchima weyi namaheteyi.

⁶Dichi Mwanta Yehova nindi, Ochu chiwunadifuukuli dehi mumuchima weyi neyi, NiNzambi;

⁷dichi tiya, ami nakakuletela antu akumatuŋa acheŋi, wowu antu amunyuza atiyawu woma, mpoku jawu jatubali akajihola kulonda akatapi lubanji lwamaaneyi, akatamishi nicheeya cheyi.

⁸Akakukunkumwisha muwina. Wakafwa kufwa kwafwaŋa antu ajahaŋawu mukachi katuluŋalwiji.

⁹Wakatwesha kumwila owu wakakujaha neyi, Ami niNzambi? Ilaŋa muchikasa chanowu wukukutaŋa wumuntu kweyi, hiwuNzambuku.

¹⁰Wakafwa maŋufwa afwaŋa ayidima, kumakasa awantu akumatuŋa acheŋi, muloŋa nahoshumu dehi. Dimu mwanahoshiyi Mwanta Yehova.

¹¹Izu daYehova denjili cheŋi kudami,

¹²nindi, Eyi mwana kamuntu, mwimbili mwanta wakuTira mukeŋa, wumwili neyi, Mwanta Yehova nindi, Yeyi washika muchesekelu chikupu ndwa, yeyi wenzala maana, wukweti lubanji Lwawanina chikupu.

¹³Yeyi wadiŋi muEdeni mwitempa daNzambi. Wadiŋi wadileŋaleŋa malola ejima alema wuseya, sari dini, nintoŋaza, nidiyamondi, niberili, nishohama, ninja siperi, nisafira, niemeraladi, niilola dakejima, niwuru. Wukalawenu wandimba jeyi niwamahululu eyi wadiŋi mudeyi; ayiloŋesheli mwifuku dakuleŋeluwu.

¹⁴Yeyi wadiŋi kerubi awayishawu manji, mukwakujikahu. Nakushili mwaka wikalaŋa hampidi yaNzambi yajila. Mukachi kamalola akesi welilaŋa wuyamu, winzamu.

¹⁵Kufumisha kwifuku dakuleŋeluwu, wadiŋi waloŋa chikupu muyuma yejima welilaŋa, ndo nihawenuwu kuheŋa mudeyi.

¹⁶Kukulandalanda kweyi kwakuvulu enzesheli madombu mukachi keyi, wunavulumuni dehi. Dichi eyi watama dehi, nakunati dehi, nakufumishi dehi hampidi yaNzambi. Eyi kerubi mukwakujikahu, nakukisaŋani dehi, wubuli kwikala cheŋi mukachi kamalola akesi.

¹⁷Wadinanishili mumuchima nansaŋu yalubanji lweyi, wunatokeshi dehi maaneyi nansaŋu yacheeya cheyi. Nakunati dehi heseki, nakwalaŋeshi kumesu awanyanta kulonda akumoni.

¹⁸Wunajiloli dehi kumalalami ajila amavulu, nakuheŋa kweyi kwakuvulu, nakuheŋa kwakulandalanda kweyi. Dihu hanafumi ami kwidisha kesi mudeyi, kanakulashi dehi, nakubalumuni dehi kwamawuti heseki kumesu awantu ejima akumonaŋa.

¹⁹Antu amunyuza yawantu ejima akwiluka dehi akakuhayama. Wunekali dehi wakufwaŋa mutentu kudi akwenu, hiwakekalaku nawa cheŋuku haya nyaka.

²⁰Izu daYehova denjili kudami,

²¹nindi, Eyi mwana kamuntu, talishaku mesu eyi kuZidoni, wuprofweti nsaŋu jakuyizuwila.

²²Neyi, Mwanta Yehova nindi, Eyi Zidoni, tiya, ami nidi neyi nandombu, akanlemeshela mudeyi. Chinakakoŋa mudi yena munamusompesheleli, chinakadijilika mudi yena, akeluka nawu yami Yehova.

²³Muloŋa ami nakatemesha mudi yena yipupu namashi munyikwakwa yindi. Akataŋawu akadimboka mukachi kindi nanoyi mpoku yakabali yakamujikilila niniku niniku. Akeluka nawu yami Yehova.

²⁴Hikwakekala nawa cheŋi chikwata chakulemekaŋa mutaŋa waIsarela, hela mwiŋa wakukatishaŋa ntu adi kudi wena kwi-ndo ayikoŋeli chatamaku. Akeluka nawu yami Mwanta Yehova.

²⁵Mwanta Yehova nindi, Chinakela napompeshi dehi mutaŋa waIsarela, nayifumishi dehi munyuza yawantu mwaŋalaŋenawu, nadijiliki dehi mudi wena kumesu anyuza, akashakama mwituŋa dawu awenawu dinenkelikambuŋami Yakoba.

²⁶Akashakamamu chakadi kwakama. Ena, akatuŋa matala, akadima matempa anyivinyu, akashakama chakadi kwakama, henohu nayikoŋi dehi antu ejima ayikoŋeli chatama kwi-ndo munayisompesheleli. Akeluka nawu yami Yehova Nzambi yawu.