Read MUKANDA WANZAMBI Ezekiele 29 Bible Online

Ezekiele 29 - MUKANDA WANZAMBI bible

Ezekiele 29

¹Mumwaka wekumi, mukakweji kekumi, mwifuku dakakweji dekumi nakayedi, izu daYehova denjili kudami,

²nindi, Eyi mwana kamuntu, talishaku mesu eyi naŋovu kudi mwanta waEjipitu Fwaro, wuprofweti nsaŋu jakumuzuwila, nŋakuzuwila aEjipitu ejima.

³Hoshaku neyi, Mwanta Yehova nindi, Eyi mwanta wakuEjipitu Fwaro, tiya, ami nidi neyi nandombu, eyi chazaŋombi muneni wawutama mukachi katuloŋa tweyi, wuneli neyi, Kaloŋa kami kamami aweni, yami nakelili, nami kekali kamami aweni.

⁴Nakasha malonda muyibaŋa yeyi, nakalamatisha inshi janamutuloŋa tweyi kumakálu eyi, nakakufumisha mukachi katuloŋa tweyi, hamu nanshi janamutuloŋa tweyi jinalamati kumakálu eyi jejima.

⁵Nakakuumbila mwisaŋa, nineyi ninshi janamutuloŋa tweyi jejima. Wakaholokela hampata hatooka; hiyakakukumaŋeja hela kukupompeshaku. Nakuhani dehi wikali mbiji yawanyama amwisaŋa nawatujila ahaluzwizu.

⁶Antu ashakama muEjipitu ejima akeluka nawu yami Yehova, nanochu chanekaluwu dehi mukombu weteti kudi akwamutaŋa waIsarela.

⁷Chakukwatiluwu nachikasa, wafunukili, waleŋwili chifwiji chawu chejima. Chashindamenenuwu hadeyi, wakotokeli, wazaalishili nkuma jawu jejima.

⁸Dichi Mwanta Yehova nindi, Tiya, nakakuletela mpoku yakabali, nakakufumisha niantu nianyama.

⁹Ituŋa daEjipitu dakekala kwamahembi muchinkalampata mwamukunkulwayi. Akeluka nawu yami Yehova; nanochu chaneliyi nindi, Kaloŋa kami, yami nakelili.

¹⁰Dichi tiya, ami nidi neyi nandombu, nituloŋa tweyi nidi natu nandombu, nakabalumuna ituŋa daEjipitu kwikala chinkalampata chamukunkulwayi chikupu kwrama hembi hohu, kufumisha kukaposhi kakuSevene ndo nikuŋinza yaEtiyopiya.

¹¹Kwosi mwendu wamuntu wakahita mwokuku, hela mwendu wakanyama wakahita mwokuku, hela muntu wakashakama mwokuku nyaka makumi awana.

¹²Ituŋa daEjipitu nakadibalumuna kwikala kwamahembi hohu, mukachi kamatuŋa anekali dehi kwamahembi hohu, ninyikala yindi yakekala kwamahembi hohu nyaka makumi awana, mukachi kanyikala yanakisaŋanuwu. AEjipitu nakayipalaŋeshela munyuza, nakayimwaŋila mwahita matuŋa.

¹³Muloŋa Mwanta Yehova nahoshi nindi, Chikwakamana nyaka makumi awana nakapompesha aEjipitu, nakayifumisha munyuza yawantu kwaŋalaŋenenuwu.

¹⁴Nakaleta cheŋi aEjipitu ayili muwukoli, nakayifuntisha mwituŋa daPatirosi, mwituŋa davwalikililuwu; akekalamu nawanta wakadi kulema.

¹⁵Hamawanta ejima wakaswejamu kukeha, diyi yena. Hamba kadinyamuna cheŋi kwiwulu mukachi kanyuzaku. Nakayikehesha kulonda akabuli kuyula cheŋi nyuza.

¹⁶Hakekala nawa cheŋi wakukuhwelela kudi mutaŋa waIsarela, haanukishiluwu kuluwa kwawu kwakutala kudi wenaku. Akeluka nawu yami Mwanta Yehova.

¹⁷Mumwaka wamakumi ayedi nakatanu nakayedi, mukakweji kakusambila, mwifuku dakakweji dakusambila, izu daYehova denjili kudami,

¹⁸nindi, Eyi mwana kamuntu, mwanta wakuBabiloni Nebukaneza wakalakeshili njita yindi mudimu weneni wakudasa naTira. Nyitu yejima yaseyekeli mabala, mafwŋi ejima asupukili, hela chochu, niyena ninjita yindi, hiyamweni wufwetu wakutambula kudi Tira wamudimu wakalakeliyi wakudasa naTiraku.

¹⁹Dichi Mwanta Yehova nindi, Tiya, nakamwinka mwanta wakuBabiloni Nebukaneza ituŋa daEjipitu. Wakatwala luntu lwindi, wakamupuŋa yuma yindi, wakakwata chakukwata; akekali wufwetu wanjita yindi.

²⁰Namwinki dehi ituŋa daEjipitu diikali wufwetu wanakalakeliyi, muloŋa wena ankoŋelelaŋami. Dimu mwanahoshiyi Mwanta Yehova.

²¹Hefuku odu nakamenesha luseŋu kumuchidi waIsarela, nakakujikula kukanwa mukachi kawu. Akeluka nawu yami Yehova.