Read MUKANDA WANZAMBI Ezekiele 30 Bible Online

Ezekiele 30 - MUKANDA WANZAMBI bible

Ezekiele 30

¹Izu daYehova denjili cheŋi kudami,

²nindi, Eyi mwana kamuntu, profwetaku, wili neyi, Mwanta Yehova nindi, Kalokenu! Yayo, o difuku!

³Muloŋa ifuku didi kwakwihi, ifuku daYehova didi kwakwihi, hiifuku damavu, dampinji yanyuza.

⁴Mpoku yakabali yakayiwana aEjipitu, muEtiyopiya mwakekala kutiya kumuchima ŋati, hakadimbukawu akajahawu muEjipitu. Akafumishaku luntu lwindi, niyikuku yindi akayihumona.

⁵AEtiyopiya, niaPuti, niaLudi, niantu ejima akubombashana, niaKubi, niantu amwituŋa datiyaloŋana chitiyaŋenu, akadimbuka hamu nawena kumpoku yakabali.

⁶Yehova nindi, Niwena akakwasha aEjipitu akadimbuka, niŋovu jindi jaditembayi jakafwomoka. Akadimbokamu nampoku yakabali kufumisha kukaposhi kakuSevene. Dimu mwanahoshiyi Mwanta Yehova.

⁷Akekala kwamahembi hohu, mukachi kamatuŋa anekali dehi kwamahembi hohu, nyikala yindi yakekala mukachi kanyikala yanakisaŋanuwu dehi.

⁸Chinakasha kesi mwituŋa daEjipitu, chakajilumukawu ankwashi jindi ejima, akeluka nawu yami Yehova.

⁹Hefuku odu kwakafuma antemesha akufuma kumesu ami, akaya mumaatu nakuyitiyisha aEtiyopiya adiwujola woma; kwakayiwana yuma yakutiya nikumuchima ŋati, neyi chamwenuwu hefuku daEjipitu; muloŋa tala, oyu yikwinzoyu.

¹⁰Mwanta Yehova nahoshi nindi, Nakakumisha luntu lwaEjipitu nachikasa chamwanta wakuBabiloni Nebukaneza.

¹¹Yena hamu nawantu indi, wowu amunyuza atiyawu woma, akayiletamu kulonda akajilumuni ituŋa. Akayiholela aEjipitu mpoku jawu jatubali, akenzesha ituŋa nawantu akajahawu.

¹²Nakomisha tuloŋa, ituŋa nakadilandisha mumakasa awantu atama. Niituŋa niyuma yejima yekalamu nakabalumuna kwamahembi hohu namakasa awantu akumatuŋa acheŋi. Ami Yehova nahoshumu dehi.

¹³Mwanta Yehova nindi, Nakajilumuna nawa niakishi akutuŋa, nakakumisha niakishi akuNofwi. Hikwakekala nawa cheŋi kalamba kakufuma mwituŋa daEjipituku; nakasha woma mwituŋa daEjipitu.

¹⁴NiPatirosi nakamubalumuna kwamahembi hohu, nakasha kesi muZowani, muNo nakakoŋamu yakubabesha.

¹⁵Nakechila kulendumuka kwami haSini hadikaŋilawu aEjipitu; nakakumisha luntu lwaNo.

¹⁶Nakasha kesi muEjipitu; Sini wakatiya kumuchima ŋati, No wakahumuka; Nofwi wakamona ayilumbu mwaana wejima.

¹⁷Anyikwenzi akuAvene nakuPibeseti akadimbuka nampoku yakabali, nyikaloyu yakaya muwukoli.

¹⁸Chinakakotola mpanda jaEjipitu kuTehafweneliesi mwaana wakeyila, niŋovu jindi jaditembayi jakamukuma. Yena nawa ivu dakamubuta, anyanindi awambanda akaya muwukoli.

¹⁹MuEjipitu nakakoŋa munasompeshi. Akeluka nawu yami Yehova.

²⁰Mumwaka wekumi nakamu, mukakweji kamu, mwifuku dakakweji dakatanu nakayedi, izu daYehova denjili kudami,

²¹nindi, Eyi mwana kamuntu, ami nakotoli chikasa chamwanta wakuEjipitu Fwaro. Talenu, hiyanachikasi kukasa kwakusha yitumbuku, hiyanajiŋaji ŋuhu ihina kulonda chakakoli, chakakwati kumpoku yakabaluku.

²²Dichi Mwanta Yehova nindi, Tiyenu, mwanta wakuEjipitu Fwaro nidi nindi nandombu, nakakotola makasindi, nichakola nichakotokeli dehi, nakamuholwesha mpoku yakabali muchikasa chindi.

²³Nakaŋalaŋesha aEjipitu mukachi kanyuza, nakayimwaŋila mwahita matuŋa.

²⁴Nakakolesha makasa amwanta wakuBabiloni, muchikasa chindi nakashamu mpoku yami yakabali; nakakotola makasa aFwaro, wakaabila kumesu indi kwaba kwaabaŋa muntu anatapuwu chakufwa.

²⁵Nakamukwatilila mwanta wakuBabiloni makasindi kwiwulu, makasa aFwaro akalepuka. Chinakasha mpoku yami yakabali muchikasa chamwanta wakuBabiloni, chakachololayi hetuŋa daEjipitu, akeluka nawu yami Yehova.

²⁶Nakaŋalaŋeshela aEjipitu munyuza, nakayimwaŋila mwahita matuŋa. Akeluka nawu yami Yehova.