Read MUKANDA WANZAMBI Ezekiele 31 Bible Online

Ezekiele 31 - MUKANDA WANZAMBI bible

Ezekiele 31

¹Mumwaka wekumi nakamu, mukakweji kamuchisatu, mwifukudakakweji dakusambila, izu daYehova denjili kudami,

²nindi, Eyi mwana kamuntu, mwili mwanta wakuEjipitu Fwaro niluntu lwindi, neyi, Wadifwana nanyi kutoha?

³Tiya, kaAshuri wadiŋi musida hindi muLebanoni, nanyitayi yindi yayiwahi, namafu indi ajika akweti wulelu, wanyuŋa nankashi. Mutayi windi wamunamutu wadiŋi mukachi kanyitayi yajika.

⁴Yimeji yamutohesheli, inyiŋi damukulishili. Tuloŋa twindi twahitahitili kwanamutumbiluwu kwi-ndo. Yena hakutemesha tupila twindi twamejikunyitondu yejima yamumpata.

⁵Dichi kunyuŋa kwindi kwaswejeli, kwamotokeli nyitondu yamumpata yejima. Tunyitayi twindi hitukuvula, ninyitayi yindi chiyameneni hiyikuleha nayimeji yayivulu.

⁶Atujila ahaluzwizu hiyakutuŋila yisakala yawu namutunyitayi twindi, anyama amumpata ejima hiyakusemena mwishina danyitayi yindi, nyuza yamaneni yejima hiyikushakama muwulelu windi.

⁷Dichi wawahili nakutoha kwindi nakuleha kwanyitayi yindi; muloŋa muji windi wadiŋi kuyimeji yayivulu.

⁸Nyisida yamwitempa daNzambi hiyatwesheli kumuswekaku. Nyinjunŋa hiyafweni neyi nyitayi yinduku, ninyilendi hiyadiŋi neyi nyitayi yinduku; mwitempa daNzambi himwadiŋi mutondu niwumu wadifweni nindi kulubanjuku.

⁹Ami namuwahishili nanyitayi yindi kuvula, chakwila nyitondu yamuEdeni yejima yadiŋi mwitempa daNzambi, hiyikumutiya ichima.

¹⁰Dichi Mwanta Yehova nindi, Ochu chiwunasweji dehi kunyuŋa, yena washa dehi mutayi windi wamunamutu mukachi kanyitayi yajika, wananisha dehi nimuchima windi nakunyuŋa kwindi.

¹¹Dichi ami nakamuhana kudi mukwaŋovu wamunyuza; yena wakamukoŋa mwakala. Namutemunamu dehi nakutama kwindi kwelaŋayi.

¹²Anamukantumu numu dehi kudi antu akwacheŋi, wowu amunyuza atiyawu woma, amushiya nikumushiya. Nyitayi yindi yinaholokeli hamapidi namuyinekineki yejima, nitunyitayi twindi tunakotokeli kutupila twameji twamwituŋa twejima. Antu amunyuza ejima aheseki anafumi dehi muwulelu windi, anamushiyi dehi.

¹³Atujila ejima ahaluzwizu akenza nakushakama hadi yena nakotoki, anyama ejima amumpata akalumbama hanyitayi yindi;

¹⁴kulonda nyitondu yejima yakuyimeji yakabuli kuditemba nakunyuŋa kwawu, yakabuli kusha mutayi wawu wamunamutu mukachi kanyitayi yajika, niantu awu akwaŋovu ejima anwaŋa meji, akabuli kwimana nakunyuŋa kwawu. Muloŋa wejima wawu ayihana dehi mukufwa, ayi mumashina amaseki, mukachi kawanyana kawantu, hamu nanawa akukunkumuka muwina.

¹⁵Mwanta Yehova nindi, Ifuku dakunkumukiliyi mukaluŋa nadilishili antu. Nabutili inyiŋi nansaŋu yindi, nalekesheli nituloŋa twadu, nemikili niyimeji yamaneni, nadilishili Lebanoni hansaŋu yindi, ninyitondu yamumpata yejima hiyikuhwidŋela nansaŋu yindi.

¹⁶Chinamukunkumwishili mukaluŋa hamu nanawa akukunkumuka muwina, nakankishili nyuza nalushindu lwaholokeliyi. Nyitondu yamuEdeni yejima, niyamuLebanoni yakusakula sakula yasweja kuwaha, yanwaŋa meji yejima, ayikundejeli mumashina amaseki.

¹⁷Wena nawa akunkumukili nindi hamu mukaluŋa, kudi akwawu ajahiluwu nampoku yakabali; eŋa, diwu adiŋi chikasa chindi, ashakaminaŋa muwulelu windi mukachi kanyuza.

¹⁸Ichi dinu wunadifwani nanyi kukulema nikutoha mukachi kanyitondu yamuEdeni? Hela chochu, akakukunkumwisha mumashina amaseki hamu nanyitondu yamuEdeni. Wakakama mukachi kawayidima hamu nanawa anajahuwu nampoku yakabali. Yeniwu diyi Fwaro naluntu lwindi lwejima. Dimu mwanahoshiyi Mwanta Yehova.