Read MUKANDA WANZAMBI Ezekiele 32 Bible Online

Ezekiele 32 - MUKANDA WANZAMBI bible

Ezekiele 32

¹Mumwaka wekumi nakayedi, mukakweji kekumi nakayedi, mwifuku dakakweji dakusambila, izu daYehova denjili kudami,

²nindi, Eyi mwana kamuntu, mudilili mwanta wakuEjipitu Fwaro mukeŋa, wumwili neyi, Eyi akufwikijili neyi mwenzi wamutupa wamunyuza. Komana kweyi, wuchanzaŋombi wamutuluŋalwiji. Hiwukutupukamu hamu natuloŋa tweyi, hiwukuvundula meji nanyendu yeyi, hiwukuvundaŋesha tuloŋa twawu.

³Mwanta Yehova nindi, Nakakutandumwina wanda wami hewulu, hamu nachendu chanyuza yawantu yayivulu; akakukandwisha muwanda wami.

⁴Nakakushiya heseki, nakakunatila hampata yamukunkulwayi, nakakupompeshela atujila ahaluzwizu ejima akawilawili hadeyi, nakekutisha anyama amwisaŋa dejima nambiji yeyi.

⁵Nakanatanata mbiji yeyi hamapidi, nakenzesha yinekineki namavunu eyi.

⁶Nakazowesha ituŋa namashi eyi, akechikila nikumapidi; nitupila twameji twakenzala naneyi.

⁷Chinakakujima nakabuta iwulu, nakeyilisha tutumbwa tudumu. Nakabuta itaŋwa nevu, nikakweji hakatoŋeka nawa mweji winduku.

⁸Yuma yejima yasweja kutoŋeka mwiwulu nakayiyilisha hewulu deyi, nakasha mwidima hetuŋa deyi. Dimu mwanahoshiyi Mwanta Yehova.

⁹Chinakashimuna kukisika kweyi munyuza, mumatuŋa iwabulili kwiluka, nakavuloka antu amavulu, akazuwa munyichima yawu.

¹⁰Nakahayamisha nyuza yayivulu nansaŋu yeyi, nianyanta jawu akazaala woma nankashi nansaŋu yeyi, chinakabimba nampoku yami yakabali kumesu awu; ifuku diwakadimbukeyi akazaala ora jejima, iwu nakuzaalila wumi windi, iwu nakuzaalila wumi windi.

¹¹Muloŋa Mwanta Yehova nindi, Mpoku yamwanta wakuBabiloni yakabali yakakuwana.

¹²Nakadimbwisha luntu lweyi nampoku jawayilobu jatubali, wejima wawu wowu amunyuza atiyawu woma. Akafwomona wanta wadinkawu aEjipitu, niluntu lwawu lwejima akalujilumuna.

¹³Nakajilumuna nawa anyama aduku ejima kuyikumu yameji amavulu; hiyakayivundula nawa cheŋi namwendu wamuntu, hela kuyivundula nayikwa yawanyamaku.

¹⁴Henohu nakatelesha meji awu, nakendesha tuloŋa twawu neyi manji. Dimu mwanahoshiyi Mwanta Yehova.

¹⁵Chinakabalumuna ituŋa daEjipitu kwikala mahembi muchinkalampata mwamukunkulwayi, ituŋa dabula niyuma yalumbamina ŋamu, chinakataŋamu antu ejima ashakamamu, dihu hakelukawu nawu yami Yehova.

¹⁶Wcniwu diwu mukeŋa wakadilawu; diwu wakadilawu anyana awambanda amunyuza; diwu mukeŋa wakadilawu aEjipitu niluntu lwindi lwejima. Dimu mwanahoshiyi Mwanta Yehova.

¹⁷Mumwaka wekumi nakayedi, mwifuku dakakweji dekumi nakatanu, izu daYehova denjili kudami,

¹⁸nindi, Eyi mwana kamuntu, tumpilaku luntu lwakuEjipitu ikumbu, wuyikunkumwishi niyena nianyana awambanda amunyuza yalema mumashina amaseki, hamu nanawa akukunkumuka muwina.

¹⁹Wunabadiki mukwenwinyi kuwaha? Kunkumukaku akukamiki hamu nawayidima.

²⁰Akadimbukila mukachi kanawa ajahawu dehi nampoku yakabali. Anamwinki dehi kumpoku yakabali. Mukokenu nichintu chindi chachivulu.

²¹Ayilobu asweja Ŋovu akahosha nindi mukaluŋa hamu nanawa amukwashaŋa, nawu, Anakunkumuki dehi, anakami dehi zo-o, ayidima ajahawu dehi nampoku yakabali.

²²Ashuri wudi kwenoku nichendu chindi chejima. Majamu indi anamunyeŋumuki kwi-ndo. Wejima wawu wowu ajahawu dehi, wowu adimbuka dehi kumpoku yakabali;

²³diwu akweti majamu awu ashawu dehi kunsa jawina, nichendu chindi chejima chinanyeŋumuki ŋamu dindi. Wejima wawu wowu ajahawu dehi, wowu adimbuka dehi kumpoku yakabali, wowu afwishilaŋa akwawu mutentu mwituŋa dawamomi.

²⁴Elami wudi kwenoku niluntu lwindi lwejima lunanyeŋumuki ŋamu dindi kwi-ndo. Wejima wawu wowu ajahawu dehi, wowu adimbuka dehi kumpoku yakabali, wowu akunkumuka dehi nawudima wawu mumashina amaseki, wowu afwishilaŋa akwawu mutentu wawu mwituŋa dawamomi, anayi dehi nansonyi jawu hamu nanawa akukunkumuka muwina.

²⁵Asha dehi kadidi kindi mukachi kanawa ajahawu dehi, hamu naluntu lwindi lwejima. Majamu indi anamunyeŋumuki kwi-ndo. Wejima wawu wowu ayidima, wowu ajahawu dehi nampoku yakabali; muloŋa afwishilaŋa akwawu mutentu wawu mwituŋa dawamomi, anayi dehi nansonyi jawu hamu nanawa akukunkumuka muwina. Anamushi dehi mukachi kanawa ajahawu dehi.

²⁶Mesheki wudi kwenoku, niTubali niluntu lwindi lwejima. Majamu indi anamunyeŋumuki kwi-ndo. Wejima wawu wowu ayidima, wowu ajahawu dehi nampoku yakabali; muloŋa afwishilaŋa akwawu mutentu wawu mwituŋa dawamomi.

²⁷Hiyakakama hamu nawayilobu awayidima anadimbuki, anakunkumuki mukaluŋa hamu nayitwa yawu yanjita, anasachili nyitu yawu hampoku jawu jatubali hamakoshi awu, kuluwa kwawu kudi hamafwahawuku. Muloŋa wena afwishilaŋa ayilobu mutentu mwituŋa dawamomi.

²⁸Hakwila eyi akakukotwela mukachi kawayidima, wakakama hamu nanawa ajahawu dehi nampoku yakabali.

²⁹Edomi wudi kwenoku, nianyanta jindi, niatulamba twindi ejima, wowu adiŋi naŋovu jawu anakamikuwu hamu nanawa ajahawu dehi nampoku yakabali. Akakamaŋa hamu nawayidima, nanawa akukunkumuka muwina.

³⁰Atulamba akukabeta kakuchimunswa adi kwenoku wejima wawu, niaZidoni ejima anakunkumuki hamu nanawa ajahawu dehi, anatiyi dehi nsonyi yamutentu wafwishilaŋawu akwawu nawulobu wawu. Anakami nawudima hamu nanawa ajahawu dehi nampoku yakabali, anayi nansonyi jawu hamu nanawa akukunkumuka muwina.

³¹Fwaro chakayimonayi akamukundeja nansaŋu yaluntu lwindi lwejima, yowu yomweni Fwaro ninjita yindi yejima yajahawu dehi nampoku yakabali. Dimu mwanahoshiyi Mwanta Yehova.

³²Muloŋa ami nasha dehi jakuŋufwa mutentu mwituŋa dawamomi. Akamukamika mukachi kawayidima hamu nanawa ajahawu dehi nampoku yakabali, yowu yomweni Fwaro niluntu lwindi lwejima. Dimu mwanahoshiyi Mwanta Yehova.