Read MUKANDA WANZAMBI Ezekiele 33 Bible Online

Ezekiele 33 - MUKANDA WANZAMBI bible

Ezekiele 33

¹Izu daYehova denjili kudami,

²nindi, Eyi mwana kamuntu, hoshaŋa nawanyana kawakwenu, wuyili neyi, Chinukuleta mpoku yakabali hetuŋa, neyi antu amwituŋa akatonda mwinawu wumu, hiyakumwinka mudimu wakuyitalatalila,

³neyi yena wukumona mpoku yakabali yidi nakwinza mwituŋa, hakwimba mpùŋa, hakukonkomwena antu,

⁴muntu wukwila yena mpùŋa nayitiyi, yena kubabala nehi, neyi mpoku yakabali yikwinza, hiyikumufumishahu, mashi indi akumukumina hanamutu windi yomweni.

⁵Yena mpùŋa wayitiya, kubabala nehi, mashi indi akamukumini yomweni; neyi yena wababala mutenowu napulwishi wumi windi.

⁶Ilaŋa neyi mukwakutalatala wukumona mpoku yakabali yidi nakwinza, kwimba mpùŋa nehi, antu nawa kubabala nehi, nimpoku yakabali yikwinza, hiyikufumisha muntu mukachi kawu, eŋa, yena anamufumishi dehi nakuluwa kwindi, ilaŋa mashi indi nakayiihwila kudi mukwakutalatala.

⁷Dichi eyi mwana kamuntu, nakwinki dehi mudimu wakuyitalatalila mutaŋa waIsarela. Dichi tiyaku izu dakukanwa kami, wumbabesheluwu.

⁸Chinakamwila muntu watama nami, Eyi muntu watama, chalala wakafwa, eyi nawa kuhosha wumubabeshi owu muntu watama aleki mwelaŋayi nehi; owu mimtu watama wakafwa nakuluwa kwindi, ilaŋa mashi indi nakehula kudeyi.

⁹Ilaŋa neyi eyi wukubabesha muntu watama mwelaŋayi kulonda alekumu, yena nawa kuleka mwelaŋayi nehi, wakafwa nakuluwa kwindi, hakwila eyi wunapulwishi wumi weyi.

¹⁰Dichi eyi mwana kamuntu, kayili akwamutaŋa waIsarela neyi, Tiyenu chimwahoshaŋa, mwahoshaŋa nenu, Nyiloŋa yetu ninshidi jetu jojitwaditwika dehi kwetu, janyapisha dehi ninyijimba yetu, indi dinu tukuhanda ŋahi?

¹¹Kayili neyi, Mwanta Yehova nindi, Chinahandichi kwaamu, hinatiyaloŋa kuwaha nakufwa kwamuntu watamaku; chiŋa muntu watama abalumuka aleka mwelaŋayi, ahanda. Balumukenu, balumukenu, muleki mumwelaŋa mwatama; mufuhu tuhu kwenu enu akwamutaŋa waIsarela?

¹²Dichi eyi mwana kamuntu, kayili anyana kawakwenu, neyi, Kuloŋa kwamuntu waloŋa hikwakamupulwisha hefuku dakamonayi muloŋaku; nikutama kwamuntu watama hikwakamudimbwisha mwifuku dakalekayi kutama kwinduku. Hela muntu waloŋa hakatwesha kuhandila kuloŋa kwindi mwifuku dakavulumunayuku.

¹³Chinakamwila muntu waloŋa nami, Chalala eyi wakahanda; neyi wakakuhwelela kuloŋa kwindi, hakuheŋa, hiyakaanuka yuma yaloŋa yeliliyi hela chimuku. Wakafwa nakuheŋa kwindi kwanakoŋiyi.

¹⁴Cheŋi nawa chinakamwila muntu watama nami, Chalala wakafwa; neyi wakabalumuka aleka nshidi yindi, hakwila yuma yaya muwuŋaji nakuloŋa;

¹⁵neyi muntu watama wakamufuntishila mukwamukudi chuma chindi chamwinkeliyi nindi kwatakuku, hakufuntisha cheŋi nichuma chabuwiliyi, hakwenda munshimbi jawumi, kuheŋaŋa nehi; chalala wakahanda, hakafwaku.

¹⁶Hiyakamwanukila nawa nshidi jindi janavulumuniyi niyimuku. Nakoŋi yaya muwuŋaji nakuloŋa; chalala wakahanda.

¹⁷Hakwila anyana kawakwenu adi nakwila nawu, Mwelaŋayi Mwanta himwesekanaku, kutoŋa mwelaŋawu wena dimu mwabula kwesekana.

¹⁸Muntu waloŋa chakulekayi kuloŋa kwindi hakuheŋa, wakafwilamu.

¹⁹Muntu watama chakulekayi kutama kwindi, hakwila yaya muwuŋaji nakuloŋa, wakahandilaku.

²⁰Enu nawa saŋa mwelila nenu, Mwelaŋayi Yehova himwesekanaku. Enu akwamutaŋa waIsarela, wejima wenu nakayisompesha mwaya yuma yimwelaŋa.

²¹Mumwaka wawukoli wetu wekumi nakayedi, mukakweji kekumi, mwifuku dakakweji dakatanu, muntu wumu wapulukili muYerusalema, wenjili kudami nakwila nindi, Mukala anawutapi.

²²Henohu helili owu muntu wapulukili wuchidi kanda enzi, chikasa chaYehova chadiŋi hadami namelela, wajikula dehi nikanwa kami, kushika nihenohu henjiliyi owu muntu kudami nabudidi. Kanwa kami kajikukili, hinadiŋi nawa cheŋi kamamaku.

²³Izu daYehova denjili kudami,

²⁴nindi, Eyi mwana kamuntu, owu ashakama muna muyinkalampata yidi mwituŋa daIsarela, adi nakuhosha nawu, Abarahama wadiŋi wumu wasweneni ituŋa. Etu tudi amavulu, ituŋodu anatwinki dehi etu dawuswana.

²⁵Dichi kayili neyi, Mwanta Yehova nindi, Enu mwadyaloŋa mbiji yikweti mashi, mwafumbulaŋa mesu enu kudi akishi enu akutuŋa, mwapwekeshaŋa mashi, enu muswani ituŋa?

²⁶Enu mwemanaŋa hampoku jenu jatubali, mwakoŋaŋa yishimashima, wejima wenu mwatamishaŋa ŋodi jawakwenu, enu muswani ituŋa?

²⁷Kayili neyi, Mwanta Yehova nindi, Chinahandichi kwaamu, chalala ana adi muna muyinkalampata akadimbuka nampoku yakabali, niwudi mumpata yitooka, nakayinka anyama akamudyi, ninawa adi muyiŋaka yakudikaŋila namayeŋu akafwa nachipupu.

²⁸Ituŋa nakadibalumuna damahembi hohu, dakuhayama, niŋovu jawu jaditembawu jakakuma. Mpidi jamuIsarela jakekala kwamahembi hohu, jakadi kuhita antu.

²⁹Chinakela nabalumuni dehi ituŋa damahembi hohu dakuhayama, nayishimashima yawu yejima yanakoŋuwu, dihu hakelukawu nawu yami Yehova.

³⁰Hakwila eyi mwana kamuntu, akutenaŋa kudi anyana kawakenu kumbaŋu, nikuyisu yamatala, ahoshahoshaŋa wumu namukwawu, iwu hakumwila mana kwindi nindi, Tuyenu mwani, twakatiyi izu dikufuma kukanwa kaYehova.

³¹Hiyakwinza kudeyi mwomwenjilaŋawu antu, hiyakushakamaŋa kumesu eyi neyi hiyantu ami, hiyakutiyaloŋa mazu eyi, ilaŋa kwilamu nehi; muloŋa wena nakanwa kawu amwekeshaŋa kukeŋakwasweja, ilaŋa nyichima yawu yalonda wudiilu wawu.

³²Komana wena anakumoni neyi wukamina kakawahi kamuntu wukweti izu dasweja kuwaha, weluka kwimba chisanji chachiwahi. Muloŋa mazu eyi ayitiyaloŋa, ilaŋa kuyilaŋa nehi.

³³Chichakamwekana chumichi, ninodu chakamwekana, dihu hakelukawu nawu, Twadiŋi nakaprofwetu mukachi ketu.