Read MUKANDA WANZAMBI Ezekiele 34 Bible Online

Ezekiele 34 - MUKANDA WANZAMBI bible

Ezekiele 34

¹Izu daYehova denjili kudami,

²nindi, Eyi mwana kamuntu, yiprofweti atubiŋa twawaIsarela nsaŋu jakuyizuwila, profwetaku, wuyili, wuyili wowenawa atubiŋa, neyi, Mwanta Yehova nindi, Awa atubiŋa twawaIsarela adidiishaŋa wenawu, yayo! Atubiŋa hiyadi kudiishaŋa nyikokuku?

³Enu mwadyaloŋa manji, mwavwalaŋa yamavuji anyikoku, mwajahaŋa nyidimba yanuna, ilaŋa kudiishaŋa nyikoku nehi.

⁴Azeya himunayikoleshuku, kata himunayukuku, akotoka himunayikasuku, áhaŋewa himunayifuntishuku, ajimbala himunayikeŋakeŋuku, munayiyuli kwana Ŋovu nawukatu hohu.

⁵Anaŋalaŋani ndu-ndu muloŋa hikudi kabiŋaku. Anekali dehi mbiji yawanyama ejima amumpata, anaŋalaŋani kwawu.

⁶Nyikoku yami yatambatambili mwahita mpidi jamaneni jejima, nihampidi janyuŋa jejima. Eŋa, nyikoku yami yaloŋalaŋeneni mwahita iwulu damaseki dejima, hikwadiŋi wakuyikeŋakeŋa hela wakuyitondaku.

⁷Dichi enu atubiŋa, tiyenu izu daYehova.

⁸Mwanta Yehova nindi, Chinahandichi kwaamu, chineli nyikoku yami anayikwati dehi, nyikoku yami yinekali dehi mbiji yawanyama amumpata ejima, nanichi chikunabuli kabiŋa; hela atubiŋa twami kukeŋakeŋaŋa nyikoku yami nehi, atubiŋa anadidiishi awenawu, kudiishaŋa nyikoku yami nehi;

⁹dichi enu atubiŋa, tiyenu izu daYehova.

¹⁰Mwanta Yehova nindi, Tiyenu, atubiŋanidi nawu nandombu, nyikoku yami nakayiihwila kudi wena, nakayilekesha kudiisha nyikoku yami; niatubiŋa hiyakadidiishaŋa cheŋi awenawuku; nakapulwisha nyikoku yami kutunwa twawu, kulonda akabuli kwikala yakudya wena.

¹¹Muloŋa Mwanta Yehova neli nindi, Tiyenu, ami aweni, eŋa, yami nakakeŋakeŋa nyikoku yami, nakatalatala nakamoni kwaduwu.

¹²Nakata latala nakamoni kudi nyikoku yami, neyi chatalatalaŋa kabiŋa amoni nyikoku yindi, mwifuku dakwikalayi kudi nyikoku yindi yinaŋalaŋani. Nakayipulwisha kwonsu kwanaŋalaŋa enuwu mwifuku dachiwulu damwidima wakushishita.

¹³Nakayifumisha munyuza yawantu, nakayipompesha naku-yifumisha mumatuŋa, nakayiŋŋa mwituŋa dawu awenawu, nakayidiishila kumapidi amuIsarela, munyihoŋi, nimwituŋa dejima mwatuŋatuŋawu antu.

¹⁴Nakayidiishila kuwudiilu wawuwahi, idimba dawu dakekala hamapidi amuIsarela kwanyuŋa. Akakamaŋa kwenoku mwidimba dadiwahi, akadiilaŋa hamapidi amuIsarela hawudiilu wawuwahi.

¹⁵Ami aweni nakadiishaŋa nyikoku yami, nakayikamikaŋa. Dimu mwanahoshiyi Mwanta Yehova.

¹⁶Ajimbala nakayikeŋakeŋa, áhaŋewa nakayileta cheŋi, akotoka nakayikasa, akata nakayikolesha; anuna nawakweti Ŋovu nakayikisaŋana; nakayidiishaŋa chakusompesha.

¹⁷Dichi enu akwamukanka wami, Mwanta Yehova nindi, Tiyenu, ami nasompeshaŋa hakachi kanyikoku nanyikoku, nihakachi kayizamba yanyikoku nayizamba yampembi nawa.

¹⁸Chimunadiili hawudiilu wawuwahi, komana munachimoni nenu hichuma chakuhemesha, mwaka mudatolaŋa nanyendu yenu hawudiilu hanashali, tahindi? Munwi nawa meji atela, anashali muyivundoli nanyendu yenu?

¹⁹Nyikoku yami yadyaloŋa yimunadatoli nanyendu yenu, yanwaŋa nawa yimunavundoli nanyendu yenu.

²⁰Dichi Mwanta Yehova nayili nindi, Tiyenu, ami, eŋa, yami nakasompesha mukachi kanyikoku yanuna nanyikoku yakosa.

²¹Muloŋa munashinjeki akwenu nambavu namakasa, akwenu ejima akweti nyisoŋu, munayishinjeki nanseŋu jenu, aŋalaŋana nindu-ndu.

²²Dichi ami nakaamwina mukanka wami wanyikoku, hiyakayikwataŋa nawa cheŋuku. Nakasompesha hakachi kanyikoku nanyikoku.

²³Ami nakayinyamwina kabiŋa wumu, wakayidiishaŋa, yowu kambuŋami Davidi. Diyi wakayidiishaŋa, diyi wakekala kabiŋa kawu.

²⁴Ami Yehova nakekala Nzambi yawu, kambuŋami Davidi wakekala kalamba mukachi kawu; ami Yehova yami nachihoshi.

²⁵Nakatiyaloŋana nawu chitiyaŋenu chakuwunda, mwituŋa dawu nakakumishamu anyama atama, akashakamaŋa mwisaŋa chakadi kwakama, akakamaŋa tulu mulusesa.

²⁶Niwena nimaluŋa ananyeŋumuki mpidi yami nakayibalumuna akuleta nkisu. Nakanokesha nvula jawo, wo, hachilaaka chaju. Kwakanoka nvula jawo, wo, jankisu.

²⁷Nyitondu yamumpata yakasoŋa nyikabu yayu, iseki nawa dakasoŋesha yakudya yadu, akashakama mwituŋa dawu chakadi kwakama. Chinakela nakotoli dehi nyitondu yamumpanda jawu, nayipulwishi dehi kudi awa ayikwatili muwuduŋu, mwakeluka nenu, yami Yehova.

²⁸Hiyakayikwataŋa cheŋi kudi nyuzaku, hiyakayidyaloŋa kudi anyama amumpataku. Akashakama chakadi kwakama, kwosi wakayitiyisha womaku.

²⁹Nakayimeneshela mutondu watiyakana mpuhu, hiyakanoŋa nawa cheŋi nanzala mwituŋaku, hiyakayikoolesha nawa cheŋi nsonyi kudi nyuzaku.

³⁰Akeluka nawu ami Yehova Nzambi yawu nidi nawu, niwena akwamutaŋa waIsarela hiyantu ami. Dimu mwanahoshiyi Mwanta Yehova.

³¹Ninenu nyikoku yami, nyikoku yahawudiilu wami, muyantu, ami nawa niNzambi yenu. Dimu mwanahoshiyi Mwanta Yehova.