Read MUKANDA WANZAMBI Ezekiele 35 Bible Online

Ezekiele 35 - MUKANDA WANZAMBI bible

Ezekiele 35

¹Izu daYehova denjili kudami,

²nindi, Eyi mwana kamuntu, talishaku mesu eyi kumpidi yaSeyiri, wuprofweti nsaŋu jakuyizuwila,

³wuyili neyi, Mwanta Yehova nindi, Tiya, eyi mpidi yaSeyiri, nidi neyi nandombu, nakakwolwela chikasa chami, nakakubalumuna kwikala kwamahembi akuhayama hohu.

⁴Nakajilisha nyikala yeyi, wakekala kwamahembi hohu. Wakeluka neyi yami Yehova.

⁵Ochu chiwunalami nkunyi yahaya nyaka, chiwunayihani anyana kaIsarela kuŊovu yampoku yakabali mumwaka wakumonawu kukala, mumwaka wakuluwa kwakukuminina;

⁶dichi Mwanta Yehova nindi, Chinahandichi kwaamu, chalala nakakukunjika mashi, mashi nawa akakuhaŋa muwakaya; chiwunabuli kutiya mashi kutama, dichi mashi akakuhaŋa muwakaya.

⁷Dichi chinakabalumwina mpidi yaSeyiri kwikala wakuhayama kwamahembi hohu. Nakafumishahu niniwu wukuyamu, niniwu wukwinzamu.

⁸Nakenzesha mpidi jindi nawantu indi akajahawu; akajahawu nampoku yakabali akadimbukila kutupidi tweyi, nimuyinekineki yeyi, nimunyihoŋi yeyi.

⁹Nakakubalumuna kwamahembi ahaya nyaka, nyikala yeyi hiyakashakama antuku, mwakeluka nenu yami Yehova.

¹⁰Ochu chiwunahoshi neyi, Nyuziyi yiyedi nimatuŋawa ayedi akekala amami, twakayiheta; kutoŋa Yehova kwokwadiŋiyi;

¹¹dichi, Mwanta Yehova nindi, chinahandichi kwaamu, chalala nakakoŋa mwaya kuzuwa kweyi, nimwaya ichima deyi dinafumi hankunyi yeyi yiwayilamina. Chinakakusompesha nakayilukisha chinekalami.

¹²Wakeluka neyi, Ami Yehova natiyi matukeyi ejima iwatukili mpidi jamuIsarela, neyi, Aneli dehi mahembi, anatwinkuwu dehi etu twakayidyi.

¹³Munaditoheshi nanami natunwatwenu, munanvulishili mazu enu; ami nachitiyi.

¹⁴Mwanta Yehova nindi, Chakazaŋalala iseki dejima nakakubalumuna kwikala kwamahembihohu.

¹⁵Chiwaluŋili nawuswana wamutaŋa waIsarela nanichi chiwelili mahembi, dichi chinakakukoŋeyi; eyi mpidi yaSeyiri, wakekala kwamahembi, niEdomi wejima nawa, wejima chikupu. Akeluka nawu yami Yehova.