Read MUKANDA WANZAMBI Ezekiele 36 Bible Online

Ezekiele 36 - MUKANDA WANZAMBI bible

Ezekiele 36

¹Mwana kamuntu, profwetaku nsaŋu jakuprofweta mpidi jamuIsarela, neyi, Enu mpidi jamuIsarela, tiyenu izu daYehova.

²Mwanta Yehova nindi, Ochu chayilayi dehi chilumbu nindi, Lelo! cheŋi nawa nindi, Yinaŋanaŋa yakufumisha kunyaka yela dehi yetu, twayiheta dehi;

³dichi profwetaku neyi, Mwanta Yehova nindi, Mwalala, ochu chanayibalumunuwu kwikala mahembi hohu, chanayiminyuwu niniku niniku, kulonda akayihetaŋa kudi nyuza yinashaluku, chakuyitenawu nanyivumbu yawakwakuhoshahosha, nichimunatiyakani mpuhu yatama kudi nyuza yawantu;

⁴dichi enu mapidi amuIsarela, tiyenu izu daMwanta Yehova. Mwanta Yehova hakuyila mpidi, nitupidi, ninyihoŋi, niyinekineki, niyinkalampata, ninyikala yinabúuki dehi antu, yakwatawu dehi, yasehawu dehi kudi nyuza yawantu yina nyeŋu mukuku.

⁵Dichi Mwanta Yehova nindi, Chalala nahoshi nakesi kamukawu wami, nayihoshi nyuza yinashaluku, niaEdomi ejima anasakeni dehi ituŋa dami, nawu diikali dawu nakuluŋa kwanyichima yawu yejima, nanyichima yakasawuntu kulonda adinati adikwatakwati kudi antu.

⁶Dichi profwetelaku ituŋa daIsarela wili mapidi, nitupidi, ninyihoŋi, niyinekineki, neyi, Mwanta Yehova nindi, Nahoshi namukawu wami, nakulendumuka kwami, muloŋa munatiyi nsonyi yatiyaloŋa nyuza.

⁷Dichi Mwanta Yehova nindi, Ami nololi chikasa chami kwiwulu, nami, Chalala nyuza yayinyeŋumuka yakatiya nsonyi jawu niwena.

⁸Enu mpidi jamuIsarela, mwakasemena antu ami aIsarela nyitayi, mwakayisoŋela nyikabu yenu; muloŋa adi kwakwihi nakwinza.

⁹Ichi dinu tiyenu, ami niwenu, nakabalumuka, nakatala kudenu, akayidima, akatumbamu nimbutu.

¹⁰Hadenu nakavulishahu antu akwamutaŋa waIsarela ejima, mwalala wejima wawu; munyikala mwakashakama antu, kuyinkalampata kwakatuŋa antu.

¹¹Hadenu nakavulishahu niantu nianyama. Akavula, akasemununa. Hadenu nakashakamisna antu neyi chadiŋuwu hakusambila, nakayila mwamuwahi kubadika chimwamweni hakusambila. Mwakeluka nenu yami Yehova.

¹²Mwalala hadenu nakendeshahu antu, wowu antu ami aIsarela. Akayiheta, mwakekala wuswana wawu, himwakayibonda nawa cheŋi anyanaku.

¹³Mwanta Yehova nindi, Ochu chakuyilawu nawu, Eyi wumukwakudya antu, wadiŋi mukwakubonda muza weyi anyana wu;

¹⁴dichi hiwakadya cheŋi antuku, hiwakabonda nawa cheŋi muza weyi anyanaku. Dimu mwanahoshiyi Mwanta Yehova.

¹⁵Dichi hinakakwitŋa kutiya nawa cheŋi kukutiyisha nsonyi kudi akwanyuzaku, hiwakamona nawa cheŋi kukusawula kudi nyuza yawantuku, hiwakadimbwisha nawa cheŋi muza weyuku. Dimu mwanahoshiyi Mwanta Yehova.

¹⁶Izu daYehova denjili cheŋi kudami,

¹⁷nindi, Eyi mwana kamuntu, chashakaminuwu akwamutaŋa waIsarela mwituŋa dawu, aditamishili nayaaku yawu nayuma yelilaŋawu. Yaaku yawu nayimweni yidi neyi majilu amumbanda wudi kwitala dikwawu.

¹⁸Dichi nayiichililili kulendumuka kwami nansaŋu yamashi amwaŋiluwu mwituŋa, nanochu chaditamishiluwu nawakishi awu akutuŋa;

¹⁹hinukuyiŋalaŋesha nimunyuza, hinukuyimwaŋila mwahita matuŋa, hinukuyisompesha mwaya yaaku yawu, nimwaya yuma yelilaŋawu.

²⁰Chashikiluwu munyuza mwayiluwu hiyakujilola ijina dami dajila, nanochu chayitenenuwu nawu, Awa hiyantu aYehova, anafumi mwituŋa dindi.

²¹Ilaŋa mi natiyili luwi Iwejina dami dajiloleluwu akwamutaŋa waIsarela munyuza mwayiluwu.

²²Dichi yili akwamutaŋa waIsarela, neyi, Mwanta Yehova nindi, Enu akwamutaŋa waIsarela, chumichi hinidi nakuchilila hansaŋu yenuku, nidi nakuchilila hansaŋu yejina dami dajila dimunajiloli munyuza mumwayili.

²³Ami nakajilika ijina dami deneni danajiloluwu munyuza, dimunajilolenu mukachi kawu, chinakajilikewa cheŋi mudenu kumesu awu nyuza yakeluka nawu yami Yehova. Dimu mwanahoshiyi Mwanta Yehova.

²⁴Muloŋa ami nakayifumisha munyuza, nakayifumisha mumatuŋa ejima, nakuyipompesha, nakayiiŋŋa mwituŋa denwenu aweni.

²⁵Nakayisampwila meji atooka, mwakatooka to-o. Nakayitookesha majilu enu ejima, niakishi enu akutuŋa ejima.

²⁶Nakayinka muchima wawiha, nakasha spiritu yayiha mudenu. Nakafumisha muchima welola mumujimba wenu, nakayinka zo muchima wamusunyi.

²⁷Nakasha Spiritu yami mudenu, nakayendesha munshimbi jami, mwakahembaŋa wuŋaji wami, mwakakoŋaŋamu.

²⁸Mwakashakama mwituŋa dinenkeli ankakulula jenu. Enu mwakekala antu ami, ami nawa nakekala Nzambi yenu.

²⁹Nakayamwina kumajilu enu ejima. Nakatambika tidiku yakavuli, hinakayiletela cheŋi nzalaku.

³⁰Nakavulisha nyikabu yanyitondu, niyakudya yamumaha, kulonda mwakabuli kusawuka cheŋi nanzala mukachi kanyuza.

³¹Henohu mwakaanuka yaaku yenu yatama, niyuma yimwelilaŋa yabulili kuwaha. Mwakadimona enu aweni nenu, Twatama nankashi; nakuluwaluwa kwenu nayishimashima yenu.

³²Mwanta Yehova nindi, Ilukenu nenu, chumichi hinidi nakuchilila hansaŋu yenuku. Enu akwamutaŋa waIsarela tiyenu nsonyi, kwatenu chikasa kukanwa nansaŋu jayaaku yenu.

³³Mwanta Yehova nindi, Ifuku dinakayitookesha kuluwa kwenu kwejima, nakashakamisha antu munyikala, nakatuŋisha antu muyinkalampata.

³⁴Ituŋa dadiŋi kwamahembi akadidima cheŋi, kutoŋa dadiŋi kwamahembi hohu kumesu awantu ejima ahitilaŋa.

³⁵Akela nawu, Ituŋa dadiŋi kwamahembi hohu dinabalumuki dehi neyi itempa daEdeni; ninyikala yadiŋi yakisika dehi, yadiŋi kwamahembi hohu, yahumoka dehi matala, ayihata dehi yiŋaka, mwashakama dehi niantu.

³⁶Henohu nyuza yashalashala kudenu kwi-ndo, yakeluka nawu yami Yehova inatuŋi nyikala yahumokeli, yami nawa inatumbi mbutu mwadiŋi kwamahembi hohu. Munahoshami Yehova dimu nakakoŋa nawa.

³⁷Mwanta Yehova nindi, Akwamutaŋa waIsarela amba kaŋihula chumichi kulonda nakayikoŋelichu. Nakavulisha antu awu neyi mukanka wayimuna.

³⁸Neyi mukanka wayimuna yajilikawu dehi, neyi mukanka wayimuna yakutwalawu kuYerusalema hayawŋa yawu yakushiika dehi, dimu mwamba kenzeia nyikala yakisika dehi, yakenzala nanyikanka yawantu. Akeluka nawu yami Yehova.